الماتىدا وزگە ۇلت وكىلدەرى قازاق ءتىلىن ءبىلۋ دەڭگەيى بويىنشا ءوزارا باق سىنادى
بۇل بايقاۋدى قازاق ۇلتتىق قىزدار پەداگوگيكالىق ۋنيۆەرسيتەتىنىڭ قازاق ءتىل ءبىلىمىنىڭ تەورياسى مەن ادىستەمەسى كافەدراسى قازاق ءتىلىنىڭ مارتەبەسىن كوتەرىپ، ونىڭ قولدانۋ اياسىن ارتتىرۋ ماقساتىندا ۇيىمداستىردى. بيىلعى سايىس ۇلى اقىن، ويشىل اباي قۇنانباي ۇلىنىڭ 175 جىلدىعىنا ارنالدى.
«رۋحاني جاڭعىرۋ» باعدارلاماسىندا قاراستىرىلعان باسىم باعىتتاردى ناقتى ىسكە اسىرۋ تۇرعىسىندا قولعا الىنعان بايقاۋ Zoom پلاتفورماسىندا ءوتتى.
«وليمپيادانىڭ باستى ماقساتى - مەملەكەتتىك ءتىلدىڭ قولدانىلۋ اياسىن كەڭەيتۋ، قازاقستاندىق پاتريوتيزمدى قالىپتاستىرۋ، ۇلى اباي ۇلاعاتىن جاس ۇرپاققا دارىپتەۋ جانە جاستاردىڭ مەملەكەتتىك تىلگە دەگەن ىنتا- ىقىلاسىن ارتتىرۋ. وسى ىسپەتتەس يگى ىستەر قازاق ءتىلىنىڭ مارتەبەسىن كوتەرۋگە، ۇلتتىق قۇندىلىقتارىمىزدى ناسيحاتتاۋعا، وزگە ءتىلدى جاستاردىڭ قازاق تىلىنە قۇرمەت سەزىمىن وياتۋعا ىقپال ەتەتىنى بەلگىلى» ،- دەدى قازاق ءتىل ءبىلىمىنىڭ تەورياسى مەن ادىستەمەسى كافەدراسىنىڭ مەڭگەرۋشىسى تىنىشتىق ەرمەكوۆا.
ءتورت كەزەڭ بويىنشا وتكەن سايىس بارىسىندا جيىرمادان استام ستۋدەنت ءوزارا مىقتىنى انىقتادى. قاتىسۋشىلارعا الماتى قالاسى تىلدەردى دامىتۋ جانە ۇيلەستىرۋ جۇمىستارى ءبولىمىنىڭ باسشىسى باقىت قالىمبەت، ءال- فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى انار سالقىنباي، سۇلەيمان دەميرەل اتىنداعى ۋنيۆەرسيتەتتىڭ پروفەسسورى شاتتىق ەرعوجينا، ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ دەكانى اينا راحيموۆا، قازاق ۇلتتىق قىزدار پەداگوگيكالىق ۋنيۆەرسيتەتىنىڭ ءباسپاسوز جانە قوعاممەن بايلانىس ءبولىمىنىڭ باسشىسى جاندار اسان جانە وسى وقۋ ورنىنىڭ «رۋحاني جاڭعىرۋ» جوبالىق كەڭسەسىنىڭ ۇيلەستىرۋشىسى گاۋحار بايتاشيەۆا تورەلىك ەتتى. وليمپيادا كەزەڭدەرىندە اباي اتىنداعى قازاق ۇلتتىق پەداگوگيكالىق ۋنيۆەرسيتەتى، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى، قىزدار ۋنيۆەرسيتەتى، حالىقارالىق اقپاراتتىق تەحنولوگيالار ۋنيۆەرسيتەتى، ە. ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتى، م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتى، ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى، ازاماتتىق اۆياتسيا اكادەمياسى جانە ءومىرزاق سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتىنىڭ ستۋدەنتتەرى ءوز ونەرلەرىن ورتاعا سالدى.
