ۇكىمەت كوميسسياسى قورداي اۋدانىنا كەلدى
قورداي اۋىلىندا ۆيتسە- پرەمەر ارۋحاناعا باردى، توپتاسقان توبەلەس كەزىندە زارداپ شەككەن تۇرعىندارمەن سويلەستى. مەديتسينالىق مەكەمەلەرگە 12 ادام جاتقىزىلدى، 20 ادام باقىلاۋدا جانە ەمحانادان شىعارۋعا ازىرلەنۋدە. 5 پاتسيەنت سانيتاريالىق اۆياتسيا جەلىسى بويىنشا الماتى قالاسىنا، 1 پاتسيەنت تاراز قالاسىنا اۋىستىرىلدى. بارلىعىنا قاجەتتى مەديتسينالىق كومەك تولىق كولەمدە كورسەتىلىپ جاتىر. مەديتسينالىق كومەككە بارلىعى 127 ادام جۇگىندى، ونىڭ ىشىندە 84 ادام تەكسەرۋدەن سوڭ ۇيلەرىنە جىبەرىلدى. اۋدان اقساقالدارىمەن اڭگىمەلەسۋ كەزىندە بەردىبەك ساپاربايەۆ بولعان كيكىلجىڭنىڭ نەگىزگى سەبەپتەرى تۋرالى سۇرادى.
«سەبەبى - تۇرمىستىق كيكىلجىڭ. قازىر جاعداي تۇراقتالدى. بارلىعى زاڭ بويىنشا، قۇقىقتىق سالا اياسىندا بولۋىن سۇرايمىن» ، - دەدى سورتوبە اۋىلىنىڭ تۇرعىنى ارلي مۋساروۆ. ۆيتسە- پرەمەر اۋداندا تۇراقتىلىقتى قامتاماسىز ەتۋ ءۇشىن مەملەكەت باسشىسىنىڭ تاپسىرماسى بويىنشا ۇكىمەت كوميسسياسى ارنايى كەلگەنىن اتاپ ايتتى.
«ءبىز سىزدەردەن، قوعامدا بەدەلى بار اقساقالداردان تۇرعىندارعا ءبىزدىڭ جاعدايدى وبەكتيۆتى تۇرعىدا انىقتاۋ ءۇشىن كەلگەنىمىزدى تۇسىندىرۋلەرىڭىزدى وتىنەمىز. بارلىق زارداپ شەككەندەرگە قاجەتتى مەديتسينالىق جانە باسقا دا كومەك كورسەتىلىپ جاتىر. قازىر باستى ماسەلە - وڭىردەگى تۇراقتىلىقتى قامتاماسىز ەتۋ» ، - دەدى ساپاربايەۆ. قورداي اۋدانىندا ۇكىمەت كوميسسياسى قورداي، ماسانچي، اۋقاتتى، سورتوبە ەلدى مەكەندەرىندەگى قازىرگى جاعدايمەن تانىسىپ، جەرگىلىكتى تۇرعىندارمەن، وقيعا كەزىندە قازا تاپقانداردىڭ وتباسىلارىمەن ءبىرقاتار كەزدەسۋ وتكىزەدى، زارداپ شەككەندەرگە بارادى، تۇرعىن ۇيلەردى، الەۋمەتتىك جانە كوممەرتسيالىق نىسانداردى ارالاپ كورەدى. سونىمەن قاتار جەرگىلىكتى جەردە الەۋمەتتىك- ەكونوميكالىق جانە گۋمانيتارلىق سيپاتتاعى ماسەلەلەردى شەشۋ بويىنشا شۇعىل شارالار قابىلدانادى. وبلىس اكىمدىگىمەن بىرلەسىپ قازا تاپقانداردى جەرلەۋدى ۇيىمداستىرۋ، كەلتىرىلگەن زالالدى باعالاۋ جانە زارداپ شەككەن مەنشىك نىساندارىن قالپىنا كەلتىرۋ بويىنشا كومەك كورسەتىلەدى.
