قاراعاندى پوليتسەيلەرى مەن ەرىكتىلەر جاسوسپىرىمدەر قىلمىسىنا قارسى كۇش بىرىكتىردى
وسى شارا بارىسىندا ولار تۇنگى ويىن-ساۋىق ورىندارى مەن ويىن كلۋبتارىن اينالىپ ءوتىپ، قۇقىقبۇزۋشىلىق جاساعان مەكەمە يەلەرىن جاۋاپقا تارتتى، دەپ حابارلايدى قازاقپارات ءتىلشىسى.
قازاقستان رەسپۋبليكاسىنىڭ پرەزيدەنتى 2020 -جىلدى ۆولونتەرلار جىلى دەپ جاريالادى. سونىمەن قاتار، ىشكى ىستەر ءمينيسترى بيىلعى جىلدى ۋچاسكەلىك پوليتسيا ينسپەكتورلارى جىلى دەپ جاريالادى.
وسىعان بايلانىستى شاحتينسك ايماعىندا تۇراقتى تۇردە ۋچاسكەلىك پوليتسەيلەر مەن ۆولونتەرلەردىڭ بىرلەسكەن رەيدتىك ءىس-شارالارى وتكىزىلەدى.
9-اقپاندا شاحتينسك قالاسى پ ب يۋۆەنالدى پوليتسيا توبىنىڭ ۋچاسكەلىك ينسپەكتورلارى ۆولونتەرلارمەن بىرلەسىپ كوڭىل كوتەرۋ مەكەمەلەرىنە رەيد جۇرگىزدى. ولاردىڭ باستى ماقساتى كامەلەتكە تولماعاندار جانە ولارعا قاتىستى قىلمىستار مەن قۇقىقبۇزۋشىلىقتاردىڭ الدىن الۋ بولىپ تابىلادى.
وسىنداي ورىنداردىڭ ءبىرىن تەكسەرۋ كەزىندە ءتارتىپ ساقشىلارى 21 جاسقا تولماعان تۇلعالارعا الكوگول ىشىمدىكتەرىن ساتۋ فاكتىسىن انىقتادى.
ايتا كەتۋ كەرەك، پوليتسەيلەر اتالمىش مەكەمەنىڭ قوجايىندارىنا وسىعان دەيىن دە بىرنەشە رەت ەسكەرتۋ جاساعان. كەيبىر تۇنگى كلۋب يەلەرىنە بۇرىن ءتارتىپ بۇزعانى ءۇشىن ايىپپۇل سالىنعانىنا قاراماستان، ەرىكتىلەر مۇندا تاعى دا زاڭبۇزۋشىلىقتاردى انىقتادى.
«اتالعان فاكتى بويىنشا مەكەمە يەسىنە ق ر ا ق ب ك 200 بابى بويىنشا اكىمشىلىك ءىس قوزعالدى جانە ءىس ماتەريالدارى ودان ءارى مامانداندىرىلعان اكىمشىلىك سوتقا الكوگول ءونىمىن ساتۋعا ليتسەنزيا الۋ جانە ونى توقتاتا تۇرۋ ءۇشىن جىبەرىلەدى»، - دەپ حابارلادى قاراعاندى وبلىسى پ د باسپا ءسوز قىزمەتى.
