سەناتورلار وڭىرلەردە ءجۇر

سەناتورلار قايرات قوجامجاروۆ، مۇراتباي جولداسبايەۆ پەن ابدالى نۇراليەۆ جامبىل وبلىسىندا جۇمىس بابىنداعى ساپارىمەن بولدى.

دەپۋتاتتار ساپار بارىسىندا وبلىس اكتيۆىمەن جانە جۇرتشىلىق وكىلدەرىمەن كەزدەستى. جۇزدەسۋ بارىسىندا سەناتورلار جينالعانداردى زاڭناماعا ەنگىزىلگەن وزگەرىستەرىمەن تانىستىردى جانە ءوڭىردىڭ الەۋمەتتىك-ەكونوميكالىق دامۋ كەلەشەگىن، تۇرعىنداردىڭ ءال-اۋقاتىن كوتەرۋ، ونىڭ ىشىندە كوپ بالالى جانە از قامتىلعان وتباسىلارعا مەملەكەتتىك قولداۋ كورسەتۋ، مىندەتتى الەۋمەتتىك- مەديتسينالىق ساقتاندىرۋ ماسەلەلەرىن تالقىلادى.

قايرات قوجامجاروۆ وبلىس جۇرتشىلىعىن جامبىل وبلىسىنىڭ قۇرىلعانىنا 80 جىل تولۋىمەن قۇتتىقتادى جانە ەۋرازيا تاريحى مەن قازاقستان مەملەكەتتىلىگىنىڭ قالىپتاسۋىنداعى ايماقتىڭ ماڭىزدى ءرولىن اتاپ ءوتتى. سونداي-اق ىشكى تۇراقتىلىق پەن حالىقتىڭ ءال-اۋقاتىن ارتتىرۋدىڭ ماڭىزى زور ەكەنى ايتىلدى.

دەپۋتات ءوز سوزىندە مەملەكەت باسشىسى قاسىم-جومارت توقايەۆتىڭ «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىنىڭ باسىمدىقتارى مەن ونىڭ جۇزەگە اسۋ بارىسىنا جۇرتشىلىقتىڭ نازارىن اۋداردى. سونداي- اق «حالىقتىڭ ۇنىنە قۇلاق اساتىن مەملەكەت» دەگەن تۇجىرىمداماسى اياسىندا ءار ازامات ءوزىنىڭ مۇڭ- مۇقتاجىن دەپۋتاتتارعا جەتكىزە الاتىنىن، ال ولار ءوز كەزەگىندە تالاپ- تىلەكتەرىنە جەدەل ءارى سىندارلى جاۋاپ بەرۋگە اتسالىساتىندارىن ەسكە سالدى.

سەناتور مۇراتباي جولداسبايەۆ وبلىسقا ساپاردىڭ نەگىزگى ماقساتى - حالىقتىڭ ءال- اۋقاتىمەن تانىسىپ، وتكىر پروبلەمالاردى تىڭداۋ ەكەنىن اتاپ ءوتتى. ءسوز العان ابدالى نۇرالييەۆ وتكەن جىلى قابىلدانعان جاڭا زاڭدارعا توقتالا كەلىپ، ولاردىڭ باسىم بولىگى الەۋمەتتىك ماسەلەلەرگە، حالىقتىڭ ءال- اۋقاتىن ارتتىرۋعا ارنالعانىن ايتتى. سەناتور اگرارلىق سۋبسيديا ماسەلەسىنە دە ەرەكشە توقتالدى.

جۇزدەسۋدە ءبىرقاتار ماڭىزدى ماسەلەلەر كوتەرىلىپ، جان- جاقتى تالقىلاۋ بولدى. ونىڭ ىشىندە جۋالى اۋدانىن گازداندىرۋ، «ارداگەرلەر تۋرالى» زاڭ جوباسى جانە باسقا دا الەۋمەتتىك ماسەلەلەر كوتەرىلدى.

سەناتورلار ساپار بارىسىندا جامبىل وبلىستىق پروكۋرورىمەن جانە پروكۋراتۋرانىڭ ءبولىم باسشىلارىمەن، وبلىستىڭ قۇقىق قورعاۋ ورگاندارىنىڭ باسشىلارىمەن كەزدەستى. بۇل كەزدەسۋدە قىلمىستىق، قىلمىستىق- پروتسەستىك زاڭنامانى جەتىلدىرۋ مەن جەكە تۇلعانىڭ قۇقىقتارىن قورعاۋدى كۇشەيتۋ ماسەلەلەرى تالقىلاۋدىڭ باستى تاقىرىبى بولدى.

قايرات قوجامجاروۆ كامەلەت جاسقا تولماعاندارعا قاتىستى زورلىق- زومبىلىق، براكونەرلىك، ناشاقورلىق، مال ۇرلىعى، ماس كۇيدە كولىك جۇرگىزۋ، قايتالانعان قىلمىس ءۇشىن قىلمىستىق جاۋاپتىلىقتى كۇشەيتۋ شارالارى تۋرالى حاباردار ەتتى.

سەناتورلار جامبىل وبلىستىق پوليتسيا دەپارتامەنتىنىڭ جەدەل باسقارۋ ورتالىعى مەن جاڭادان اشىلعان «فرونت وفيسىنىڭ» جۇمىسىمەن جانە «وڭتۇستىك» وڭىرلىك قولباسشىلىعى اسكەري باسقارماسىنىڭ قىزمەتىمەن تانىستى.

