نۇر- سۇلتاندا قازاق ءتىلىن وقىتاتىن تەگىن كۋرستار باستالدى

نۇر- سۇلتان. قازاقپارات - ەلوردادا قازاق ءتىلىن تەگىن ۇيرەتەتىن كۋرسقا قابىلداۋ باستالدى، دەپ حابارلايدى قازاقپارات.

قالالىق تىلدەردى دامىتۋ جانە ارحيۆ ءىسى باسقارماسى مەن «رۋحانيات» ك م م ۇيىمداستىرعان ءتىل كۋرستارى «ق ر ءتىل تۋرالى» زاڭى جانە ق ر ءتىل ساياساتىن ىسكە اسىرۋدىڭ 2020-2025 -جىلدارعا ارنالعان مەملەكەتتىك باعدارلاماسى نەگىزىندە جۇرگىزىلەدى.

«وتكەن جىلى قالامىزدىڭ 1500-گە تارتا تۇرعىنىن بەس دەڭگەي بويىنشا قازاق تىلىنە ۇيرەتتىك. ولار ءۇشىن قالانىڭ 4 اۋدانىندا وقۋ كابينەتتەرى جۇمىس ىستەدى. كۋرس اپتاسىنا ءۇش رەتتەن جىل سوڭىنا دەيىن جالعاستى. ال، لاتىن گرافيكاسىنا 854 قىزمەتكەر ءوتىنىم ءبىلدىردى. ولاردىڭ اراسىندا مەملەكەتتىك قىزمەتكەرلەر، قورعانىس سالاسى ماماندارى، ب ا ق وكىلدەرى بار. بيىل دا وسى جۇمىستاردى جۇيەلى اتقارامىز»، - دەدى تىلدەردى وقىتۋ جانە ادىستەمەلىك جۇمىستار جونىندەگى ءبولىم باسشىسى گۇلنار كاماشيەۆا.

سونىمەن بىرگە، جۇزدەن استام مەملەكەتتىك قىزمەتكەرگە اعىلشىن ءتىلىن مەڭگەرتۋ جانە 1500 ادامدى لاتىن گرافيكاسىنا ۇيرەتۋ جوسپارلانعان. اتالعان كۋرستى جوعارى ءبىلىمدى ءتىل ماماندارى جۇرگىزەدى.

قالا تۇرعىندارى تومەندە كورسەتىلگەن مەكەن- جايلار بويىنشا قازاق ءتىلى كۋرسىنا جازىلا الادى.

الماتى جانە ەسىل اۋداندارى - قوشقاربايەۆ داڭعىلى، 50 جانە قابانباي باتىر داڭعىلى. 8 (213 - وقۋ كابينەتى)؛

الماتى جانە بايقوڭىر اۋداندارى - م. عابدۋللين كوشەسى 5 . 3-قابات (304 - وقۋ كابينەتى)؛

سارى ارقا، بايقوڭىر اۋداندارى - رەسپۋبليكا داڭعىلى، 42, 3-قابات (7 -وقۋ كابينەتى) .

اۆتور: ايجان سەرىكجان قىزى