شۆەتسيادا كوروناۆيرۋس جۇقتىرۋدىڭ العاشقى جاعدايى تىركەلدى

ستوكگولم. قازاقپارات - شۆەتسيادا كوروناۆيرۋس جۇقتىرۋدىڭ العاشقى جاعدايى تىركەلدى. شۆەتسيا مەملەكەتتىك دەنساۋلىق ساقتاۋ باسقارماسىنىڭ مالىمەتىنە سايكەس، يە نچە پينگ قالاسىنىڭ اۋرۋحاناسىندا ۆيرۋستى جۇقتىرۋ فاكتىسى رەسمي تۇردە راستالدى، دەپ حابارلايدى «قازاقپارات» ح ا ا مەنشىكتى ءتىلشىسى.

ناۋقاس ايەل ۆيرۋس ورشىگەن قىتايدىڭ ۋحان قالاسىندا ساپارمەن بولعان. ول ۇيىنە 24 - قاڭتار كۇنى ورالعان. جوتەل مازالاعان. شۆەتسيا مەملەكەتتىك دەنساۋلىق ساقتاۋ باسقارماسىنىڭ اقپاراتىنشا، ونىڭ سىرقاتى اۋىر ەمەس. «شۆەدتەر كوپ ساياحاتتايتىنىن ەسكەرسەك، بۇل، ءبىز ءۇشىن كۇتپەگەن جاعداي ەمەس. ءبىز جاعدايدى باقىلاپ وتىردىق جانە مۇندايدىڭ بولارىن بولجادىق. وسىنداي جاعدايلار ءبىرقاتار وزگە دە مەملەكەتتە انىقتالدى» ، - دەپ تۇسىنىك بەردى دەپارتامەنت باسشىسى كارين تەگمارك ۆيزەلل.

ونىڭ ايتۋىنشا، «باسقا ەلدەردىڭ تاجىريبەسىنە سۇيەنە وتىرىپ، قازىرگى ۋاقىتتا ينفەكسيانىڭ تارالۋ قاۋپى وتە تومەن» . شۆەتسيا جاڭا كوروناۆيرۋس انىقتالعان سولتۇستىك ەۋروپاداعى ەكىنشى مەملەكەت. ءبىرىنشى جاعداي فينليانديادا تىركەلگەن بولاتىن. فيندىك قوعام دەنساۋلىعىن ساقتاۋ ينستيتۋتى سارسەنبى كۇنى روۆانيەميدەگى قىتايلىق تۋريستە ۆيرۋس انىقتالعانىن رەسمي راستادى.