بۇيرەك قابىنباس ءۇشىن نە ىستەۋ كەرەك؟
بۇيرەك - ادام اعزاسىندا سونداي كونبىس، قىڭق ەتپەيتىن مۇشە. ءبىراق اۋرۋعا شىداپ ءجۇرىپ، ءبىر كۇنى ىسكە جاراماي قالادى. بىردەن ىستەن شىعادى. وندا ونى اۋىستىرۋدان باسقا امال جوق، وكىنىشكە وراي. - بۇيرەكتە جۇيكە تامىرلارى جوق، تەك قان تامىرلارىنان عانا تۇرادى. ءبىر قىزىعى بۇيرەك ءزاردى ىشكەن سۋدان ەمەس، قاندى تازارتۋ ارقىلى ءوندىرىپ شىعارادى، - دەيدى بەلگىلى نەفرولوگ باعدات سۇلتانوۆا. سونىمەن بۇيرەكتى مۇنداي قابىنۋ مەن اسقىنۋعا جەتكىزبەس ءۇشىن نە ىستەۋ كەرەك؟
مامانداردىڭ ايتۋىنشا، بۇيرەكتى امان، اۋرۋدان ادا ۇستاۋ ءۇشىن كوپ نارسە جاساپ قاجەت ەمەس. ەڭ الدىمەن، بۇيرەكتى سۋىقتاپ قالۋدان ساقتاۋ قاجەت. ەڭ قىزىعى بۇيرەككە قاتتى سۋىقتىڭ دا، ىستىقتىڭ دا زيانى بار. اسىرەسە، كۇز بەن كوكتەم ايلارىندا بۇيرەك پەن اياقتى جىلى ۇستاۋعا تىرىسقان ابزال. بۇيرەك اۋرۋلارىنان قاشۋدىڭ ەكىنشى جولى - دۇرىس تاماقتانۋ. اشتى، تۇزدى، قۋىرىلعان تاعامداردى از تۇتىنعان ءجون. ىشىمدىكتەن دە باس تارتىڭىز. ونىڭ قۇرامىنداعى زياندى زاتتاردى تازالايمىن دەپ بۇيرەك بوسقا «وتىرادى». بۇيرەككە ءسابىز، جاڭعاق، شەكىلدەۋىك، اسكوك (ۋكروپ) پەن اسجەلەڭنىڭ (پەترۋشكا) پايداسى كوپ. بۇلاردا ماگني ەلەمەنتى مول. ودان باسقا، قىزىلشا، قيار، اسقاباق، ورامجاپىراق سىندى كوكونىستەر مەن الما، ورىك سىندى جەمىستەردىڭ، سۇلى مەن قاراقۇمىق سىندى ءداندى- داقىلداردىڭ پايداسى زور.
ال قاربىز، قاۋىن سىندى داقىلدار بۇيرەكتى تازالاۋعا، جينالىپ قالعان تۇز بەن تاستى شايۋعا كومەكتەسەدى. بۇيرەكتىڭ قالىپتى جۇمىس جاساۋى ءۇشىن ادام كۇنىنە، كەم دەگەندە، 2 ليتر تازا سۋ ءىشۋى كەرەك. كومپوت، كوك شاي، سوك، يتمۇرىننىڭ قايتاتپاسىن ىشكەن دە دۇرىس. ءبىراق گازدالعان سۋسىنداردىڭ قاجەتى جوق. دارىگەرلەر مينەرالدى سۋدى دا ازداپ ىشكەن ءجون سانايدى. ويتكەنى مۇنداي سۋدا تۇز كوپ بولادى. ودان دا كراننان قۇيىلعان سۋدى قايناتىپ ىشكەن جاقسى، ونداي سۋدا تۇزدىڭ راتسيونى تەڭدەي كەلەدى. قۋىرىلعان، كەپتىرىلگەن، ءجيى تۇزدالعان تاعامداردان باس تارتقان ابزال. فاستفۋد، قىتىرلاق، چيپسىنى مۇلدەم جەمەگەن جاقسى. وسىنداي قاراپايىم قاعيدالاردى ورىنداۋ ارقىلى وسىناۋ ەرەكشە مۇشەنى امان الىپ قالا الامىز.
Massaget.kz
