ديماش قۇدايبەرگەننىڭ فان-كلۋبى نيۋ-يوركتە ءۇش جىلدىعىن اتاپ ءوتتى
مانحەتتەننىڭ تۋرا ورتالىعىندا قازاقستاننىڭ تۋى جەلبىرەپ، ۇلى دالانىڭ اۋەندەرى شىرقالدى. الەمگە ايگىلى ءانشىنىڭ امەريكالىق جانكۇيەرلەرى ءوز كۋميرى مەن ونىڭ وتانىنىڭ قۇرمەتىنە توسىن سىيدى ءتاتتى ءدام تۇرىندە دايىنداپتى. اتاۋلى كۇنگە وراي جاپوندىق نوريكو برۋنەل حوش ءيىستى ءارى ءتۇرلى-ءتۇستى كەكستەردى پىسىرگەن ەكەن. كەكستە قازاقتىڭ ويۋ-ورنەكتەرى مەن ديماش قۇدايبەرگەننىڭ بەينەسى تۇر. نيۋ-يوركتەگى ءومىرىنىڭ 30 جىلىندا جاپوندىق باسقا قۇرلىقتىڭ مادەنيەتىنە ءدال وسىلاي تۇڭعىش رەت ەرەكشە اۋەستەنگەنىن ايتادى. وسىلايشا، فان-كلۋب وكىلدەرى جۇلدىزدى وتانداسىمىزعا ريزاشىلىقتارى مەن قۇرمەتتەرىن بىلدىرۋگە بارىن سالعان.
«بىردە Facebook قولدانۋشىلارىنىڭ ءبىرى ديماشتىڭ ورىنداۋىنداعى S. O. S ءانىن ءوز پاراقشاسىندا جاريالادى. ديماشتىڭ داۋسىن تىڭداعان ساتتەن-اق مەن تاڭ-تاماشا قالدىم. جۇبايىم فرانسۋز بولعاندىقتان، وسى ءاندى سوعان تىڭداتىپ كورسەتتىم. ءاندى تىڭداپ وتىرىپ، ديماشقا عاشىق بولىپ قالعانداي سەزىمدە بولدىم. ءبىز، ديماش قۇدايبەرگەننىڭ حالىقارالىق فان-كلۋبىنىڭ، DKIFC- ءتىڭ جانە «Dimash USA» فان- كلۋبىنىڭ مۇشەسىمىز. ديماش وسىندا ۇشىپ كەلگەندە، ءبىز ونى بارىنشا قولداۋعا، نيۋ-يورك حالقىنا ونى كوبىرەك تانىتۋعا قاتتى تىرىسامىز»، - دەدى ا ق ش- تاعى فان-كلۋب مۇشەسى نوريكو برۋنەل.
ءۇش جىل بۇرىن ا ق ش- تا ديماش قۇدايبەرگەننىڭ جانكۇيەرلەرىنىڭ كلۋبىن قۇرعان امەريكالىقتار قازاقستانعا مىندەتتى تۇردە كەلۋ تۋرالى شەشىم قابىلداپتى. كوبى نۇر-سۇلتان مەن الماتىدا بولىپ ۇلگەرگەن. ولاردىڭ اراسىندا وڭتۇستىك افريكادا دۇنيەگە كەلگەن تانيا يانگ تا بار. ول قازىر ءبىرشاما جىلدان بەرى نيۋ-يوركتە تۇرادى.
