كوكشەتاۋدا ابايعا ارنالعان ادەبي ورتالىق اشىلدى
ادەبي ورتالىق كوكشەتاۋ قالالىق كىتاپحاناسىنان ورىن تەۋىپ وتىر. بۇل شىعارماشىلىق يدەيانىڭ جۇزەگە اسۋىنا كوكشەتاۋ قالالىق مادەنيەت جانە تىلدەردى دامىتۋ ءبولىمى قولداۋ بىلدىرگەن.
ءبولىم باسشىسى ايگۇل ءسابيتوۆانىڭ ايتۋىنشا، ادەبي ورتالىق جاستاردىڭ ابايدىڭ شىعارماشىلىعىن زەرتتەپ، ناسيحاتتاۋىنا سەپتىگىن تيگىزبەك.
شارا ابايدىڭ «مەن ءبىر جۇمباق اداممىن» ولەڭىمەن باستالدى. ونى اقىن مۇحامەد قونقايەۆ مانەرلەپ وقىپ بەردى.
«ورتالىقتاعى كىتاپ كورمەسى 3 بولىمىنەن تۇرادى. ءبىرىنشى ءبولىم «ابايدىڭ دۇنيەتانىمى» دەپ اتالادى. وندا ابايدىڭ بالالىق شاعىنداعى ادەبي كىتاپتار مەن ۇلى عالىمداردىڭ ۇلى سوزدەرىن وقۋعا بولادى.
ال ەكىنشى ءبولىمى «جۇرەگىمنىڭ تۇبىنە تەرەڭ بويلا» دەپ اتالادى. ياعني، ابايدىڭ شىعارمالارى مەن شەشەندىك سوزدەرىنە ارنالعان.
ءۇشىنشى - «اباي مۇراسى ماڭگىلىك» بولىمىندە ابايتانۋشىلار مەن زەرتتەۋشىلەردىڭ اقىن تۋرالى جازعان شىعارمالارىمەن جانە ەڭبەكتەرىمەن تانىسۋعا بولادى» ، - دەيدى ايگۇل ءسابيتوۆا.
ورتالىقتىڭ اشىلۋىنا جەرگىلىكتى زيالى قاۋىم جانە قوعام قايراتكەرلەرى، كوكشەتاۋداعى جوعارى وقۋ ورىندارىنىڭ وقىتۋشىلارى مەن ابايتانۋشىلار قاتىستى.
شارا جاس اقىنداردىڭ اباي شىعارمالارىن مانەرلەپ وقۋىمەن اياقتالدى.