ولار «سالەم - ءسوزدىڭ اناسى» العاشقى اينالىمىندا وزدەرىن تانىستىرسا، «اسىل ءسوزدى ىزدەسەڭ، ابايدى وقى، ەرىنبە!» ەكىنشى كەزەڭىندە حاكىم شىعارمالارىن مانەرلەپ جاتقا وقىپ جارىستى. ال ءۇشىنشى تۋردا الەۋمەتتىك جەلىدەگى ءوز پاراقشالارىندا «مەملەكەتتىك ءتىل - مەنىڭ ءتىلىم» تاقىرىبىندا جازبا جاريالادى. سوڭعى كەزەڭدە ادامزاتتىڭ دانىشپانىنا اينالعان ابايدىڭ ءومىرى مەن شىعارماشىلىعى بويىنشا قۇراستىرىلعان تەست تاپسىرمالارىن ورىندادى. قازىلار قاتىسۋشىلاردى باعالاۋدا قازاقشا ساۋاتتى سويلەۋىن، ويىن جۇيەلى جەتكىزە ءبىلۋىن جانە اباي ءومىرى مەن شىعارماشىلىعى بويىنشا ءبىلىم دەڭگەيىن باستى نازارعا الدى.
«ءۇش ساعاتقا سوزىلعان وليمپيادا بارىسىندا قازاقشا ەركىن سويلەيتىن، قازاق ءتىلى مەن ادەبيەتىن، اباي شىعارمالارىن جان- تانىمەن سۇيسىنە وقيتىن وزگە ۇلت وكىلدەرىنىڭ ىنتا- جىگەرىنە، ونەرلەرىنە ريزا بولدىق. بايقاۋ بارىسىندا، ۇلى ويشىلدىڭ سوزىمەن ايتقاندا، «تولعاۋى توقسان قىزىل ءتىلدى» سويلەتىپ، ادام جانىن تەبىرەنتە وقىلعان ولەڭدەر مەن «كوڭىلگە ءتۇرلى وي سالار» ءان- كۇيلەر ەرەكشە اسەرگە بولەدى دەسەك ارتىق ايتقانىمىز ەمەس. وسىنداي جۇمىستار ارقىلى ولاردىڭ قازاق ءتىلى بويىنشا تانىمدىق قابىلەتىن دامىتىپ، مەملەكەتتىك ءتىلدى مەڭگەرۋىنە ىقپال ەتۋدى كوزدەيمىز. وليمپيادا وسكەلەڭ ۇرپاقتى ەلجاندى ءھام ۇلتتىق قۇندىلىقتار نەگىزىندە تاربيەلەۋگە زور ۇلەس قوسادى دەپ سەنەمىز»، - دەدى قازىلار القاسىنىڭ مۇشەلەرى.
سايىس سوڭىندا قازىلار القاسىنىڭ ءتوراعاسى باقىت قالىمبەت قىزدار ۋنيۆەرسيتەتىندە وسىنداي ونەگەلى شارا ءوز جالعاسىن تاۋىپ كەلە جاتقانىنا ريزاشىلىعىن ءبىلدىرىپ، مەملەكەتتىك ءتىلدى ەركىن يگەرگەن بۇگىنگى ستۋدەنت جاستار - ەرتەڭگى بىلىكتى مامان، تاۋەلسىز قازاق ەلىنىڭ جارقىن بولاشاعى ەكەندىگىن ايتتى. بايقاۋ قورىتىندىسى بويىنشا باس جۇلدەگە اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ستۋدەنتى د. يۋسۋپوۆا لايىق دەپ تانىلدى. ءبىرىنشى ورىندى م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ ستۋدەنتى ۆ. سۋچكوۆا يەلەنسە، ەكىنشى ورىن قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتى ۆ. ارتامونوۆا مەن اباي اتىنداعى قازۇپۋ ستۋدەنتى ا. بولوۆنيەۆاعا بۇيىردى. ال قىزدار ۋنيۆەرسيتەتىنىڭ ستۋدەنتى ر. تۋرديماتوۆا، ە. ا. بوكەتوۆ اتىنداعى قارمۋ ستۋدەنتتەرى ز. كاسيموۆا مەن م. كولماگاروۆا ءۇشىنشى ورىندى ءوزارا ءبولىستى.
سونىمەن قاتار «مەملەكەتتىك ءتىل ناسيحاتشىسى» ، «اباي تانۋ بىلگىرى» ، «كورەرمەندەر كوزايىمى» ، «ەڭ ۇزدىك پوست» ، «كوركەم ءسوز شەبەرى» ، «شىنايى ويدىڭ شىنارى» ، ء«تىل بايلىعى» ، «قازاق تىلىنە قۇرمەت» ، «سويلەۋ شەبەرى» نوميناتسيالارى بويىنشا جەڭىمپازدار انىقتالىپ، ولارعا سەرتيفيكاتتار تابىستالدى.
