اعاشقا جان بىتىرگەن سۋرەتشى
بۇل ءار تۋريست سوقپاي كەتپەيتىن كورنەكى ورىنعا اينالعان شەبەرحانا ەكەن. ونىڭ ءىشى دە، سىرتى دا، ەسىك الدىندا ءوسىپ تۇرعان ۇيەڭكى اعاشى دا قۇددى ونەر تۋىندىسىنداي. التى جاستان باستاپ سۋرەت سالعان ءالي ءشامسيدىڭ قىزىعۋشىلىعىنا اتا- اناسى قارسى بولعان. «سەنى اسىرايتىن جۇمىس ىستە، بۇل ساعان تابىس اكەلمەيدى»، - دەگەن ەكەن. ال ءالي جۇرەك قالاۋىن تىڭداپ، بەينەلەۋ ونەرىن تاستاماعان. ونىڭ شەبەرحاناسىنا كەلگەن الەمگە ايگىلى تۇلعالار كوپ ەكەن. دالاي لامانىڭ تابانى تيگەن بۇل ورىندى ءوزى تىنىشتىق ورتاسى دەپ بىلەدى. راسىمەن، شەبەرحاناعا دەيىن جىلاپ كەلگەن كىشكەنتاي ماعجان، كىرگەن بويدا جاسى ساپ تىيىلىپ، ايەل، كوز، انار، مۇحيت بەينەلەنگەن سۋرەتتەرگە تاڭىرقاي قارادى.
«وسى جاسقا دەيىن الەم، ايەل مەن ەر قۇپياسىن، ءازىربايجان سيمۆولى اناردىڭ قاسيەتىن سۋرەتپەن بەينەلەپ كەلەمىن. قازىر اقپارات لەگى وتە كوپ. ءبىز وسكەن داۋىردە ءار مالىمەتتىڭ ءدامىن كورىپ، ءيىسىن سەزە الاتىن ەدىك. ءبىر ەستىگەن اڭگىمەمىزدى ءبىر اپتا قورىتىپ جۇرەتىنبىز. ال بۇگىنگى ۇرپاق اقپارات تەڭىزىنە تاپ بولدى. ءبىر ۋاقىتتا ءبىرشاما جاڭالىقتى ەستي الاسىڭ. مۇمكىندىك كوپ. سول مۇمكىندىكتى دەر كەزىندە قولدانىپ قالماساڭ، ءبىتتى، باسقانىڭ ەنشىسىندە كەتەدى. سىزدەر باقىتتىسىزدار! ماعان جاستاردىڭ قازىر نە ويلايتىنى، نەنى قيالدايتىنى قىزىق. ءارقاشان جاستارمەن جۇرگىم كەلەدى. ءبىراق ولاردى قۋىپ جەتۋ مۇمكىن ەمەس ەكەن. جاي عانا سىرتىنان باقىلاپ، سولار جاساعان الەمدى بەينەلەۋگە تىرىسامىن. سۋرەتشىلەر ۇنەمى مۇحيت ايدىنىندا ءجۇزىپ جۇرەدى. ءبىر كۇنى قاتتى داۋىل تۇرعان كەزدە السىزدەرى، ءوز تالانتىنا سەنىمسىزدەرى اپاتقا ۇشىراپ، جاعاعا شىعىپ قالادى. ال ناعىز تالانت اعىسقا قارسى جۇزەدى. مەن دە جاعاعا شىعىپ قالعىم كەلمەيدى، سول ءۇشىن ءالى كۇنگە دەيىن داۋىلمەن، اعىسپەن كۇرەسىپ كەلەمىن.
