ەلوردادا «تەلەفونىم ۇرلاندى» دەپ جالعان ارىز بەرگەن بويجەتكەن جاۋاپقا تارتىلۋدا

نۇر- سۇلتان. قازاقپارات - ەلوردا تۇرعىنى ۇيالى تەلەفونىنىڭ جوعالىپ كەتكەنىن ايتىپ، پوليسياعا نەگىزسىز ارىز جازعان، دەپ حابارلايدى قازاقپارات ءتىلشىسى قالالىق پوليسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

«نۇر- سۇلتان قالاسىنىڭ «سارىارقا» اۋداندىق پولسيا باسقارماسىنا 24 جاستاعى بويجەتكەن شاعىمدانىپ، قالاىشىلىك اۆتوبۋستىڭ ىشىندە 89 مىڭ تەڭگەلىك «Huawei P Smart» ۇيالى تەلەفونىن قالتاسىنان بىرەۋدىڭ جىمقىرىپ كەتكەنىن ايتقان. ءىستىڭ ءمان- جايىن انىقتاۋ كەزىندە پوليسەيلەر بويجەتكەننىڭ سوزىندە شيكىلىك بارىن سەزدى. كۇدىكتىنى انىقتاۋ ءۇشىن پوليسيا قىزمەتكەرلەرى بەينەباقىلاۋ كامەراسى ارقىلى جابىرلەنۋشىنىڭ ءوزى ايتقان اۆتوبۋسقا وتىرماعانىن ءبىلدى» ، - دەپ حابارلايدى قالالىق پوليسيا دەپارتامەنتىنەن.

اقىرى بويجەتكەن پوليسياعا جالعان ارىز بەرگەنىن مويىنداعان. انىعىندا ول دوستارىمەن قىدىرىپ ءجۇرىپ، ۇيالى تەلەفونىن جوعالتىپ العان كورىنەدى. «ارىز جازساڭ تەزىرەك تاۋىپ بەرەدى» دەگەن دوستارىنىڭ اقىلىن تىڭداپ، بويجەتكەن وتىرىك ارىز جازۋدى ءجون دەپ شەشكەن ەكەن.

ەندى ارىز جازۋعا كەلگەن بويجەتكەننىڭ ءوزى ق ر قىلمىستىق كودەكسىنىڭ 419-بابى (كورىنەۋ جالعان ءسوز جەتكىزۋ) بويىنشا قىلمىستىق جاۋاپقا تارتىلۋدا.