ەلباسىنىڭ «نۇر وتان» فيليالدارى وكىلدەرىمەن كەزدەسۋىنەن ۆيدەو جاريالاندى

نۇر-سۇلتان. قازاقپارات - نۇرسۇلتان نازاربايەۆتىڭ «Nur Otan» فيليالدارى وكىلدەرىمەن كەزدەسۋىنەن ۆيدەو جاريالاندى، دەپ حابارلايدى قازاقپارات ەلباسىنىڭ باسپا ءسوز قىزمەتىنە سىىلتەمە جاساپ.

كەشە ق ر تۇڭعىش پرەزيدەنتى - ەلباسى نۇرسۇلتان نازاربايەۆ «Nur Otan» پارتياسى وبلىستىق فيليالدارىنىڭ وكىلدەرىمەن كەزدەسكەن ەدى. وتىرىسقا «Nur Otan»  پارتياسىنىڭ پارلامەنت ماجىلىسىندەگى فراكسيا دەپۋتاتتارى، ءماسليحات فراكسيالارىنىڭ حاتشىلارى مەن جەتەكشىلەرى قاتىسقان بولاتىن.

جيىندا ەلباسى Nur Otan پارتياسىنىڭ كەڭەسىندە پارتيانىڭ وڭىرلەردەگى جۇمىسىن جەتىلدىرۋدى تاپسىردى.

«ءاربىر اكىمنىڭ جانە ءماسليحاتتارداعى فراكسيا دەپۋتاتتارىنىڭ پارتيالىق جاۋاپكەرشىلىگىن كۇشەيتۋ كەرەك. قازىرگى ۋاقىتتا بارلىق رەفورمالار ايماقتاردى دامىتۋعا باعىتتالعان. ماسەلەن، سوڭعى 10 -جىلدا جەرگىلىكتى بيۋدجەتتەر 3 ەسەگە جۋىق ءوسىپ، 4,7 تريلليون تەڭگەنى قۇرادى. بولىنگەن قاراجاتتىڭ جۇمسالۋىنا پارتيانىڭ قاتاڭ باقىلاۋىن قامتاماسىز ەتۋ ماڭىزدى. سونىمەن بىرگە، دەپۋتاتتار جۇمىسىن ودان ءارى جاقسارتۋ مەن بارلىق ءماسليحاتتاردىڭ مارتەبەسىن نىعايتۋ شارالارىن جۇرگىزۋ قاجەت»، - دەدى نۇرسۇلتان نازاربايەۆ.

ەلباسى شاعىن جانە ورتا بيزنەستىڭ ەل ەكونوميكاسىنداعى ۇلەسىن ارتتىرۋ مەن «ەڭبەك» باعدارلاماسىن جۇزەگە اسىرۋ جوسپارىن باياندادى. باعدارلاما بويىنشا 2 جىلدا ەلىمىزدە 750 مىڭ جۇمىس ورنى قۇرىلادى. سونداي-اق، 2023 -جىلعا دەيىن بارلىق اۋىلعا ساپالى اۋىز سۋ بەرىلەدى.

جيىندا ەلباسى Nur Otan پارتياسىنىڭ ءاربىر ءوڭىر، قالا جانە اۋدان بويىنشا سايلاۋالدى باعدارلاماسىن ازىرلەۋدى تاپسىردى. سونىمەن قاتار، ءماسليحاتتىڭ سايلاۋالدى پارتيالىق تىزىمىنە كىمدەر كىرۋى تيىستىگىن اتادى.