«سىزدەردىڭ استانالارىڭىز - نۇر-سۇلتان مەن ءۇشىن ەرەكشە جانە فۋتۋريستىك ورىنعا اينالدى. ءوزىنىڭ ساۋلەتىمەن، تازالىعىمەن، كەڭدىگىمەن ەرەكشەلەنەدى ەكەن. مەن ديماشتىڭ قازاقستاندا وسىنداي كونديتەرلىك ونىمدەرمەن شاي ىشكەندى ۇناتاتىنىن جاقسى بىلەمىن. بۇل - شاي ءىشۋدىڭ وزىندىك مادەنيەتى. سوندىقتان ءبىز ديماشتىڭ شاي ءىشۋ ءداستۇرىن قولداي وتىرىپ، ءوزىم ازىرلەگەن ءتاتتى-ءدامدىنى نوريكونىڭ دايىنداعان كەكسىنە قوسىپ قويدىم. ديماشتىڭ اندەرىنىڭ ىشىندە ماعان ەڭ ۇنايتىنى - «ۇمىتىلماس كۇن»، ال ورىسشا اندەرىنەن - «ليۋبوۆ، پوحوجايا نا سون». ارينە، مەن «دايديداۋدى» دا ءسۇيىپ تىڭدايمىن»، - دەدى نيۋ-يورك تۇرعىنى تانيا يانگ.
امەريكالىق چەلسي ديموند 2018-جىلدىڭ ناۋرىزىنان بەرى فان-كلۋبتىڭ مۇشەسى. سودان بەرى ول ديماشتىڭ اندەرىن ورىنداپ، قازاق ءتىلىن ۇيرەنە باستاعان.
«2018-جىلدىڭ ناۋرىز ايىندا Youtube كانالدان ءبىر كورىپ قالدىق تا، سول ساتتەن باستاپ ديماشتىڭ جانكۇيەرىنە اينالدىق. ول مەن ءۇشىن بەيتانىس قازاقستاندى اشتى. قازاقستان جايلى بۇرىن ەشتەڭە بىلمەيتىن ەدىم. ەندى مەن وسى ەلگە عاشىق بولىپ قالدىم! ماحاببات بەر ماعان، تاعدىر، جۇرەكتى قوزعاعان. جانىمدى جالىنعا وراپ، ۇزىلمەي مازداعان. ماحاببات بەر ماعان، تاعدىر، ماحاببات بەر ماعان. ەشقاشان، ەشكىمدە، ەش كەز بولماعان»، - دەپ اندەتىپ كەتتى چەلسي ديموند ءسوزىنىڭ سوڭىندا.
مۋزىكالىق الەمنىڭ بۇكىل قىر-سىرى ءبىر ديماشتىڭ بويىنان ايقىن كورىنەدى دەپ ەسەپتەيدى گونكونگتىق ەمي تسەي. ول نيۋ-يوركتە تۋىپ، جۇرەگىن قازاق ءانشىسى جاۋلاپ الاتىنى ءۇش ۇيىقتاسا تۇسىنە كىرمەپتى.
«مەن قاتتى اسەرلەندىم. ونىڭ ونەرىن باقىلاي وتىرىپ، بەلەستەردى ءبىر-بىرلەپ قالاي باعىندىرعانىنىڭ كۋاسى بولدىم. شىنىندا دا، ويلاپ قاراساڭىز، از ۋاقىتتىڭ ىشىندە وسىنشاما بيىككە كوتەرىلگەن انشىلەر نەكەن-ساياق. البەتتە، بيتلز توبى ءوز تۇسىندا كەرەمەت بولدى. ءبىراق، ءبىزدىڭ ديماش ءوز قارقىنىنان تايماسا جۋىق ارادا ولاردىڭ دەڭگەيىنە دە جەتەدى»، - دەيدى ەمي تسەي.
امەريكالىق جانكۇيەرلەردىڭ تاعى ءبىرى برۋكليندىك دەننيس ديماشقا ۇقسايتىن، ءتىپتى ونىڭ جانىنا جاقىنداي الاتىن انشىلەر الەمدە كەمدە-كەم ەكەنىن ايتادى.
امەريكاداعى فان-كلۋب مۇشەلەرى وسىلايشا ءوز اسەرىمەن ءبولىسىپ، كۋميرلەرىن اسىعا كۇتىپ ءجۇر.
