بەكبولات تىلەۋحان: پرەزيدەنت ايتقانداي ءتىلدى رەفورمالاۋدا جەڭىلتەكتىككە جول بەرمەۋ كەرەك

نۇر- سۇلتان. قازاقپارات - ورتالىق كوممۋنيكاتسيالار قىزمەتىندە وتكەن بريفينگتە ۇلتتىق قوعامدىق سەنىم كەڭەسىنىڭ مۇشەسى بەكبولات تىلەۋحان بۇگىن ەلوردادا وتكەن ۇلتتىق كەڭەس وتىرىسىندا تالقىلانعان ماسەلەلەرگە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ۇلتتىق كەڭەس وتىرىسىندا پرەزيدەنت كوپ كوزعالعان ماسەلەنىڭ ءبىرى - لاتىن الىپبيىنە ءوتۋ بولدى. ول «ەشقاشان اسىعۋعا بولمايدى. بۇل قاۋىپتى نارسە»  دەدى. عالىمداردىڭ پىكىرىنە سۇيەنىپ، ساراپتاما جاساۋ كەرەكتىگىن ايتتى»، - دەيدى بەكبولات تىلەۋحانوۆ.

سونداي- اق، ول پرەزيدەنت قاسىم- جومارت توقايەۆ قازاق ءتىلىن رەفورمالاۋ كەرەكتىگىن ايتقانىنا توقتالىپ ءوتتى.

«ايتىپ وتكەن تاعى ءبىر ماڭىزدى ماسەلە - قازاق تىلىنە رەفورما جاساۋ. بۇل ماسەلە بويىنشا عالىمدار تاراپىنان ەكىۇداي پىكىر قالىپتاسۋى مۇمكىن. مىسالى، تۇرىك تىلىنە رەفورما جاساۋ ارقىلى جالپى تىلدەردى يگەرۋ جاعىن قاراستىرعان. شىعارماشىلىق ءتىل - ءبىر باسقا، كۇندەلىكتى قولداناتىن اۋىزەكى ءتىل - ءبىر باسقا. ءتىلدى ساقتاۋ تەك زاڭمەن ىسكە اساتىن نارسە ەمەس قوي. بۇل قادامنىڭ ماڭىزدىلىعىن ەستىگەن بويدا تۇسىنە قويماۋىمىز مۇمكىن، ءبىراق تۇبەگەيلى ءبىر نارسە ىسكە اساتىن بولسا ءتىلدىڭ كوكجيەگى اشىلادى. پرەزيدەنتىمىز ايتقانداي، بۇل - جەڭىل- جالپى قارايتىن نارسە ەمەس. بۇل جەردە عالىمداردىڭ ەڭبەگى، قوعام تاراپىنان كومەك كەرەك. بۇل جەردە رەفورما قاجەت بولىپ تۇر. بۇل - ۇلت تاعدىرىنا قاتىستى ماڭىزدى قادام»، - دەيدى ول.

ەسكە سالا كەتسەك، 6 - قىركۇيەك كۇنى ۇلتتىق كەڭەستىڭ العاشقى وتىرىسىندا مەملەكەتتىك ءتىل مارتەبەسى تۋرالى زاڭ قابىلداۋ تۋرالى ۇسىنىس ايتقان بولاتىن.

اۆتور: زارينا قاھارمان