اقتوبەدە دۋا قايتارۋعا ۋادە بەرىپ، التىن بۇيىمدارىن الداپ الىپ كەتكەن

اقتوبە. قازاقپارات - اقتوبەدە دۋا قايتارۋعا ۋادە بەرىپ، التىن بۇيىمدارىن الداپ الىپ كەتكەن ايەل ۇستالدى، دەپ حابارلايدى قازاقپارات ءتىلشىسى.

اقتوبە قالاسىنىڭ №2 استانا اۋداندىق پوليسيا بولىمىنە 52 جاستاعى تۇرعىن ارىز ءتۇسىردى. قالا كوشەلەرىنىڭ بىرىندە ورنالاسقان دۇكەندە بەيتانىس ايەل سوزگە تارتىپ، دۋا قايتارۋعا ۋادە بەرگەن. ءسويتىپ ونىڭ التىن بۇيىمدارى مەن تەلەديدارىن الداپ الىپ كەتكەن. شىعىن كولەمى - 180500 تەڭگە.

«كۇدىكتى التىن بۇيىمداردىڭ ادام اعزاسىنا زيان ەكەنىن ايتىپ، بارلىق اشەكەيىن شەشىپ العان. سونىمەن قاتار پاتەرىنە بارىپ، تەلەديدارىن، اقشاسىن الىپ كەتتى. جابىرلەنۋشى بالگەرمەن سويلەسكەن كەزدە پسيحولوگيالىق تاۋەلدىلىككە ۇشىراپ، ونىڭ بار ايتقانىن ورىندادىم دەپ وتىر. پوليسيا قىزمەتكەرلەرى جەدەل ىزدەستىرۋ كەزىندە 35 جاستاعى قالا تۇرعىنىن ۇستادى. ودان تەلەديدار تاركىلەندى. ال التىن بۇيىمداردى لومباردقا تاپسىرىپ ۇلگەرگەن. اقشا جۇمسالىپ كەتكەن. ءقازىر وسى وقيعا بويىندا قىلمىستىق كودەكستىڭ «الاياقتىق» بابى بويىنشا ءىس قوزعالىپ، تەرگەۋ ءجۇرىپ جاتىر» ، - دەدى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.

ايتا كەتەيىك، وبلىستىق پوليسيا دەپارتامەنتى ءدال وسى جولمەن الدانعان اقتوبەلىكتەر بولسا №2 استانا اۋداندىق بولىمىنە حابارلاسۋىن سۇرايدى.