دەپۋتاتتار ايماققا ساپار اياسىندا ساپالى ءونىم وندىرەتىن ءارى قارقىندى دامىپ كەلە جاتقان «اسا- دامۋ» قۇس فابريكاسىندا بولدى.

جامبىل اۋدانىنىڭ ورتالىعىنداعى «NurOtan» پارتياسى اۋداندىق فيليالىندا دەپۋتاتتار اۋدان ازاماتتارىن جەكە ماسەلەلەرى بويىنشا قابىلدادى.

جۇمىس بابىنداعى ساپارمەن قىزىلوردا وبلىسىنىڭ جالاعاش اۋدانىنداعى جالاعاش كەنتى مەن بۇقارباي باتىر اۋىلىندا جانە سىرداريا اۋدانىنداعى سىرداريا كەنتىندە بولعان سەنات دەپۋتاتتارى مۇرات باقتيار ۇلى مەن بەكمىرزا ەلامانوۆ الدىمەن ي. توقتىبايەۆ اتىنداعى №35-مەكتەپ- ليتسەيگە بارىپ، اۋىل تۇرعىندارىمەن، مۇعالىمدەرمەن، مەديتسينا قىزمەتكەرلەرىمەن، اۋداندىق جانە وبلىستىق ءماسليحات دەپۋتاتتارىمەن، شارۋا قوجالىقتارىنىڭ وكىلدەرىمەن، سونداي- اق اۋىل اقساقالدارىمەن كەزدەستى.

جۇزدەسۋدە سەنات جۇمىسىنىڭ اشىقتىعى تۋرالى ايتىلىپ، پالاتانىڭ جالپى وتىرىستارى مەن كوميتەتتەردىڭ كەڭەيتىلگەن وتىرىستارى تىكەلەي ەفيردە كورسەتىلەتىنى جاريا ەتىلدى.

- زاڭ جوباسىن تالقىلاۋ بارىسىن عالامتوردان بارشا قازاقستاندىقتار كورە الادى. وتكەن جىلى «پەداگوگ مارتەبەسى تۋرالى» جانە حالىقتىڭ دەنساۋلىعىنا قاتىستى زاڭدار حالىق اراسىندا كەڭىنەن تالقىعا سالىندى. وسىنداي ماسەلەلەردى تالقىلاۋدا حالىقتىڭ پىكىرى، ۇسىنىسى ءبىز ءۇشىن ماڭىزدى، - دەدى مۇرات باقتيار ۇلى. - «پەداگوگ مارتەبەسى تۋرالى» زاڭ ۇستازداردىڭ ساپالى ءبىلىم بەرۋى جانە ولاردى ارتىق جۇكتەمەدەن ارىلتۋ ءۇشىن قابىلدانىپ وتىر. مۇعالىمدەردىڭ ار- نامىسىنا تيىسكەندەرگە قاتىستى جاۋاپكەرشىلىك كۇشەيتىلىپ، ءتيىستى مولشەردە ايىپپۇل تولەيتىن بولادى. ۇستازدار قاۋىمىن الەۋمەتتىك جاعىنان قامتاماسىز ەتۋ دە قولعا الىنىپ وتىر.

ودان باسقا، ەلىمىزدە جول-كولىك وقيعالارىنىڭ جيىلەپ كەتۋىنە بايلانىستى ءبىرقاتار زاڭدارعا وزگەرىستەر ەنگىزىلدى. اتاپ ايتقاندا، كولىكتى ماس كۇيىندە جۇرگىزگەن ادامدى 10 جىلعا دەيىن كولىك جۇرگىزۋ قۇقىعىنان ايىرۋ تۋرالى وزگەرىستەر بار. وسىلاي زاڭدىق تۇرعىدان تالاپ كۇشەيگەندە عانا قىلمىس ازايىپ، جول-كولىك وقيعالارىنىڭ كورسەتكىشى تومەندەيتىن بولادى.

دەپۋتاتتار سونىمەن بىرگە تۇرمىستىق جانە كامەلەتكە تولماعاندارعا قاتىستى زورلىق- زومبىلىققا، ناشاقورلىققا، ادام ولىمىنە قاتىستى قىلمىستىق جاۋاپكەرشىلىكتى كۇشەيتۋ شارالارىن اتاپ ءوتتى. جۇزدەسۋدە اۋىل تۇرعىندارىنىڭ ۇسىنىس- پىكىرلەرى تىڭدالدى. تۇرعىندار «پەداگوگ مارتەبەسى تۋرالى» زاڭ جوباسىنىڭ قابىلدانعانىنا ريزاشىلىعىن ءبىلدىرىپ، مىندەتتى الەۋمەتتىك مەديتسينالىق ساقتاندىرۋعا جانە زەينەتاقى مەن ەڭبەكاقىعا قاتىستى ساۋال قويدى.

سەناتورلار كەزدەسۋدە ايتىلعان وزەكتى ماسەلەلەر باقىلاۋدا بولاتىنىن ايتىپ، ماڭىزدى تاقىرىپتار پارلامەنت سەناتىندا تالقىلاناتىنىن جەتكىزدى.

كەزدەسۋ بارىسىندا اۋدان اكىمدەرى جاڭا جىلدىڭ العاشقى جۇمىس كۇندەرىندە اۋدانعا ساپارمەن كەلىپ، حالىقپەن جۇزدەسكەن پارلامەنت سەناتىنىڭ دەپۋتاتتارىنا العىس ايتىپ، جۇمىستارىنا تىلەكتەستىگىن ءبىلدىردى.