زاڭ شىعارۋ پروتسەسى ۇنەمى جەتىلدىرۋدى تالاپ ەتەدى - بەكتاس بەكنازاروۆ
«كەيبىر زاڭ جوبالارىن دايارلاۋ ساپاسى ءتيىستى دەڭگەيدە ەمەس. وسىعان بايلانىستى بۇل باعىتتاعى جۇمىستاردا ادىلەت مينيسترلىگىنىڭ كۇش- جىگەرى ماڭىزدى. ۆەدومستۆودا قىزمەت ەتەتىن بىلىكتى ماماندار زاڭ جوبالارىن دايارلاۋ دەڭگەيىندە بەلسەندى اتسالىسۋى كەرەك» ، - دەدى سەنات ءتوراعاسىنىڭ ورىنباسارى بەكتاس بەكنازاروۆ.
وسى ورايدا ول زاڭ شىعارۋ پروتسەسى ۇنەمى جەتىلدىرۋدى تالاپ ەتەتىنىن اتاپ ءوتتى.
«ول ءۇشىن ۇكىمەتتىڭ زاڭ جوبالاۋ قىزمەتىن جوسپارلاۋدى جەتىلدىرۋ، زاڭ جوبالارى مەن ولاردىڭ تۇجىرىمدامالارىنا عىلىمي ساراپتاما ۇيىمداستىرۋ ادىستەرىن تۇبەگەيلى وزگەرتۋ، قازاق جانە ورىس تىلدەرىندە بىردەي ءتۇپنۇسقانى قامتاماسىز ەتۋ بويىنشا ءتيىمدى شارالار قابىلداۋ، مەملەكەتتىك ورگاندارداعى زاڭ جوبالارىن ازىرلەۋگە جاۋاپ بەرەتىن ناقتى ادامدارىنىڭ جاۋاپكەرشىلىگىن كۇشەيتۋ قاجەت» ، - دەپ اتاپ ءوتتى سەنات ءتوراعاسىنىڭ ورىنباسارى.
ءوز كەزەگىندە ادىلەت ءمينيسترىنىڭ مىندەتىن اتقارۋشى ناتاليا پان «زاڭ شىعارۋ پروتسەسىن ودان ءارى جەتىلدىرۋ» تاقىرىبىنداعى پارلامەنتتىك تىڭداۋدىڭ قورىتىندىسى تۋرالى ايتتى. ول قابىلداناتىن جانە قابىلدانعان زاڭداردىڭ تۇراقتىلىعى مەن ساپاسىن قامتاماسىز ەتۋ ءۇشىن ادىلەت مينيسترلىگى جەكەلەگەن مەملەكەتتىك ورگاندارعا دا، جالپى زاڭ شىعارۋ جۇيەسىنە دە ىقپال ەتۋدىڭ بارلىق ىقتيمال تەتىكتەرىن قولدانىپ كەلە جاتقانىن ايتتى.
بۇل تاقىرىپ بويىنشا سەناتور ۆلاديمير ۆولكوۆ پارلامەنتتىك تىڭداۋدىڭ قورىتىندىسى بويىنشا 17 پۋنكتتەن تۇراتىن ۇسىنىستار دايىندالعانىن حابارلادى. ادىلەت مينيسترلىگى تارماقتاردىڭ ءبىر بولىگىن ورىندادى. قالعاندارى ۇيىمداستىرۋ تۇرعىسىندا جانە كەشەندى شەشىمدى تالاپ ەتەدى. ول «قازاقستان رەسپۋبليكاسىنىڭ كەيبىر زاڭنامالىق اكتىلەرىنە نورما شىعارۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قابىلدانعاننان كەيىن مۇمكىن بولادى.
ايتا كەتەيىك، پارلامەنت سەناتى جانىنداعى زاڭ شىعارۋ پروتسەسىن جەتىلدىرۋ جونىندەگى كەڭەس بيىلعى جىلدىڭ 1 - شىلدەسىندە زاڭ شىعارۋ قىزمەتىنىڭ تيىمدىلىگىن ارتتىرۋ ماقساتىندا قۇرىلعان بولاتىن. ونىڭ قۇرامىنا سەنات دەپۋتاتتارى، مەملەكەتتىك ورگاندار مەن قوعامدىق بىرلەستىكتەردىڭ وكىلدەرى، بەلگىلى قۇقىقتانۋشى عالىمدار كىردى.
