قوناق شاقىرۋدى، اۋىزاشارعا بارۋدى توقتاتۋ كەرەك – ەسماعامبەتوۆا

نۇر- سۇلتان. قازاقپارات - اۋىزاشار كەزىندە جاپپاي كوروناۆيرۋس جۇقتىرۋ فاكتىسى تىركەلگەن.

بۇل تۋرالى ق ر باس مەملەكەتتىك سانيتار دارىگەرى ايجان ەسماعامبەتوۆا ق ر دەنساۋلىق ساقتاۋ مينيسترلىگىنىڭ مەديا ورتالىعىندا وتكەن تىكەلەي ەفيردە ايتتى، دەپ حابارلايدى قازاقپارات ءتىلشىسى.

ول كوروناۆيرۋس انىقتالماعان اۋدانداردا نە سەبەپتى كارانتين تالاپتارى ساقتالاتىنىن ايتىپ ءوتتى. «كوروناۆيرۋس جاعدايى تىركەلمەگەن ءوڭىر جوق. كۇن سايىن جاعدايعا مونيتورينگ جۇرگىزىپ وتىرامىز. سوندىقتان ەپيدەميولوگيالىق جاعدايعا بايلانىستى بارلىق وڭىردە كارانتين شارالارى ساقتالۋى كەرەك. اۋلادا بولسىن توي وتكىزگىسى كەلەتىندەردى تۇسىنەمىز، ءبىراق وزگەگە اۋرۋ جۇقتىرىپ الماۋ جاعىن ويلاۋىمىز كەرەك. سوندىقتان بۇل ساقتىق شارالارىنا تۇسىنىستىكپەن قاراۋعا شاقىرامىز. قىتاي، وڭتۇستىك كورەيا سياقتى مەملەكەتتەر كوروناۆيرۋستى جەڭدى دەپ ويلاماڭىزدار، ولار ءالى دە بۇل دەرتپەن كۇرەسۋدە»، - دەيدى ول.

ونىڭ ايتۋىنشا، وتباسىلىق مەرەكەلەردى وتكىزۋگە تىيىم سالىنعان. «ايماقتاردىڭ بىرىندە تىيىم سالىنعانىنا قاراماستان اۋىزاشار جاساعان جاعداي كەزدەستى. قوناققا بارعانداردىڭ ىشىندە كوروناۆيرۋس ينفەكسياسىن جۇقتىرعان ادام بولعان. سوندىقتان قوناققا بارۋدى، قوناق شاقىرۋدى، اۋىزاشارعا بارۋدى توقتاتۋ كەرەك»، - دەيدى ول.

اۆتور: زارينا قاھارمان