قوردايداعى توبەلەس: جانجال پوليتسيا قىزمەتكەرلەرىن جابىلا ۇرۋدان باستالعان - ءماجىلىس دەپۋتاتى

نۇر-سۇلتان. قازاقپارات - ق ر پارلامەنتى ءماجىلىسىنىڭ دەپۋتاتى باقىتبەك سماعۇلوۆ ۇكىمەت كوميسسياسىمەن بىرگە قوردايعا بارىپ، بولعان وقيعانىڭ ءمان- جايى تۋرالى پىكىرىن ءبىلدىردى.

قوردايداعى توبەلەسكە نە تۇرتكى بولدى؟ جۇرتشىلىقتىڭ كوكەيىندەگى باستى ءبىر ساۋال وسى ەدى. «بارلىعى اقساقالدى ۇرعاننان باستالدى» دەگەن بولجام ايتىلعان. شىنىندا قالاي؟ قاريا ادامدى بالالارى اۋرۋحاناعا الىپ، باستى جولمەن كەلە جاتادى. بۇيىردەن دۇڭعان ازاماتتارى مىنگەن كولىك جۇيتكىگەن كۇيى جولعا اتىپ شىعۋعا ۇمتىلادى. ءبىراق جول ءجۇرىسى ەرەجەسىنە سايكەس، ولار باستى جولمەن كەلە جاتقان كولىكتى وتكىزىپ جىبەرۋى كەرەك. ونىڭ ۇستىنە قازاقتار سىرقات كىسىنى دارىگەرگە جەتكىزۋگە اسىعۋلى. وسى جەردە كەرىس تۋادى. سوندا ءبىر نويىس دۇڭعان كولىكتى تەپكىلەپ، ونىڭ مەملەكەتتىك نومىرىنە زاقىم كەلتىرە باستايدى. بۇل زورلىعىنا جانە بۇزاقىلىعىنا شىداماعان قازاق ونى ءبىر ۇرادى. جۇدىرىقتاسۋشىلاردى اجىراتۋ ءۇشىن اراشاعا تۇسكەن اقساقالعا دۇڭعاننىڭ اياعى ءتيىپ كەتەدى، - دەپ جازدى دەپۋتات الەۋمەتتىك جەلىدە.

الەۋمەتتىك جەلىلەردە ايتىلعان «قارت ادامنىڭ توبەسىن بالتامەن ويىپ تاستاپتى» دەگەن دەرەك جالعان جانە داۋدىڭ باسى بۇل جەردەن باستالماعان.

ۇلكەن توبەلەسكە قاتىسقان قازاقتارمەن جانە دۇڭعاندارمەن جان- جاقتى اڭگىمە كەزىندە انىقتاعانىم، كولىك اينالاسىنداعى كيكىلجىڭ تۋرالى كوپشىلىك بىلمەيدى ەكەن. ياعني، الاپات ارپالىسقا بۇل سەرپىن بەرمەگەن. سوندا نە؟ پوليتسيا قىزمەتكەرلەرى شيەلەنىستى باستاعان، اقساقالدى تەپكەن وڭباعاننىڭ قولىنا كىسەن سالىپ، قاماپ تاستايدى. قازىرگى كەزدە ول بۇزاقى تەمىر توردا وتىر. وسىدان كەيىن قۇقىق قورعاۋ قىزمەتكەرلەرى ساقتىق تانىتىپ، كوشەدە كۇدىك تۋدىرعان كولىكتەردى تەكسەرە باستايدى. بۇل - ولاردىڭ مىندەتى. سول كەزدە توقتاتىلعان ماشينالاردىڭ بىرىندە جۇرگىزۋشىسىنىڭ قۇجاتتارى جوق بولىپ شىعادى. ۇيدە قالدىرىپ كەتكەنىن سىلتاۋراتقان. پوليتسەي ىزگىلىك تانىتىپ، باتىستاعىداي بىردەن قولىن قايىرماي، ۇيىنە بىرگە ەرىپ بارۋدى ۇسىنادى. مۇنى ەستىگەن كۇدىكتى بوقتاپ، بالاعاتتاپ، ەسىگىن تارس جاۋىپ، كولىگىمەن قاشادى. قۇقىق قورعاۋ ورگاندارىنىڭ وكىلدەرى سوڭىنان قۋىپ، دۇڭعان اۋىلىنداعى اۋلاعا دەيىن ىندەتىپ كىرەدى. الدىن الا تەلەفونمەن ەسكەرتىپ قويسا كەرەك، ۇيدەن قاشقىننىڭ تۋىسقاندارى، جولداستارى قاپتاپ شىعىپ، پوليتسەيلەرگە جابىلعان. جانە پوليتسيا قىزمەتكەرلەرىن جابىلا ۇرىپ، تەپكىلەپ جاتقانىن وزدەرى ۆيدەوعا ءتۇسىرىپ، ماقتانىش قىلىپ، الەۋمەتتىك جەلىلەرگە سالادى. مىنە، ءدال وسى بەينەجازبانى كورگەن باسقا اۋىلداعى ازاماتتار اشىنىپ: «مىناۋ نە باسىنعانى! قازىر قۇقىق قورعاۋ ورگاندارىنداعى جىگىتتەرىمىزدى ساباپ جاتىر. ەرتەڭ ءبارىمىزدىڭ باسىمىزدى جارا ما؟ بۇل نە دەگەن ماسقارا!» دەپ كوتەرىلگەن، - دەيدى سماعۇلوۆ.

سونىمەن قاتار قىلمىستىڭ ۇلتقا بولىنبەيتىنىن جانە ەلدەگى تۇراقتىلىق ءۇشىن بارلىق ۇلىس پەن ەتنوس مەملەكەت قۇراۋشى قازاق ۇلتىنىڭ اينالاسىندا ۇيىسۋعا ءتيىس ەكەنىن ايتتى.

ارتى نە بولدى؟ جاماندىققا اراندادى. دۇڭعان اۋىلدارى تاراپىنان دا بۇعان ەش ايىبى جوق قاراپايىم جاندار زارداپ شەكتى. ەلدى بىرلىككە، ىنتىماققا شاقىرۋ بىزگە پارىز. تاتۋلاستىرۋعا كۇش سالىپ جاتىرمىز. مۇسىلماننىڭ قانىن مۇسىلمان جۇكتەمەۋى كەرەك. قىلمىستا ۇلت جوق. وسىنى ۇمىتپايىق، اعايىن! سونىمەن بىرگە قازاق ەلىن مەكەندەگەن بارلىق ۇلىس پەن ەتنوس مەملەكەت قۇراۋشى قازاق ۇلتىنىڭ اينالاسىندا ۇيىسۋعا ءتيىس. ەلدەن قاشقاندارى - مۇنى قالامايتىندار دەپ بىلەمىز، - دەپ جازدى دەپۋتات باقىتبەك سماعۇلوۆ.

BAQ. KZ