قازىر تەك ىشكى تۋريزم عانا جاندانادى دەگەن ءۇمىت بار - راشيدا شايكەنوۆا
«كوروناۆيرۋسقا قاتىستى احۋال ءبىزدىڭ احۋالعا دا اسەرىن تيگىزبەي قويعان جوق. ءبىز ەپيداحۋالدىڭ سالدارىن 2019 -جىلدىڭ جەلتوقسانىندا- اق سەزىنە باستادىق. تۋريستىك سالادا شاعىن جانە ورتا بيزنەس باسىم ەكەنى بارىنە ءمالىم. قازىر تۋريستىك سالا قايراڭداپ قالعانىن جوعارى دەڭگەيدە ءتۇسىنىپ وتىر»، - دەدى ونلاين باسپا ءسوز ءماسليحاتى كەزىندە ق ر تۋريستىك قاۋىمداستىعىنىڭ ديرەكتورى راشيدا شايكەنوۆا.
ونىڭ ايتۋىنشا، قازىر وسىنداي اۋىر كۇندەردى الەمنىڭ تۋريستىك يندۋسترياسى باسىنان كەشىرىپ جاتىر.
«قازىر تەك ىشكى تۋريزم عانا جاندانادى دەگەن ءۇمىت بار. سەبەبى، كارانتيننەن زەرىككەن ادامدار قازاقستان ءوز ىشىندە ساياحاتتاۋدى ۇيعارادى دەپ ۇمىتتەنەمىز. الايدا، اسا سەنىمدى ەمەسپىز. سەبەبى ديەۆالۆاتسيا مەن ينفلياتسيا تۇتىنۋشىلاردىڭ دەمالىسقا دەگەن قاراجاتىن باسقا جاققا جۇمساۋىنا ىقپال ەتەتىنى ءسوزسىز. الايدا، الاكول سياقتى تاعى باسقا شيپاجايلىق كۋرورتتى ورىندارعا، وڭالتۋ شارالارىنا سۇرانىس بولۋى مۇمكىن»، - دەدى ر. شايكەنوۆا.
ق ر باس سانيتارلىق دارىگەرىنىڭ قاۋلىسىندا تۋريستەرگە ارنالعان پ ت ر تەستى انىقتاماسىن الۋ تۋرالى تارماق بار.
«بۇل انىقتامانىڭ جارامدىلىعى 7 كۇن عانا. ال ادامدار 7 كۇننەن ارتىق ۋاقىت دەمالۋعا بارادى. وسى جەردە سۇراق تۋادى. دەمالىسقا كەلگەن ادامدار سول جەردە تاعى 7 كۇنگە انىقتاما الۋى كەرەك پە؟ بۇل سۇراققا جاۋاپ جوق. سالالىق وزگەشەلىكتەرگە بايلانىستى بۇل قاۋلىعا وزگەرىس ەنگىزۋ تۋرالى باس سانيتارلىق دارىگەرگە ۇسىنىسپەن شىقپاقپىن»،- دەدى ول.
