شەگىرتكە جايلى قىزىقتى دەرەكتەر

الايدا شەگىرتكەنىڭ كەي ءتۇرى عانا قاۋىپتى، ال قالعاندارىنىڭ جاي كۇنىن كورىپ، تىرشىلىك كەشىپ جۇرگەن جاندىكتەر ەكەنىن بىلمەيمىز.

شەگىرتكەنىڭ ۇلكەنى دە، كىشىسى دە بار. ءتۇرى كوپ. كەيبىرىنىڭ ۇزىندىعى 10 سانتيمەترگە دەيىن جەتەدى.

شەگىرتكەنىڭ باستى قاسيەتى نە؟

ەرەكشەلىگى دەيمىز بە، ونىڭ ءبىر جۇمىرتقادان ەكى ءتۇرلى شەگىرتكەنىڭ ءوسىپ جەتىلەتىندىگىن ايتۋعا بولادى. ماسەلەن باۋىرلاس شەگىرتكەنىڭ ءبىرى - جاسىل، ءبىرى - قارا بولىپ شىعۋى مۇمكىن.

مۇنىڭ سىرىن بىلمەگەن عالىمدار ءتىپتى ءبىر جۇمىرتقادان جارىپ شىققان شەگىرتكەلەردىڭ ءوزىن ەكى ءتۇرلى پوپۋلياتسياعا جاتقىزىپ، اربىرىنە جاڭاشا اتاۋ بەرىپ جۇرگەن كەزدەرى بولدى.

الايدا مۇنىڭ ءبارى ءبىر شەگىرتكەنىڭ تۇقىمدارى عانا.

ءبارى شەگىرتكەنىڭ وسكەن جەرىنە بايلانىستى. جالعىزباستى شەگىرتكەلەر شەگىرتكەنىڭ نەگىزىنەن ەكى ءتۇرى بولادى: ءبىرى - جالعىز، سالت جۇرەتىن شەگىرتكەلەر، ەكىنشىسى - ۇيىرمەن جۇرەتىن شەگىرتكەلەر.

جالعىز تىرشىلىك ەتەتىن شەگىرتكەلەر، ادەتتە، ازىق-تۇلىك مول، ءشوبى شۇيگىن جەردە ءومىر سۇرەدى. ءتۇسى جاسىل، دەنەسى ءىرى، قاناتى ءالسىز كەلەدى. ازىق-تۇلىك مول بولعاندىقتان، ءبىر قونىستا جاتا بەرەدى.

سوندىقتان كوپ ۇشىپ، سەكىرىپ اۋرە بولمايدى. قاناتى ءالسىز بولاتىندىعى سودان.

«جالعىزباستى» شەگىرتكەلەر شىرىلداپ ءۇن شىعارادى. جالعىز جۇرگەندىكتەن، شىرىلداپ ءۇن شىعارىپ باسقا «قانداستارىن» جانىنا شاقىرادى، بەلگى بەرەدى، نازارىن اۋدارتادى.

تابىن شەگىرتكە ەگەر شەگىرتكەلەر ازىق-تۇلىك از، تاقىر جەردە تىرشىلىك ەتسە، وندا تابىنعا بىرىگىپ، ءۇيىر قۇرىپ ءومىر سۇرەدى. مۇنداي شەگىرتكەلەردىڭ ءتۇسى قارا قوشقىل، جاسىرىنۋعا بەيىم، قاناتى قۋاتتى كەلەدى. ۇزاق جاققا ۇشۋعا ۇيرەنگەن. جۇزدەگەن شاقىرىمدى باسىپ ءوتۋى مۇمكىن.

تابىن شەگىرتكە 16 شاقىرىم/ساعات جىلدامدىقپەن ۇشا الادى. اۋىل شارۋاشىلىعىنا زيان كەلتىرەتىن دە، مىنە - وسى شەگىرتكەلەر.

كەيبىر تابىنداعى شەگىرتكەنىڭ سانى 40 ميللياردقا دەيىن جەتۋى مۇمكىن. مۇنداي رەكورد ⅩⅩ عاسىردىڭ ورتاسىندا ماروككودا تىركەلگەن.

تابىننىڭ ۇزىندىعى 250 شاقىرىمعا دەيىن جەتسە، ەنى 20 شاقىرىمعا دەيىن جەتكەن ەكەن.

مۇنداي الاپات تابىن باسىپ وتكەن جەردە ەشتەڭە قالماسى انىق، ءبارىن جالماپ كەتپەك.

شەگىرتكەنىڭ پايداسى

ادامدار اشتىق جايلاعان، قۋاڭشىلىق بولعان جىلدارى شەگىرتكە اۋلاپ جەيتىن بولعان. عالىمدار شەگىرتكەنىڭ اعزاسىندا جۇعىمدى، پايدالى زاتتاردىڭ كوپ ەكەنىن ايتادى.

ەت پەن مايدىڭ ورنىن الماستىرا الاتىنداي جۇعىمدىلىعى بار. ۆيتاميندەر كوپ. سوندىقتان ءالى كۇنگە دەيىن قىتاي مەن مەكسيكا تۇرعىندارى شەگىرتكەنى تاڭسىق اس رەتىندە جەيدى.

Massaget.kz