بەرىك ءۋالي ق ر پرەزيدەنتى اكىمشىلىگىندەگى قىزمەتكەرلەر سانىنا قاتىستى تۇسىنىكتەمە بەردى

نۇر- سۇلتان. قازاقپارات - قازاقستان رەسپۋبليكاسى پرەزيدەنتى اكىمشىلىگىنىڭ باسپا ءسوز حاتشىسى بەرىك ءۋالي اكىمشىلىكتە ىستەيتىن قىزمەتكەرلەر سانىنا قاتىستى تۇسىنىكتەمە بەردى، دەپ حابارلايدى قازاقپارات.

بۇل تۋرالى بەرىك ءۋالي ءوزىنىڭ Facebook - پاراقشاسىندا جازدى.

«قازاقستان رەسپۋبليكاسى پرەزيدەنت اكىمشىلىگى قىزمەتكەرلەرىنىڭ سانى جايىندا الەۋمەتتىك جەلىلەردە مەملەكەت باسشىسى اپپاراتى قىزمەتكەرلەرىنىڭ سانى 3 مىڭ ادام دەگەن جالعان (فەيك) اقپارات تاراپ جاتىر. شىندىعىندا پرەزيدەنت اكىمشىلىگىندە 408 ادام جۇمىس ىستەيدى. ونىڭ ىشىندە قاۋىپسىزدىك كەڭەسىنىڭ 50 قىزمەتكەرى دە بار. بۇقارالىق اقپارات قۇرالدارى وكىلدەرى مەن الەۋمەتتىك جەلى قولدانۋشىلارىن ناقتى دەرەككە سۇيەنۋگە جانە شىندىققا جاناسپايتىن اقپاراتتى تاراتپاۋعا شاقىرامىز»، - دەپ جازدى باسپا ءسوز حاتشىسى.

سونداي- اق ول جالعان اقپاراتتى قاساقانا تاراتقانداردىڭ جاۋاپقا تارتىلاتىنىن ەسكەرتتى.