قىتايدىڭ قور نارىعىنداعى باعا قۇلدىرادى
Shanghai Composite 9% عا تومەندەدى. شەنچجەندەگى كومپونەنتتەر يندەكسى دە بىردەن %9 عا قۇلادى. كورسەتكىشتەر، كەم دەگەندە، %7 عا تومەندەدى.
شاڭحاي مەن شەنچجەندەگى قور بيرجالارى 24- قاڭتاردان باستاپ قىتايدىڭ جاڭا جىلىن تويلاۋ كەزىندە جابىلعان بولاتىن. وسى كەزدە جاريا ەتىلگەن مالىمەتكە سايكەس 14300 ادام ينفەكتسيا اۋرۋ جۇقتىردى، ولاردىڭ كوپشىلىگى قىتايدا تۇرادى.
بيرجا اشىلار كەزدە قىتاي تۇراقتىلىقتى ساقتاپ قالۋ ءۇشىن نارىعىنا ميللياردتاعان اقشا قۇياتىنىن جەتكىزدى. جەكسەنبى كۇنى قىتاي ۇلتتىق بانكى بانكتەردىڭ نەسيە بەرۋگە قابىلەتتىلىگىن نىعايتۋ ءۇشىن قىسقامەرزىمدى وبليگاتسيانى ساتىپ الۋ قاعيداتىن پايدالانىپ، قىتاي نارىعىنا 1,2 تريلليون يۋان (173 ميلليارد دوللار) باعىتتايتىنىن جەتكىزدى. بۇل شارا بانك جۇيەسىندەگى «جوعارى وتىمدىلىكتى» جانە ۆاليۋتا نارىعىنىڭ تۇراقتىلىعىن باقىلاۋعا كومەكتەسەدى.
نارىققا باعىتتالعان وتىمدىلىكتىڭ ناقتى مولشەرى ودان تومەنىرەك بولادى. Reuters دۇيسەنبى كۇنى ورتالىق بانك مالىمەتتەرىن نەگىزگە الىپ، باسقا قىسقامەرزىمدى وبليگاتسيالىق كەلىسىمدەردى وتەۋ مەرزىمى 1 تريلليون يۋاننان اساتىنىن ايتتى. بۇل اقشا اينالىمىنىڭ تازا سوماسى 150 ميلليارد يۋانعا (22 ميلليارد دوللار) تومەندەگەنىن كورسەتەدى.
ورتالىق بانك باسشىسىنىڭ ورىنباسارى پان گۋنشەن، جاعدايدى تۇراقتى ۇستاپ تۇرۋعا قانداي شارالار قاجەت ەكەندىگىن انىقتاۋ ءۇشىن ورتالىق بانك قارجى مەكەمەلەرى جانە نارىقتارمەن بايلانىستا بولاتىنىن جەتكىزدى.
قىتايدىڭ قارجى رەتتەۋشىسى قارجىلىق تۇراقتىلىقتى ساقتاپ قالۋ مەن ەكونوميكاعا كومەك كورسەتۋ ءۇشىن باسقا دا ون شاقتى شارانى اتاپ ءوتتى. رەتتەۋشى قارجىلىق قىزمەتتەردى جەكە تۇلعالار مەن كومپانيالارعا كوبىرەك ۇسىناتىنىن مالىمدەدى.
ازيانىڭ باسقا ەلدەرىندەگى بيرجالار دۇيسەنبى كۇنى باعا قۇلدىراۋىمەن اشىلدى. جاپونيالىق Nikkei 225 (N225) 1,5%- عا قۇلادى. ايتا كەتەرلىگى، ەلدە كوروناۆيرۋس جۇقتىرعان 20 ادام تىركەلگەن.
وڭتۇستىك كورەيالىق Kospi 1,6%- عا تومەندەدى. بۇل ەلدە جاڭا كوروناۆيرۋس جۇقتىرعاندار سانى 15 كە جەتتى.
