پاندەميا بۇكىل الەم ءۇشىن ناعىز سىناق بولدى - داريعا نازاربايەۆا

«كوپشىلىكتى الاڭداتىپ جۇرگەن بىرنەشە ماسەلەگە توقتالعىم كەلىپ وتىر. پاندەميا بۇكىل الەم ءۇشىن ناعىز سىناق بولدى. ول الەمدىك ەكونوميكانى ەشقاشان بولماعان كولەمدە قىسقارتىپ، مۇناي نارىعىندا باعانىڭ تومەندەۋىنە، كاسىپورىندار مەن تۇرعىندار شارۋاشىلىقتارىن اسا قيىن جاعدايعا الىپ كەلدى. مۇنىڭ سالدارى ءار ادامنىڭ ومىرىنە ۇزاق ۋاقىت اسەر ەتەتىنى انىق. بۇل جاعدايدى دۇرىس باعالاي ءبىلۋىمىز كەرەك. شىعىنداردى ازايتۋ قاجەت بولادى. بىزدەر ەندى بۇگىنگى كۇننىڭ شىندىعىمەن جاڭاشا ءومىر ءسۇرىپ ءجۇرمىز»، - دەدى د. نازاربايەۆا پارلامەنت سەناتىنىڭ جالپى وتىرىسىندا.

وسى ورايدا ول 24-ساۋىردە قاۋىپسىزدىك كەڭەسىنىڭ وتىرىسى وتكەنىن، وندا ەلباسى نۇرسۇلتان نازاربايەۆ ءسوز سويلەگەنىن ەسكە سالدى. «27-ساۋىردە مەملەكەت باسشىسى قاسىم- جومارت توقايەۆتىڭ مالىمدەمەسى جاريالاندى. ەل باسشىلىعىنىڭ نەگىزگى پايىمى - داعدارىستان كەيىنگى كەزەڭگە، ەكونوميكالىق، الەۋمەتتىك، قوعامدىق ءومىردى توتەنشە جاعداي رەجيمىنەن شىعارۋعا دايىندىقتى باستاۋ كەرەك. بۇل بارلىق مەملەكەتتىك ورگاندارمەن قاتار، ءبىزدىڭ الدىمىزعا دا، قۇرمەتتى دەپۋتاتتار، ءبىرقاتار مىندەتتەر مەن ماسەلەلەردى قويادى»، - دەدى سەنات ءتوراعاسى.