قازپوشتا قىتايمەن پوشتالىق الىس- بەرىستى توقتاتقان جوق - كومپانيا

نۇر- سۇلتان. قازاقپارات - «قازپوشتا» اكسيونەرلىك قوعامى قازاقستان مەن قىتاي اراسىنداعى پوشتا بايلانىسىنا قاتىستى تۇسىنىك بەردى، دەپ حابارلايدى قازاقپارات ءتىلشىسى.

«قازاقستان رەسپۋبليكاسى مەن قىتاي حالىق رەسپۋبليكاسى اراسىنداعى پوشتا ايىرباسىنىڭ توقتاتىلۋىنا قاتىستى جاڭالىق ۇلكەن رەزونانس تۋعىزدى. وسى سەبەپتى ءمان- جايدى تۇسىندىرسەك دەيمىز. اتالعان حابارلاما ءبىزدىڭ كليەنتتەرگە قىتايدان كەلەتىن پوشتا تاسىمالىنىڭ كەشىگۋى ىقتيمالدىعىن ەسكەرتۋ ماقساتىندا تاراتىلعان» ، - دەپ حابارلايدى «قازپوشتا» كومپانياسىنىڭ باسپا ءسوز قىزمەتىنەن.

قىتايدىڭ پوشتالىق اكىمشىلىگى قازپوشتا مەن ق ح ر شىڭجاڭ- ۇيعىر اۆتونوميالىق ولكەسى اراسىنداعى ءداستۇرلى اۆتو، اۆيا، تەمىرجول قاتىناسىن رەسمي تۇردە توقتاتپاعان.

«الايدا، ق ح ر شىڭجاڭ- ۇيعىر اۆتونوميالىق ولكەسىنىڭ پوشتاسى جۇمىس تارتىبىندە ءوز تاراپىنان پوشتالىق جونەلتۋلەر قابىلدانبايتىنىن جانە جىبەرىلمەيتىنىن جەتكىزدى. سول سەبەپتى، ايىرباس جۇرگىزىلىپ جاتقان جوق. ايىرباس قالپىنا كەلگەننەن كەيىن بارلىق كليەنتكە ول تۋرالى حابار بەرەمىز» ، - دەلىنگەن حابارلامادا.

سونىمەن قاتار، قازپوشتا پوشتانى قابىلداۋ جانە جونەلتۋ ءىسىن قالىپتى رەجىمدە جالعاستىرۋدا.

«دۇنيەجۇزىلىك دەنساۋلىق ساقتاۋ ۇيىمى قىتايدان حات نەمەسە زات الۋ كەزىندە جاڭا كوروناۆيرۋس جۇقتىرۋ قاۋپى جوق ەكەنىن حابارلاعان ەدى. بۇل تۋرالى د د ۇ Twitter ارقىلى حابارلاما تاراتتى. كەيىنگى زەرتتەۋلەرگە قاراعاندا كوروناۆيرۋس اعزادان تىس تىرشىلىك ەتە المايدى. سول سەبەپتى ونى جۇقتىرۋ قاۋپى جوق» ، - دەپ حابارلادى قازپوشتادان.