ەلورداداعى توتەنشە جاعداي رەجيمى قاشان الىنادى؟

نۇر-سۇلتان. قازاقپارات – ق ر ءى ءى م توتەنشە جاعدايلار كوميتەتىنىڭ ءتوراعاسى ۆلاديمير بەككەر ەلوردادا توتەنشە جاعداي رەجيمى قاشان الىناتىنىن ايتتى، دەپ حابارلايدى قازاقپارات ءتىلشىسى.

«توتەنشە جاعداي رەجيمى الىنبايدى. سەبەبى، كليماتتىق احۋال بارىنشا كۇردەلى بولىپ تۇر. 4-5- اقپاندا تاعى داۋىل سوعاتىنى ەسكەرتىلدى. قازگيدرومەت مالىمەتتەرىنە سەنسەك، بۇگىن تاڭەرتەڭ ەلىمىزدىڭ 13 وڭىرىندە داۋىل سوعادى. پاۆلودار، الماتى، ماڭعىستاۋ وبلىستارىندا جانە الماتى مەن شىمكەنت قالالارىندا دا ەسكەرتۋ بولعان جوق»، - دەدى ۆلاديمير بەككەر ۇكىمەت وتىرىسىنان كەيىن ب ا ق وكىلدىرىنە بەرگەن سۇحباتىندا.

ونىڭ دەرەگىنشە، بۇگىن تاڭەرتەڭگى 8 گە دەيىن اۆتوموبيل جولدارىنىڭ 23 ۋچاسكەسى، ونىڭ ىشىندە رەسپۋبليكالىق ماڭىزى بار 13 ۋچاسكە جابىق بولدى.

«قازىر رەسپۋبليكالىق ماڭىزى بار ۋچاسكەلەردىڭ بارلىعى اشىق. ءبىراق، قازگيدرومەت دەرەكتەرىنە سايكەس، تاياۋ اپتاداعى اۋا رايى بولجامى كوڭىل كونشىتەرلىك ەمەس. تەمپەراتۋرا كوتەرىلىپ كەلەدى. سوعان وراي بوران سوعۋ قاۋپى بار. باتىس قازاقستان مەن اقتوبە وبلىستارىندا جاڭبىر جاۋدى. دەمەك جولدا كوكتايعاق بولادى دەگەن ءسوز»، - دەدى كوميتەت باسشىسى.

ۆ. بەككەر جول جانە توتەنشە جاعدايلار قىزمەتتەرى كۇشەيتىلگەن رەجىمدە جۇمىس ىستەپ جاتقانىن ايتتى.

«رەسپۋبليكالىق داعدارىس ورتالىعىندا ۇيىمداستىرىلعان شتابتى دا الىپ تاستامادىق. ول دا جۇمىسىن جالعاستىرادى. سول سەبەپتى نۇر- سۇلتان قالاسىندا دا توتەنشە جاعداي رەجىمىالىنعان جوق. كوشەلەردە ءالى دە بولسا مول قار جاتقانىن، اۋلالار ءالى تازالانباعانىن بايقاپ ءجۇرمىز. بەيسەنبى، جەكسەندى جانە دۇيسەنبى كۇندەرى قار جاۋادى بەپ كۇتىپ وتىرمىز. ياعني، جاعداي ودان ارى كۇردەلەنە ءتۇسۋى مۇمكىن»، - دەدى ول.