استانا وپەرانىڭ جەتەكشى سوليسى تايىر عاتاۋوۆ دۇنيەدەن ءوتتى
جاقىندا بەلگىلى ءارتىس جول اپاتىنا ۇشىراعان ەدى، دەپ حابارلايدى قازاقپارات تەاتردىڭ باسپا ءسوز قىزمەتىنە سىلتەمە جاساپ.
تايىر عاتاۋوۆتىڭ ەسىمى قازاقستاندىق بالەت جىلناماسىنا ماڭگىلىككە جازىلدى، ونىڭ ەڭبەگى باعا جەتپەس: ول ەلورداداعى حورەوگرافيالىق ونەردىڭ نەگىزىن قالاۋشىلاردىڭ ءبىرى بولدى. ونىڭ گاسترولدىك كەستەسى اۋقىمدى ەدى، سوليست قازاقستاننىڭ مارتەبەسىن شەتەلدە اسقاقتاتىپ، فرانسيا، ۆەنگريا، يتاليا جانە باسقا ەلدەردە ونەر كورسەتكەن.
كوپتەگەن حالىقارالىق بايقاۋلاردىڭ لاۋرەاتى، قازاقستاننىڭ ەڭبەك سىڭىرگەن قايراتكەرى، «دەبيۋتتەر دوستاستىعى» ت م د جاستار سىيلىعىنىڭ لاۋرەاتى - ونىڭ ماراپاتتار ءتىزىمىن ۇزاق جالعاستىرا بەرۋگە بولادى. تايىر عاتاۋوۆ بي ۇستازىنىڭ وتباسىندا دۇنيەگە كەلگەن، اكەسى بالا كۇنىنەن باستاپ زاماناۋي جانە حالىق بيلەرىنە دەگەن ماحابباتتى بويىنا ءسىڭدىرىپ، ا. سەلەزنيەۆ اتىنداعى حورەوگرافيالىق ۋچيليشەگە وقۋعا بەرگەن.
2003 -جىلى ۋچيليشەنى ۇزدىك ءتامامداعان سوڭ تايىر كۇلاش بايسەيىتوۆا اتىنداعى ۇلتتىق وپەرا جانە بالەت تەاترىنىڭ سوليسى اتاندى. سول جەردە 10 جىل ەڭبەك ەتتى. ال 2013 -جىلى «استانا وپەرانىڭ» جەتەكشى سوليسى بولدى. 2007 -جىلى اتى اڭىزعا اينالعان ميلاندىق لا سكالا تەاترىندا (يتاليا) تاعىلىمدامادان ءوتتى. 2018 -جىلى قازاق ۇلتتىق حورەوگرافيا اكادەمياسىن تامامداپ، «ونەر تانۋ عىلىمدارىنىڭ ماگيسترى» بىلىكتىلىگىن الدى.
تايىر عاتاۋوۆ جارقىن دا ۇمىتىلماس بەينەلەر گالەرەياسىن جاسادى. «استانا وپەرا» ونەرسۇيەر قاۋىمىنىڭ جادىندا ول پ. چايكوۆسكيدىڭ «اققۋ كولىندەگى» زيگفريد، پ. چايكوۆسكيدىڭ «شەلكۋنچيك» بالەتىندەگى حانزادا شەلكۋنچيك، ل. مينكۋستىڭ «بايادەركاسىنداعى» سولور، ل. مينكۋستىڭ «دون كيحوت» بالەتىندەگى بازيل رەتىندە جانە وزگە دە كوپتەگەن تاماشا پارتيالارمەن قالا بەرمەك.
«ونىڭ اسقاق ارماندارى، جوسپارلارى كوپ ەدى، اتتەڭ، ويدا جوقتا ءومىرى توقتادى. قوش بول، ءبىزدىڭ تايىر» دەپ ەسكە الادى ارىپتەستەرى. «استانا وپەرا» مەملەكەتتىك وپەرا جانە بالەت تەاترىنىڭ ۇجىمى قازاقستاننىڭ ەڭبەك سىڭىرگەن قايراتكەرى تايىر تالعات ۇلى عاتاۋوۆتىڭ قايعىلى قازاسىنا بايلانىستى مارقۇمنىڭ تۋىستارى مەن جاقىندارىنا كوڭىل ايتادى.