«جاسى كەلگەن» سۋرەتشى دەگەن بولمايدى، ونىڭ اقتىق دەمى شىققاندا عانا جاسى كەلەدى. شىنايى سۋرەتشىنى و دۇنيەلىك بولعاندا عانا «ۇلى» دەپ ەسەپتەيدى. وعان دەيىن كوبى ەلەمەۋى مۇمكىن. مۋزا. مۋزا مەن ءۇشىن جوق سەكىلدى. كوبى مۋزانى ءبىر فورما دەپ ويلايدى. ال ماعان ماسشتاب قىزىعىراق، سفەرا بولىپ ەلەستەيدى. بارىنەن بۇرىن ءبىزدى نەگە جاراتتى، كىم جاراتتى دەگەن سۇراقتارمەن كوپ ويلانامىن»، - دەيدى سۋرەتشى. وسى سۇراقتىڭ جاۋابىن تابا الدىڭىز با؟
«ءالى ىزدەپ كەلەمىن». قانداي دا ءبىر بەلگى، يشارا تابا الدىڭىز با؟ «ول - بىزگە بەرىلگەن جارىق. مىسالى، مىنا اعاشپەن (ەسىك الدىنداعى تەرەكتى كورسەتىپ - اۆت. ) 30 جىلدان بەرى تانىسپىن. ال اعاشتىڭ وزىنە 100 جىلداي بوپ قالدى. بۇدان 5 جىل بۇرىن ماعان قانداي دا ءبىر سىرتقى كۇش وسى اعاشقا سۋرەت سالۋعا ۇگىتتەدى. ءقازىر كورىپ تۇرعاندارىڭىزداي، ءۇش ءناسىلدىڭ سۋرەتى بەينەلەنگەن.
باكۋدە وسىنداي 28 اعاش بار: ۇيەڭكى جانە ساعىزقاراعاي. بۇعان دەيىن ءدىڭى قۇرتتاپ، قىستىگۇنى ءۇسىپ قالىپ، اۋىراتىن ەدى. ال قازىر مۇلدەم اۋىرمايدى، ويتكەنى ونىڭ جانى ەمدەلدى. كۇنىنە 500 گە جۋىق ادام كەلىپ، وسى اعاشتى قۇشاقتاپ كەتەدى، بۇعان جان ءبىتتى. ادام قۇشاقتاعان سايىن وعان ەنەرگيا، ماحاببات بەرەدى، بۇل سونىمەن قورەكتەنەدى»، - دەپ، ادام مەن تابيعات اراسىنداعى سەزىمدى كورسەتتى.
جاراتۋشىڭىزبەن العاشقى كەزدەسۋدە نە ايتار ەدىڭىز؟ «ول مەنى قابىلداسا، مىنا قىلقالامدى وزىنە بەرىپ، «مەن دۇرىس ۇستاپ تۇرمىن با؟ « دەپ سۇرار ەدىم. مۇمكىن ول «بالام، وسى جىلعا دەيىن قىلقالامدى قاتە ۇستاپ كەلىپسىڭ، مۇنى تىسپەن نە اياقپەن ۇستاپ سۋرەت سالۋ كەرەك ەدى عوي» دەۋى عاجاپ ەمەس. ويتكەنى سول قالامدى دا ءوزى جاراتتى ەمەس پە؟ ودان ارتىق بۇل قالامنىڭ سىرىن كىم ۇققان؟» ، - دەپ ريتوريكالىق سۇراق قويدى. بۇل سۋرەتشىنىڭ تاعى ءبىر ەرەكشىلىگى، مۇنايمەن دە سۋرەت سالادى ەكەن. قازاقستاندىق جانە ازەربايجاندىق مۇنايمەن سۋرەتتەر سالعان. ءسىز سىرتىنان باقىلاپ جۇرگەن جاستارعا نە ايتاسىز؟
«سىزدەر - گالاكتيكا جاستارىسىزدار. قابىلداپ جاتقان كوپ اقپاراتتى سۇرىپتاپ، پايداعا جاراتىڭىزدار. بۇل سىزدەرگە بەرىلگەن سىناق، كەرەگىڭىزدى مول اقپارات ىشىنەن تابا الساڭىزدار، سىزدەر ۇلى ادامعا اينالاسىزدار. جاڭالىق پەن اقپاراتتىڭ شىڭىنا شىعىپ، ودان وتتەگى باللونىن الىپ، جەڭىسكە جەتىڭىزدەر. ساتتىلىك!»، - دەپ ءتۇيدى تىلەگىن.
Massaget.kz
