ءجۇرسىن ەرمان ايتىس اقىندارىنىڭ رەيتينگى قالاي جاسالاتىنىن ايتىپ بەردى
«ايتىسقا قوماقتى جۇلدە تىگۋ ءۇردىسى 1997 -جىلدىڭ قازان ايىندا باستالدى. وسى ۋاقىتقا دەيىن 300 دەي كولىكتىڭ نە ءوزى، نە قۇنى اقىندارعا بەرىلدى. بەستەن، وننان، وتىزدان كولىك مىنگەن اقىندار بار. ءبىز اركىمگە قول جايىپ، اتقا مىنگەن اكىمنىڭ قايسىسىنىڭ ۇلتتىق ونەرگە جانى اشيدى - سوعان بايلانىستى جۇلدە تاعايىنداپ كەلە جاتقان بولاتىنبىز. ەندىگى جەردە ءبىزدىڭ باسىمىز اۋىرمايتىن بولدى. «Nur Otan» پارتياسى ايتىستى قارجىلاندىرۋدى قامقورلىققا الدى. وتكەن جىلدىڭ قازان ايىندا وتكەن ايتىستى، «التىن دومبىرانى» دا مادەنيەت جانە سپورت مينيسترلىگى قارجىلاندىرىپ وتىر. ونىڭ قۇپيا- سىرى جوق. مىسالى، «التىن دومبىرا» دوداسىنا 30 ميلليون تەڭگە كولەمىندە شىعىن شىقتى. ول تەك جۇلدە عانا ەمەس. اقىنداردىڭ جولپۇلى، جاتىن ورىنى، ىشەتىن تاماعى، ساحنانىڭ بەزەندىرىلۋى - بارىنە اقشا شىعادى»، - دەدى ءجۇرسىن ەرمان.
ونىڭ ايتۋىنشا، قازىلار القاسىنىڭ ەڭبەگى دە وراسان. ولارعا دا 200-300 مىڭ تەڭگە كولەمىندە اقى تولەنەدى.
«جاقىندا ءبىزدىڭ ايتىس اقىندارى مەن جىرشى- تەرمەشىلەر وداعىنىڭ ەلورداداعى فيليالى اشىلىپ، سوعان كىردىك. سول جەردەگى وداقتىڭ بەلسەندى قىزمەتكەرلەرىنىڭ ءبىرى - اقىن ەركەبۇلان قاينازاروۆ. بۇرىن دا «Nur Otan» پارتياسىمەن بىرىگىپ، اقىنداردىڭ جىل بويعى ايتىسقا قاتىسىپ، العان ورىندارىنا بايلانىستى ورىن بەرىلەدى. باس جۇلدە العان اقىنعا 100 ۇپاي، ءبىرىنشى ورىن العانعا 75 ۇپاي، ودان كەيىنگىلەرگە 50 ۇپاي، قاتىسقانى ءۇشىن 5 ۇپاي بەرىلىپ، رەيتينگ تۇزىلەدى. رەيتينگ وسىلاي قالىپتاسادى. ەرتەڭگى اباي بابامىزدىڭ قۇرمەتىنە وراي وتكىزىلگەلى وتىرعان ايتىستىڭ اقىندارى سولاي انىقتالدى. رەيتينگتى سايتىمىز ارقىلى جاريالاپ وتىرامىز»، - دەدى ءجۇرسىن ەرمان.
ءجۇرسىن ەرمان اقىنداردىڭ اراسىندا وتە قۋاتتى جاستار لەگى قوسىلىپ جاتقانىن قوسىپ ءوتتى.
ەسكە سالا كەتسەك، ەرتەڭ ەلوردانىڭ استانا- كونسەرت زالىندا «ادامزاتتىڭ الىبى - حاكىم اباي» رەسپۋبليكالىق ايتىسى ۇيىمداستىرىلادى .
ايتىستىڭ جالپى جۇلدە قورى - 10 ميلليون 400 مىڭ تەڭگە.
