مەملەكەت باسشىسى بەيسەن قۇرانبەكتىڭ جاقىندارىنا كوڭىل ايتتى

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ بەلگىلى جۋرناليست، «جەتىسۋ» تەلەارناسىنىڭ ديرەكتورى بەيسەن قۇرانبەكتىڭ قايتىس بولۋىنا بايلانىستى ونىڭ وتباسى مەن جاقىن تۋىستارىنا كوڭىل ايتىپ، جەدەلحات جولدادى.

بۇل تۋرالى ق ر پرەزيدەنتىنىڭ باسپا ءسوز حاتشىسى بەرىك ءۋالي جەلىدەگى پاراقشاسىندا جازدى. «بەلگىلى جۋرناليست، تانىمال تەلەجۇرگىزۋشى بەيسەن قۇرانبەكتىڭ دۇنيەدەن وتۋىنە بايلانىستى اۋىر قايعىلارىڭىزعا ورتاقتاسىپ، كوڭىل ايتامىن. بەيسەن قۇرانبەك قازاق جۋرناليستيكاسىندا وزىندىك ورنى بار، كاسىبي قولتاڭباسىن قالىپتاستىرعان ازامات ەدى. «قازاقستان» ۇلتتىق تەلەارناسىنداعى «ايتۋعا وڭاي»، «قارەكەت» باعدارلامالارىن جۇرگىزىپ، ەلدىڭ ىستىق ىقىلاسىنا بولەندى، حالىقتىڭ العىسىن الدى. ول الماتى وبلىستىق «جەتىسۋ» ارناسىنىڭ ديرەكتورى رەتىندە بىلىكتى باسشى، ۇتقىر ۇيىمداستىرۋشى ەكەنىن دە كورسەتە ءبىلدى. مارقۇمنىڭ توپىراعى تورقا، جاتقان جەرى جايلى، يمانى سالامات بولسىن!»، - دەلىنگەن جەدەلحاتتا.

ەسكە سالساق، بۇگىن بەلگىلى جۋرناليست بەيسەن قۇرانبەك 49 جاسقا قاراعان شاعىندا دۇنيەدەن وتكەنى تۋرالى حابارلاعان بولاتىنبىز.