نۇرلان نىعماتۋلين: پارلامەنتتىك وپپوزيتسيا اشىق قوعامدى دامىتۋعا ىقپال ەتەدى
نۇر-سۇلتان. قازاقپارات - پارلامەنت ءماجىلىسىنىڭ جالپى وتىرىسىندا قازاقستان رەسپۋبليكاسىنىڭ كەيبىر زاڭنامالىق اكتىلەرىنە پارلامەنتتىك وپپوزيتسيا ماسەلەلەرى بويىنشا وزگەرىس پەن تولىقتىرۋلار ەنگىزۋ تۋرالى» زاڭ جوباسى ماقۇلداندى، دەپ حابارلايدى قازاقپارات ءتىلشىسى.
ءماجىلىس ءتوراعاسى نۇرلان نىعماتۋلين قۇجات جوباسى مەملەكەت باسشىسى قاسىم- جومارت توقايەۆتىڭ تاپسىرماسىمەن ازىرلەنگەنىن ەسكە سالدى.
«وسىعان وراي، ءماجىلىس دەپۋتاتتارى باستاماشى بولعان وسى زاڭ جوباسىندا العاش رەت «پارلامەنتتىك وپپوزيتسيا» دەگەن ۇعىم ەنگىزىلدى. بۇل پارلامەنت تاريحىندا بۇرىن بولماعان، ءبىراق تا، ۋاقىت تالابىنا ساي جاسالىپ وتىرعان وتە قاجەتتى قادام. سەبەبى، پارلامەنتتىك وپپوزيتسيا - دەموكراتيانى ودان ءارى نىعايتۋعا، پارلامەنت جۇمىسىن دامىتۋعا، سونىمەن بىرگە، اشىق جانە ەركىن قوعامدى قامتاماسىز ەتۋگە ىقپال ەتەتىن بولادى. سوندىقتان، دامىعان ەلدەردىڭ تاجىريبەسىن ەسكەرە وتىرىپ، وسى زاڭ اياسىندا، ءتيىمدى پارلامەنتتىك وپپوزيتسيا قالىپتاستىرۋ كەرەك دەپ ەسەپتەيمىز»، - دەدى نۇرلان نىعماتۋلين.
زاڭ جوباسىنىڭ نەگىزگى ماقساتى - پارلامەنتتىك وپپوزيتسيا ينستيتۋتىن قالىپتاستىرۋدى رەتتەۋ سالاسىندا قۇقىقتىق نەگىزدەردى قامتاماسىز ەتۋ بولىپ تابىلادى. زاڭ جوباسىنا سايكەس، پارلامەنتتىك وپپوزيتسياعا ءوز دەپۋتاتتارىنىڭ اراسىنان ق ر پارلامەنتى ءماجىلىسى تۇراقتى كوميتەتتەرىنىڭ ءتوراعالارى لاۋازىمىنا كانديداتۋرا ۇسىنۋ قۇقىعى بەرىلەدى. دەپۋتات ازات پەرۋاشيەۆتىڭ ايتۋىنشا، تۇراقتى كوميتەتتەردىڭ ءبىرىنىڭ ءتوراعاسى پارلامەنتتىك وپپوزيتسيا دەپۋتاتتارىنىڭ اراسىنان سايلاناتىنى تۋرالى ەرەجەنى بەكىتۋ ۇسىنىلادى.
جۇمىس توبى اياسىندا زاڭ جوباسىن تالقىلاۋ كەزىندە دەپۋتاتتار تۇزەتۋلەر ەنگىزدى. بۇل تۇزەتۋلەرگە سايكەس، پارلامەنتتىك وپپوزيتسيا پارلامەنت ءماجىلىسى تۇراقتى كوميتەتتەرىنىڭ حاتشىلارى لاۋازىمىنا كانديداتۋرا ۇسىنۋعا دا قۇقىلى بولادى. بۇل رەتتە، ەكى تۇراقتى كوميتەتتىڭ حاتشىلارى پارلامەنتتىك وپپوزيتسيا ۇسىنعان دەپۋتاتتار اراسىنان سايلانادى.
«ۇسىنىلىپ وتىرعان جوبا پارلامەنتتىك وپپوزيتسيا قىزمەتىنىڭ جانە پارتيالىق پىكىرتالاستاردىڭ بەرىك كەپىلدىگىن قالىپتاستىرىپ، ەلدىڭ دەموكراتيالىق دامۋىندا ەداۋىر قادام بولادى دەپ سانايمىز. مەملەكەت باسشىسىنا ماڭىزدى ساياسي شەشىم قابىلداعانى ءۇشىن، زاڭ جوباسىن تالقىلاۋعا قاتىسقان ازاماتتار مەن ساراپشىلارعا، سونىمەن بىرگە جۇمىس توبى مۇشەلەرىنە العىسىمىزدى بىلدىرەمىز»، دەدى ازات پەرۋاشەۆ.
بۇدان بۇرىن حابارلانعانداي، بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا تولىقتىرۋلار ەنگىزۋ تۋرالى» كونستيتۋتسيالىق زاڭىنىڭ جوباسى ماقۇلداندى. زاڭ جوباسىنىڭ نەگىزگى ماقساتى - قولدانىستاعى زاڭنامادا «پارلامەنتتىك كوپشىلىك» جانە «پارلامەنتتىك وپپوزيتسيا» ۇعىمدارىن بەكىتۋ بويىنشا قۇقىقتىق نەگىزدەردى قامتاماسىز ەتۋ.
