كارانتين: نۇر- سۇلتانعا كىرۋگە جانە قالادان شىعۋعا كىمدەرگە رۇقسات بەرىلدى

نۇر-سۇلتان. قازاقپارات - ەلورداداعى سانيتارلىق بلوك پوستتار جۇمىسىنىڭ جاڭا الگوريتمى 13 - مامىردان باستاپ كۇشىنە ەندى.

ەلوردا اكىمدىگىنىڭ مالىمەتى بويىنشا، الگوريتمگە سايكەس، قالا اۋماعىنا شىعۋعا/كىرۋگە تىيىم سالۋدى قامتاماسىز ەتە وتىرىپ، بلوكپوستتاردا سانيتارلىق- كارانتيندىك باقىلاۋ جالعاسۋدا، مىنالاردى قوسپاعاندا:

- حالىقتىڭ تىنىس- تىرشىلىگىن قامتاماسىز ەتۋ ۇيىمدارىنىڭ قىزمەتكەرلەرى؛

- ت ج رەجيمى الىنىپ تاستالعاننان كەيىن ءوز جۇمىسىن قايتا باستاعان ۇيىم قىزمەتكەرلەرى؛

- كارانتين ايماعىنا، ودان تىس جەرلەردەگى ساياجاي ۋچاسكەلەرىنە (قالا سىرتىنداعى ۇيلەرگە) بارا جاتقان تۇلعالار؛

- مەديتسينالىق كورسەتكىشتەر بويىنشا شىعاتىن جانە كەلەتىن ادامدار؛

- كوكتەمگى ەگىس جۇمىستارىنا جىبەرىلگەن تۇلعالار؛

- اقمولا وبلىسىنىڭ سەلينوگراد، ارشالى، شورتاندى جانە قورعالجىن اۋداندارىنىڭ تۇرعىندارى؛

- ق ر باسقا وڭىرلەرىندە تىركەلگەن كارانتين ايماقتارىنان شىعاتىن ادامدار سانيتارلىق بلوكپوستتاردا قاجەتتى قۇجاتتاردى تولتىرعاننان كەيىن؛

- پاترۋلدىك پوليتسيانىڭ ەرىپ ءجۇرۋىنسىز جەرلەۋ ماقساتىندا كارانتين ايماعىن كەسىپ وتەتىن ازاماتتار؛

- شەت مەملەكەتتەردىڭ ازاماتتارى؛

- كارانتين ايماعىنا نەمەسە كارانتين ايماعىنان وزدەرىنىڭ كامەلەتكە تولماعان بالالارىنا بارا جاتقان تۇلعالار؛

- كارانتين ايماعىنا نەمەسە كارانتين ايماعىنان سىرقات تۋىستارىنا كۇتىم جاساۋ ماقساتىندا بارا جاتقان تۇلعالار؛

- اۋە رەيسىمەن بارا جاتقان تۇلعالار؛

- قالپىنا كەلتىرۋ جۇمىستارى جانە سۋ تاسقىنىنا قارسى ءىس- شارالارعا كومەك كورسەتۋ ءۇشىن تۇركىستان وبلىسىنا جىبەرىلەتىن تۇلعالار؛

- ازىق- تۇلىك جانە ازىق- تۇلىكتىك ەمەس تاۋارلاردىڭ جۇك كولىكتەرى؛

- ترانزيت. سونىمەن قاتار بەكىتىلگەن قۇجاتتا كارانتين ايماعىن كەسىپ ءوتۋ بويىنشا بارلىق تۇپكىلىكتى شەشىمدەردى جاۋاپتى قىزمەتكەرلەر بلوكپوستاردا قابىلدايتىنى ايتىلعان. نۇر- سۇلتان قالاسىنىڭ كارانتين ايماعىن كەسىپ وتەتىن ءاربىر تۇلعا «بلوكپوست» اقپاراتتىق دەرەكتەر بازاسىندا مىندەتتى تۇردە ەسەپكە الىنۋى ءتيىس.