ەلوردا اۋەجايىندا قىتايدان كەلەتىن ۇشاقتار ءۇشىن بولەك تۇراق ءبولىندى
«6 - قاڭتار كۇنگى باس سانيتار دارىگەردىڭ قاۋلىسى بويىنشا بارلىق سانيتارلىق- كارانتيندىك باقىلاۋ ءبولىمى كۇشەيتىلگەن رەجيمدە جۇمىس ىستەۋدە. 26 - قاڭتاردان باستاپ اۋەجايدىڭ مەديتسينالىق قىزمەتكەرلەرى دە بورتقا شىعىپ، جولاۋشىلاردا دەنە قىزۋى بار- جوعىن انىقتايدى. ق ح ر- دان كەلەتىن ۇشاقتار ءۇشىن ارنايى 17 تۇراق ءبولىندى» ، - دەيدى كولىكتەگى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى اۋە كولىگىندەگى سانيتارلىق- كارانتيندىك باقىلاۋ ءبولىمىنىڭ باسشىسى داريا اسەمبايەۆا.
ول ق ح ر- دان كەلگەن جولاۋشىلاردى تەكسەرۋ بارىسىندا 15 ادام اۋرۋحاناعا جاتقىزىلعانىن ايتتى.
«ونىڭ ءبىرى بەيجىڭنەن بولعان. بەسەۋى - ۇرىمجىدەن، بەسەۋى - شياننان جانە ەكەۋى - سانياننان كەلگەن. قازىرگى كەزدە ولاردىڭ جاعدايى جاقسى. ەشقايسىسىنان كوروناۆيرۋس تابىلعان جوق. ءبىز اۋە كومپانيالارىنا حات جولداپ، 3 تىلدە انكەتا دايىندادىق. جولاۋشىلاردىڭ ءتىزىمىن اۋماقتىق دەپارتامەنتتەرگە جىبەرىپ، ول جاقتا تەكسەرۋ جۇمىستارى جۇرگىزىلىپ جاتىر. ءبىز تەك ق ح ر- دان كەلەتىن جولاۋشىلاردى تەكسەرەتىن 3 باقىلاۋ پۋنكتىن قويدىق» ، - دەيدى ول.
سونداي- اق، ول وقشاۋلاۋ بولمەسىن كەڭەيتۋ ءىسى قولعا الىنعانىن ايتتى.
«مينيستر بەرگەن تاپسىرما بويىنشا بارلىق حالىقارالىق اۋەجاي باسشىلارىنا حات جولدادىق. ول جەردە وقشاۋلاۋ ءبولىمى بولۋى كەرەكتىگىن، بارلىق قىزمەتكەرلەردى ءبىر رەتتىك ماسكامەن قامتاماسىز ەتۋ كەرەكتىگىن ايتتىق» ، - دەيدى ول.
