ارتەريالىق قىسىمدى ولشەگەندە جازىلاتىن ساندار نەنىڭ كورسەتكىشى؟

نۇر-سۇلتان. قازاقپارات - ارتەريالىق قىسىم - ومىرىمىزدەگى ەڭ ماڭىزدى كورسەتكىشتەردىڭ ءبىرى. ءسىز جاي عانا دارىگەر قابىلداۋىنا بارساڭىز دا، جەدەل جاردەم قىزمەتىن شاقىرساڭىز دا، قانداي جاعداي بولسا دا، دارىگەر الدىمەن قان قىسىمىڭىزدى ولشەيدى.

 نەگە؟ سەبەبى قىسىم قالىپتى كۇيدەن اۋىتقىپ كەتسە، دەنساۋلىقتا اقاۋ بار ەكەنى بىردەن بايقالادى. ارتەريالىق قىسىمدى ولشەگەننەن كەيىن ناتيجەسى اراسىنا بولشەك بەلگىسى قويىلعان ەكى سانمەن جازىلادى. بۇل نەنىڭ كورسەتكىشى؟ اۋادان الىنعان وتتەگى سۋدا ەرىپ، بەلگىلى فيزيولوگيالىق قىسىممەن (ورتا ەسەپ 120/80) قانعا تۇسەدى. قىزىل قان تۇيىرشىكتەرى ەريتروتسيت ونى اعزانىڭ ءار جاسۋشاسىنا جەتكىزەدى. وتتەگى بولماسا ءومىر سۇرە المايتىنىمىز بەلگىلى. ال وسى تىزبەك تۇيىقتالىپ قالسا، ءار اعزا ءوز قىزمەتىن جەتكىلىكتى تۇردە اتقارا المايدى.

ارتەريالىق قىسىمنىڭ ءبىرىنشى سانى سيستولوگيالىق (جۇرەك) ، ەكىنشى سانى دياستولوگيالىق (بۇيرەك) قىسىم دەپ ەسەپتەلەدى. ادام اعزاسىندا جوعارى، تومەن جانە تۇراقسىز قان قىسىمى بولۋى مۇمكىن. ارتەريالىق قىسىمعا قاننىڭ ءوزى، اعاتىن تامىرى، قان بارىپ تۇسەتىن مەدياتور (جۇيكە گۋمورالدىق رەتتەۋ) پروتسەسى قاتىسادى. ارتەريالىق قىسىم كوتەرىلۋى، قاننىڭ قۇرعاۋىنا بايلانىستى. دۇرىس تاماقتانباۋ، ءبىر ورىندا ۇزاق وتىرۋ، فيزيكالىق جاتتىعۋ جاساماۋ، جەتكىلىكتى مولشەردە سۋ ىشپەۋ - وسىنىڭ بارلىعى قاننىڭ كەۋىپ قالۋىنا سەبەپ بولادى. كۇيزەلىس تە قان قىسىمى كوتەرىلەتىنىنە سەبەپ ەكەنىن بىلەمىز. ال قان سۇيىلىپ كەتكەندە قىسىم تومەندەيدى، ۆەگەتاتيۆتىك جۇيكە جۇيەسى بۇزىلعان كەزدە تۇراقسىز كۇيگە تۇسەدى. قىسىم كوتەرىلىپ نە ءتۇسىپ كەتكەن جاعدايدا دا 40-50 دەگەن كورسەتكىشتەن اسپاۋى ءتيىس. مىسالى 120+50, قان قىسىمى 170 تەن دە جوعارىلاپ كەتسە، دەرەۋ دارىگەردىڭ كومەگى كەرەك. قان قىسىمىن ولشەگەندە ءبىرىنشى سان نورمادان كوپ بولسا، دەمەك ادرەنالين اسەرى، ونى قالىپقا كەلتىرۋ ءۇشىن كۇيزەلىسكە بوي بەرمەي، سالماعىڭىزعا ساي مولشەردە سۋ ءىشۋدى ادەتكە اينالدىرىپ، تازا اۋامەن تىنىستاۋ قاجەت. ال ەكىنشى سانى كوتەرىلگەن بولسا، بۇيرەككە سالماق سالماي، سۋ بالانسىن ساقتاڭىز. مىرىش، سەلەن جانە س دارۋمەنىن كوبىرەك ءىشىڭىز.

Massaget.kz