كوروناۆيرۋستان قورعانۋدىڭ ەڭ باستى امالى ماسكا تاعۋ ەمەس - پروفەسسور

بۇل تۋرالى كوروناۆيرۋستىق ينفەكتسيانىڭ اكەلىنۋى مەن تارالۋىنىڭ الدىن الۋ ماقساتىندا وتكەن بريفينگتە ايتىلدى، دەپ حابارلايدى قازاقپارات ءتىلشىسى.

«د د س ۇ جانە كوروناۆيرۋس بويىنشا جۇمىس ىستەيتىن ۇيىمدار بۇل دەرتتەن قورعانۋدىڭ ەڭ باستى امالى ماسكا تاعۋ ەمەس ەكەنىن ايتادى. سەبەبى بۇل اۋادا ۇشىپ جۇعاتىن اۋرۋ ەمەس. ەڭ باستىسى - جەكە باس گيگيەناسىن دۇرىس ساقتاۋ كەرەك»، - دەيدى بالالار جۇقپالى اۋرۋلار كافەدراسىنىڭ مەڭگەرۋشىسى، پروفەسسور ديناگۇل باەشوۆا.

ونىڭ ايتۋىنشا، مەديتسينالىق ماسكا اۋرۋ ادام تۇشكىرگەن كەزدە سىلەكەيىن شاشپاۋى ءۇشىن جانە ناۋقاستارمەن جۇمىس ىستەيتىن مەديتسينالىق قىزمەتكەرلەرگە كەرەك.

«بۇل جاعدايدا قاسىڭدا تۇرعان ادامنان ءوزىڭدى كەم دەگەندە ەكى مەتر الىس ۇستاۋىڭ كەرەك. ەگەر اۋىرعان ادامعا وتە جاقىن تۇرساڭىز، ءسىزدى مەديتسينالىق ماسكا قۇتقارمايدى. ونى كوروناۆيرۋس ينفەكتسياسىن الدىن الۋ ءۇشىن قولدانۋعا بولادى. وڭتۇستىك كورەيادا دۇكەندە كەزەكتە تۇرعان ادامدار مەديتسينالىق ماسكا تاققانىمەن، ءبىر-بىرىنە وتە جاقىن ورنالاسقان. وزدەرىڭىز كورىپ وتىرعانداي، سونىڭ سالدارىنان اۋىرعاندار سانى كۇرت ءوسىپ كەلەدى. ۆيرۋس جاقىن بايلانىس بولعان كەزدە جۇعادى. جاساندى دۇرلىگۋ جاعدايىن تۋدىرۋدىڭ قاجەتى جوق»، - دەيدى ول.

سونداي-اق، پروفەسسور كوروناۆيرۋستان ساقتانۋ جولدارىن ايتتى.

«كوروناۆيرۋس 60-70 ىستىق تەمپەراتۋرا جاعدايىندا بىردەن ءولىپ قالادى، سول سەبەپتى شيكى ازىق-تۇلىك تۇتىنباڭىزدار. الدىمەن ىستىق سۋمەن جۋىپ الۋ كەرەك. قولدى ءجيى جۋۋ قاجەت»، - دەيدى ول.