ايتىسكەرلەر كەڭسەسى اشىلدى

نۇر- سۇلتان. قازاقپارات - نۇر- سۇلتاندا «ايتىس اقىندارى مەن جىرشى، تەرمەشىلەردىڭ حالىقارالىق وداعى» رەسپۋبليكالىق قوعامدىق بىرلەستىگىنىڭ قالالىق فيليالىنىڭ سالتاناتتى اشىلۋ ءراسىمى ءوتتى.

بۇدان بىلاي باس قالانىڭ ءسوز زەرگەرلەرى سول جاق جاعالاۋداعى جازۋشىلار ءۇيى عيماراتىندا الداعى جوسپارلارىن تالقىلاپ، دايىندىق وتكىزە الادى. ايتىسكەرلەرگە ارنالعان فيليال Nur Otan پارتياسى مەن نۇر- سۇلتان قالاسى اكىمدىگىنىڭ قولداۋىمەن اشىلىپ وتىر. ايتۋلى جيىنعا مادەنيەت قايراتكەرى، اقىن ءجۇرسىن ەرمان مەن ەلىمىزگە تانىمال ايتىسكەرلەر، زيالى قاۋىم جانە Nur Otan پارتياسىنىڭ وكىلدەرى قاتىستى.

ايتىس - قازاق ەلىنىڭ باعزىدان بەرگى كونەرمەس مۇراسى. حالقىمىز ءۇشىن عانا ەمەس، ادامزات ءۇشىن دە باعالى ونەر. وعان دالەل - ەجەلگى ريمدە ماتەماتيكالىق ايتىس ءتۇرىنىڭ بولعانى. جارتى عاسىرعا جۋىق ايتىس ونەرىن دارىپتەۋدە ەڭبەگى سىڭگەن، بۇگىندە جۇرتشىلىق «ايتىسكەرلەر اتاسى» دەپ قۇرمەتتەيتىن ءجۇرسىن ەرمان سالتاناتتى راسىمدە فيليالدىڭ ماڭىزىنا توقتالدى.

- قازاق بار جەردە دومبىرا دا بار، ءسوز جۇيرىگىن سىنعا سالار ايتىس تا بار. ايتىسكەرلەر فيليالى وسى ۋاقىتقا دەيىن الماتى مەن كەي وڭىرلەردە اشىلعان بولاتىن. سول يگى ءىستىڭ جالعاسى باس قالامىز - نۇر- سۇلتاندا جالعاسىن تاۋىپ وتىر. ايتىس ادامدارى دا كوپ حالىقتىڭ ءبىرى. كەيدە القالى اڭگىمە قۇرىپ، بىرگە دايىندالىپ، وي بولىسكىسى كەپ تۇرادى. وسىنداي ساتتەردە فيليال عيماراتىنا ەش قىمتىرىلماي جينالىپ، دايىندىقتارىن پىسىقتاۋعا مول مۇمكىندىك تۋدى. ساۋاپتى ىسكە ۇلەسىن قوسىپ، قولداۋ ءبىلدىرىپ جاتقان Nur Otan پارتياسى مەن قالالىق اكىمشىلىككە العىسىمىز شەكسىز. قالانىڭ مادەني ورداسىن، ادەبي ورتالىعىن قالىپتاستىرۋعا جاساعان ۇلكەن قادام، - دەيدى اقىن.

بيىل ۇلتىنىڭ عانا ەمەس، ادامزاتتىڭ ۇلى تۇلعاسى سانالعان ويشىل، اقىن اباي قۇنانباي ۇلىنىڭ 175 جىلدىق مەرەيتويى وتەدى. وسىعان وراي، حاكىمنىڭ قۇرمەتىنە ءار وڭىردە رەسپۋبليكالىق ايتىستار ۇيىمداستىرىلادى. ادامزاتتىڭ ەكىنشى ۇستازى اتالعان ءابۋ ناسىر ءال- فارابيدىڭ 1150 جىلدىعىنا دا ايتىستار وتكىزۋ جوسپارلانعان. ەلباسى ن. نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىنىڭ اياسىندا وتەتىن بۇل ايتىس جوسپارلارى جايلى Nur Otan پارتياسى ساياسي جۇمىس دەپارتامەنتىنىڭ ديرەكتورى ەرلان قارابالايەۆ مالىمدەدى.

سالتاناتتى راسىمنەن سوڭ ءجۇرسىن ەرمان باستاعان ايتىسكەرلەر مەن لاۋازىمدى تۇلعالار الداعى ۋاقىتتا وتكىزىلەتىن حالىقارالىق، رەسپۋبليكالىق ايتىستاردىڭ جوسپارىن تالقىلادى.

ماديار تولەۋ

«ايقىن» گازەتى