ۇلتتىق ۇلان ساربازدارى كاسىبي مەرەكەسىن اتاپ ءوتتى

ايتا كەتەيىك، وسىدان 28 جىل بۇرىن 1992 -جىلدىڭ 10-قاڭتارىندا قازاقستان رەسپۋبليكاسى ءى ءى م ىشكى اسكەرلەرى قۇرىلدى، ال 2014 -جىلدىڭ 21-ساۋىرىندە ولار ۇلتتىق ۇلان بولىپ قايتا قۇرىلدى. 2015 -جىلدىڭ 10-قاڭتارىندا «ق ر ۇلتتىق ۇلانى تۋرالى» زاڭعا قول قويىلدى.

وسى داتاعا وراي باس قولباسشىلىقتا وتكەن سالتاناتتى شارادا گەنەرال-لەيتەنانت رۋسلان جاقسىلىقوۆ ارداگەرلەر مەن اسكەري قىزمەتشىلەردى اسكەردىڭ 28 جىلدىعىمەن قۇتتىقتادى. شارا بارىسىندا جاۋىنگەرلىك مىندەتىن ادال ورىنداپ، ۇلگىلى قىزمەتىمەن ەرەكشەلەنگەن ءبىرقاتار اسكەري قىزمەتشى ءىىم جانە باس قولباسشى بۇيرىعىمەن ماراپاتتالدى.

سونداي-اق، قۇقىقتىق ءتارتىپ اسكەرىنىڭ ءتول مەرەكەسىنە وراي «قازاقستان» ورتالىق كونسەرت زالىندا ۇلتتىق ۇلان ءان-بي انسامبىلىنىڭ گالا-كونسەرتىن ۇيىمداستىرۋ داستۇرگە اينالدى.

بۇگىنگى تاڭدا انسامبل مۋزىكانتتارى مەن سوليستەرىنىڭ ورىنداۋىنداعى اسكەري - پاتريوتتىق اندەر ەلىمىزدەگى بارلىق ماڭىزدى شارالاردىڭ كەلبەتى بولا ءبىلدى. اسكەري تاقىرىپقا بايلانىستى بىردە- ءبىر كونسەرت ۇلاندىق ونەرپازداردىڭ قاتىسۋىنسىز وتپەيدى. ۇلتتىق ۇلان ءان-بي ءانسامبلى مەملەكەتىمىزدىڭ ورتالىق زالدارىندا گالا- كونسەرت بەرەتىن بىرەگەي اسكەري- مۋزىكالىق ۇجىم.

بيىل مۋزىكانتتار: «ماڭگىلىك ەل - مۇراتىمىز!» ۇرانىمەن وسىمەن ون ەكىنشى رەت جاندى داۋىستارىمەن ءوز كورەرمەندەرىن قۋانتتى.

ايتىپ ءوتۋ كەرەك، بۇگىن ۇلاندىقتار ءوز ونەرىمەن ەلىمىزدەگى ماڭىزدى ءارى مەرەيتويلىق داتالاردى اتاپ ءوتۋدى باستادى. التىن وردانىڭ 750 جىلدىعى، فيلوسوف- عالىم، شىعىس عۇلاماسى ءال-فارابيدىڭ 1150 جىلدىعى، قازاقتىڭ ۇلى اقىنى اباي قۇنانبايەۆتىڭ 175 جىلدىعى، ۇلى وتان سوعىسىنداعى ۇلى جەڭىستىڭ - 75 جىلدىعى، قازاقستان رەسپۋبليكاسى كونستيتۋتسياسىنىڭ 25 جىلدىعى ىسپەتتى ەل تاريحىنداعى ماڭىزدى داتالاردى وزدەرىنىڭ كوركەم قويىلىمدارىندا كورەرمەندەرگە پاش ەتتى.

كونسەرتتىك باعدارلامادا ەلىمىزدىڭ ەڭبەك سىڭىرگەن قايراتكەرلەرى مەن قازاقستاندىق ەسترادا جۇلدىزدارى، حالىقارالىق بايقاۋ لاۋرەاتتارى: ەدىل قۇسايىنوۆ، مارجان اراپبايەۆا، عايني جۇماشەۆا، مۇرات قوجا، مۇرات نۇرعازيەۆ، جەڭىس سەيدوللا ۇلى، ۆيكتور ياشنوۆسكي، ەستاي مۇقاشەۆ جانە تاعى باسقالارى كورەرمەندەردى ونەرىمەن ءتانتى ەتتى.

العاشقى بولىپ، كونسەرتتىك وركەستر، اكتەرلىك قۇرام، قوسىمشا قۇرامى «التىن وردا» پرولوگىمەن كونسەرتتىك باعدارلامانى باستادى. سونىمەن قاتار، «اباي ءسوزى» پوەتيكالىق كومپوزيتسيا ۇلى اقىنعا كورسەتىلگەن قۇرمەت بولدى. ال، اقىننىڭ «جەلسىز تۇندە، جارىق اي» ءانى ۇلاندىق ونەرپازدارمەن ناقىشىنا كەلتىرىلىپ ورىنداۋى كورەرمەندەردىڭ ىستىق ىقىلاسىنا بولەندى.

كونسەرتتىك زال ساحناسىندا ەلجاندىلىق رۋحى مەن ۇرپاقتار ساباقتاستىعىنا تولى مايدان جانە اسكەري اندەر ورىندالادى. سونداي-اق، كورەرمەندەر زاماناۋي ەسترادالىق مۋزىكالاردى ەستىپ، تەاترلاندىرىلعان كورىنىستەردى، ۇلاندىق بيشىلەردىڭ بيلەرىن جانە «سپاسسكايا باشنيا - 2019» حالىقارالىق اسكەري - مۋزىكالىق فەستيۆال قاتىسۋشىلارى ۇلتتىق ۇلان قۇرمەت قاراۋىل روتاسىنىڭ ورىنداۋىنداعى قارۋمەن دەفيلەنى تاماشالادى.