شىدامىمىز تاۋسىلعان تۇستا عانا شارت كەتەتىنىمىز قانىمىزدا بار قاسيەت - ءاسانالى ءاشىموۆ
«قانداستارىم مەنىڭ، جەرلەستەرىم، باۋىرلارىم، قابىرعام قايىسىپ، ىشتەن كۇيىنىپ وتىرمىن. بۇل - ءوزىمىزدىڭ ەل! توبەلەسقۇمار ەمەس، جۋاس ەل ەدىك. جىگىتتەردىڭ شامىنا تيگەن الدەبىر توپتىڭ جەتەگىندە كەتىپ قالعانى بەلگىلى بولىپ جاتىر. سوندىقتان، ازاماتتارعا، باۋىرلارىما توقتاۋ ايتامىن. ەلدىڭ، جەردىڭ باسىندا وتىرعان حالىق ەمەسپىز بە؟ « - دەدى ول. ا. ءاشىموۆتىڭ ايتۋىنشا، ۇلكەن ەلدەردىڭ، دامىعان مەملەكەتتەردىڭ قاتارىنا قوسىلامىز دەگەن نيەتىمىز بار، تالپىنىپ كەلەمىز. سول جولدا اتقارىلعان قىرۋار شارۋاعا سىز تۇسىرمەگەنىمىز ابزال. «ءبىر قۇمالاق ءبىر قارىن مايدى شىرىتەدى» . جىگىتتەر اقىلعا سالماي، نامىسقا بەرىلىپ كەتكەن بولۋ كەرەك دەپ ويلايمىن. مەن قازاقتىڭ جىگىتتەرىن كىنالامايمىن، شىدامى تاۋسىلعان تۇستا شارت كەتەتىن قاسيەت قانىمىزدا بار. ەجەلگى بابالارىمىز جوڭعارلارمەن سوعىستى، كەشەگى اتالارىمىز فاشيستەرمەن شايقاستى. اكەمىزدى بەردىك سول مايدانعا. ءبىراق ول - باسقا سوعىس ەدى. ال مىناۋ - اۋىل اراسىنداعى توبەلەس. الايدا، رەزونانسى جامان. كورشى ەلدەرگە كۇلكى بولامىز، مازاققا اينالامىز. وسىلاردى ەسكەرۋ كەرەك. قانى قىزىپ العان ادامدار قايدان ەسكەرسىن؟ ! ونى دا ءتۇسىنۋ كەرەك. ءبىراق توقتاتۋ قاجەت قانقىزبالىقتى» ، - دەدى حالىق ءارتىسى.
بەلگىلى تۇلعانىڭ پىكىرىنشە، قوردايداعى توتەنشە وقيعا سالدارىنان قان شىعىپ جاتىر، ءولىم ورىن الىپ جاتىر. ونىڭ كەسىرى تيەتىنىن بىلگەنىمىز دۇرىس. «مەشكەي دەگەن جاقسى ات ەمەس. مىنا جاقتان دۇنگەندەر، مىنا جىقتان ۇيعىرلار شىعادى، ولار دا وڭاي حالىق ەمەس. توبەلەس شىعارىپ جۇرگەن قانى بۇزىلعان بىرەۋلەر بولۋى مۇمكىن. قازاقتاردى كىنالاۋدان اۋلاقپىن، دەگەنمەن اقىماقتارمەن اقىماق بولۋدىڭ ءجونى جوق. بۇل - اقىماقتىق توبەلەس. مۇندايدى قوشتامايمىن» ، - دەگەن ءاسانالى ءاشىم ۇلى بۇل احۋالعا قاتتى ۋايىمداعانىن جەتكىزدى. ءتىپتى، تاڭەرتەڭ بارىپ، حالىققا توقتاۋ ايتسام با ەكەن دەگەن وي العان.
«تۇنىمەن ۇيقىم قاشتى، تىنىشىم بۇزىلدى. مەنىڭ تۋعان جەرىمدە بولىپ جاتقان وقيعا بولعاندىقتان اينالامداعى كەيبىر پيعىلى بولەك جاندار الا كوزىمەن قارايدى. «انا جاقتا باۋىرلارىڭ نە ىستەپ جاتىر؟ « دەگەندەي. جاستار ءبىز سەكىلدى قاريالاردى اياسىن. ودان دا بىلىمگە، عىلىمعا تالپىنسىن. توبەلەستىڭ اتى - توبەلەس، اتى دا جاقسى ەمەس» ، - دەدى ەڭبەك ەرى.
