اۆستريا پرەزيدەنتى كارانتين كەزىندە مەيرامحانادا كەشكى اس ىشكەن

نۇر-سۇلتان. قازاقپارات - اۆستريادا ەل پرەزيدەنتى الەكساندر ۆان دەر بەللەننىڭ كارانتين كەزىندە جابىق مەيرامحانادا كەشكى اس ىشكەنى انىقتالدى، دەپ حابارلايدى «حابار 24».

وتباسىمەن بىرگە تاماقتانىپ وتىرعان مەملەكەت باسشىسىنىڭ ۇستىنەن ۆەنا پوليتسەيلەرى تۇسكەن.

بەلگىلى بولعانداي، مەكەمە تۇنگى 11-دەن كەيىن دە جۇمىس ىستەپ تۇرعان. ال ەلدە ەنگىزىلگەن كارانتين تارتىبىنە ساي، تاماقتانۋ ورىندارى بۇل ۋاقىتتا جابىلۋى ءتيىس. سوندىقتان بۇل زاڭدى بۇزۋ بولىپ سانالادى. ەندى مەيرامحانا يەسىنە 30 مىڭ ەۋرو ايىپپۇل سالىنۋى مۇمكىن.

الەكساندر ۆان دەر ۆەللەن، اۆستريا پرەزيدەنتى:

- كارانتين باستالعالى بەرى ءبىرىنشى رەت دوستارىم جانە جۇبايىممەن بىرگە تاماقتانۋعا بارعان ەدىم. ءبارىمىز اڭگىمە- دۇكەن قۇرىپ وتىرىپ، ۋاقىتقا قاراۋدى ۇمىتىپ كەتىپپىز. ىستەگەن ىسىمە قاتتى وكىنەمىن. ەگەر مەيرامحانا يەسى قانداي ءبىر شىعىنعا ۇشىرايتىن بولسا، وعان ءوزىم جاۋاپ بەرۋگە دايىنمىن.

www.24.kz