تۇركىستاندىق شارۋا ليمون ءوسىرىپ، ميلليونەر بولدى
جينالعان ءونىمنىڭ ءار كەلىسىن شارۋا 800 تەڭگەدەن ساۋدالاپ، 5 ميلليون تەڭگە پايداعا كەنەلگەن. ءسويتىپ، بيىل ليمون باعىنىڭ كولەمىن تاعى 10 سوتىققا ۇلعايتقان. قازىر مۇندا كوشەتتەر توپىراققا وتىرعىزىلىپ، كۇتىپ- باپتاۋعا الىنعان.
«ليموننىڭ كوشەتتەرىن 2016 -جىلى وزبەكستان ەلىنەن ارنايى الدىرتتىق. جىلىجاي قۇرىپ، ءۇشىنشى جىلى 3 توننا، ال بيىل 5 توننا ءونىم الدىق. ءار ءتۇپ شامامەن 30-40 كەلىدەن ءونىم بەردى. نەگىزىنەن ءار ءتۇپ ليمون 25-30 جىل ءونىم بەرۋگە قاۋقارلى»، - دەيدى جىلىجاي باعبانى يۋلداش ابلازوۆ.
جالپى، «نۇرسۇلتان» شارۋا قوجالىعىنىڭ يەلىگىندە 17 گەكتار جەر بار. ونىڭ 6 گەكتارىنا شابدالى، 20 سوتتىعىنا ءجۇزىم، 20 سوتتىعىنا ليمون، 80 مىڭ ءتۇپ شايلى روزا كوشەتتەرى ەگىلگەن.
قوجالىق ءتوراعاسى مۇرات جۇمابەكوۆ الداعى جىلى ليمون كولەمىن تاعى 30 سوتىققا ارتتىرۋدى جوسپارلاپ وتىر.
ايتا كەتەرلىگى، بۇل قوجالىق تاجىريبە رەتىندە 2 گەكتار جەرگە قۇرما ەككەن.
