ەلوردادا ەرىكتىلەر جىلىنا وراي فوتو جانە كىتاپ كورمەسى ءوتىپ جاتىر
نۇر-سۇلتان. قازاقپارات - كەشە ق ر ۇلتتىق اكادەميالىق كىتاپحاناسىنىڭ «جاستار- كوۆوركينگ» ورتالىعىندا 2020 -جىلى «ۆولونتەر جىلىنا» ارنالعان «الەمدى جاقسى جاققا وزگەرت» اتتى كىتاپ جانە فوتوكورمە اشىلادى، دەپ حابارلايدى قازاقپارات ءتىلشىسى.
شارا ق ر پرەزيدەنتى قاسىم-جومارت توقايەۆتىڭ 2020 -جىلدى ۆولونتەرلەر جىلى دەپ جاريالاۋىنا وراي ءوتتى.
«قازىرگى قوعام اقپاراتتى سۋرەت ارقىلى قابىلداۋعا بەيىمدەلگەندىكتەن كورمەگە ناقىل سوزدەر مەن فوتوسۋرەتتەر قويىلىپ وتىر. بۇل جەردەن الەمدەگى جانە قازاقستانداعى ۆولونتەرلىكتىڭ تاريحىن، سونىمەن قاتار ءال-فارابيدىڭ «قايىرىمدى قالا تۇرعىندارى» اتتى كىتابىنداعى ناقىل سوزدەرىن، كىتاپحانامىزدىڭ بارلىق شارالارىنا بەلسەندى قاتىسقان جاستاردىڭ فوتوسۋرەتتەرىن كورە الاسىزدار. باستى ماقسات - ۆولونتەرلىك ۇعىمىن ساناعا ءسىڭىرۋ ءۇشىن اقپاراتتىق قولداۋ كورسەتۋ»، - دەيدى ۆولونتەر، قور قۇرۋ قىزمەتىنىڭ جەتەكشىسى ايبالا قاناتباي قىزى.
ەرىكتى ۆولونتەر بولۋ ءۇشىن ادامدارعا نيەت ءبىلدىرۋ، جانى اشىپ، ەسىركەي ءبىلۋ، اشۋدى اقىلعا جەڭدىرىپ، كوماندادا جۇمىس ىستەي ءبىلۋ عانا ەمەس، ادالدىق، پاراسات سياقتى ادامگەرشىلىك قاسيەتتەر كەرەك. «الەمدى جاقسى جاققا وزگەرت» اتتى كىتاپ جانە فوتوكورمە وسى ماسەلەلەرگە نازار اۋدارتۋ ءۇشىن ۇيىمداستىرىلىپ وتىر.
اۆتور: زارينا قاھارمان
