جاپونيادا قازاقستان استاناسىنىڭ قۇرمەتىنە جاڭا ساكۋرا سۇرپى شىعارىلدى

ساپپورو. قازاقپارات - جاپونيانىڭ حوككايدو ارالىندا قازاقستان استاناسىنىڭ قۇرمەتىنە «نۇر- سۇلتان» دەپ اتالاتىن ورىك اعاشىنىڭ جاڭا سۇرپى گۇلدەدى.

جاڭا سۇرىپتى حوككايدو پرەفەكتۋراسىنىڭ ورمان شارۋاشىلىعى عىلىمي- زەرتتەۋ ينستيتۋتى شىعاردى، دەپ حابارلايدى قازاقپارات ق ر س ءى م باسپا ءسوز قىزمەتىنە سىلتەمە جاساپ.

«نۇر- سۇلتان» ساكۋراسىنىڭ ەرەكشەلىگى مينۋس 40 گرادۋسقا دەيىن ايازعا ءتوزىمدى - بۇل ەلوردانىڭ اۋا- رايىنا بەيىمدەلۋ ءۇشىن ەڭ قاجەتتى سيپاتتامانىڭ ءبىرى. قازاقستاننىڭ استاناسىن بەينەلەيتىن ورىك گۇلى قوس گۇلدەنۋ ەرەكشەلىگىنە بايلانىستى 10 اپپاق كۇلتە جاپىراقشادان تۇرادى، ال ساكۋرانىڭ باسقا سۇرىپتارىندا ادەتتە 5 جاپىراقشا عانا بار. ساكۋرانىڭ جاڭا سۇرپىنىڭ اۆتورى - حوككايدو پرەفەكتۋراسى ورمان شارۋاشىلىعى عىلىمي- زەرتتەۋ ينستيتۋتىنىڭ دوكتورى يويچي ۆاكيتا.

«مەنىڭ الەمدەگى سۋىق ايماقتاردا ساكۋرانى وسىرۋمەن اينالىساتىن مولەكۋليارلىق بيولوگ رەتىندەگى ماقساتىم - ايازعا ءتوزىمدى ساكۋرانىڭ گەنەتيكالىق الەۋەتىن ۇنەمى كەڭەيتۋ. «نۇر- سۇلتان» سۇرىپى عىلىمي ەكسپەريمەنت، سونداي- اق قازاق حالقىنا سىيلىق- تىلەك بولىپ تابىلادى. گۇلدەپ تۇرعان ساكۋرانى تاماشالاۋ جاپون حالقىنىڭ نەگىزگى مادەني كودى جانە بۋدديستىك سەنىمدەردىڭ نەگىزىندە ساكۋرا گۇلدەرى تابيعاتتىڭ شىعارماشىلىق كۇشىن جانە كوكتەمنىڭ كەلۋىن بىلدىرەدى. وسىلايشا، مەن قازاقستانعا كوروناۆيرۋستىق ينفەكتسيانىڭ تارالۋىن توقتاتىپ، داعدارىستان تەز ارادا شىعۋدى تىلەيمىن»، - دەيدى يويچي ۆاكيتا.

ايازعا ءتوزىمدى «چيشيمازاكۋرا» ساكۋراسىنىڭ ءتۇرى جاپونيانىڭ ەڭ سولتۇستىك ايماعى - حوككايدو پرەفەكتۋراسىندا وسەدى جانە ورمان شارۋاشىلىعى عىلىمي- زەرتتەۋ ينستيتۋتى بيوتەحنولوگيالاردى قولدانۋ ارقىلى ورىك اعاشىنىڭ وسى ءتۇرىن سۇرىپتاۋمەن اينالىسادى. تانىمال جاپون ساۋلەتشىسى جانە نۇر- سۇلتان قالاسى باس جوسپارىن ازىرلەۋشى كيسە كۋروكاۆانىڭ ۇلى ميكيو كۋروكاۆانىڭ ايتۋىنشا، ونىڭ اكەسى ق ر تۇڭعىش پرەزيدەنتى نۇرسۇلتان نازاربايەۆتىڭ ەرەكشە سەنىمىنە ارقا سۇيەي وتىرىپ قازاقستان استاناسىنىڭ باس جوسپارىن ازىرلەۋ كەزىندە ءوزىنىڭ مەتابوليزم مەن سيمبيوز ارحيتەكتۋرالىق باعىتىنىڭ تۇجىرىمداماسىن ىسكە اسىردى. ارحيتەكتوردىڭ نەگىزگى يدەياسى «سيمبيوتيكالىق ساۋلەت» پرينتسيپى بويىنشا قالالىق جانە تابيعي ورتانى ۇيلەستىرۋ بولدى. «جاپون عالىمدارى ازىرلەگەن نۇر- سۇلتان اتتى ساكۋرانىڭ جاڭا سۇرپى ءبىزدىڭ ەلدەردى بىرىكتىرەتىن تاعى ءبىر فاكتور بولاتىنىنا سەنىمدىمىن»، - دەدى م. كۋروكاۆا.

ساكۋرا دەپ اتايتىن ورىك اعاشى جاپونيانىڭ ۇلتتىق برەندى. حانامي نەمەسە گۇلدەۋ كەزىندە ساكۋرانى تاماشالاۋ ءداستۇرى جىل سايىن ەلگە ميلليونداعان تۋريستەردى تارتادى. بۇل ارتىقشىلىقتى گەرمانيا، فرانسيا جانە ا ق ش سياقتى جايلى كليماتى بار وڭىرلەردە ورنالاسقان ەلدەر شەتەلدىك تۋريستەردى تارتۋ ءۇشىن پايدالانۋدا. جاپونيادا حانامي كەزەڭى ىستىق وكيناۆادا اقپان ايىنان باستالىپ، ايازدى حوككايدودا مامىرعا دەيىن سوزىلادى. ساكۋرا گۇلدەرىنىڭ «تولقىنى» بىرتىندەپ ەلدىڭ وڭتۇستىگىنەن سولتۇستىگىنە تارالادى. جاپون ارالدارىنىڭ پايدا بولۋىنان باستاپ ءوسىپ كەلە جاتقان ەلدە 10-عا جۋىق جابايى ساكۋرانىڭ ءتۇرى بار. جاپوندىقتار ءۇشىن ساكۋرانى تاماشالايتىن ەڭ ىڭعايلى ورىن - شيندزيۋكۋ ۇلتتىق پاركى، وندا 300-دەن استام ساكۋرانىڭ سۇرپى وتىرعىزىلعان.