ول جاقتا ءولىم ۇيرەنشىكتى نارسە - سيريادان ورالعان ايەل
دەرەكتى فيلمدە ايدا امانگەلدى اتتى 1995 -جىلى قازىعۇرت اۋدانىندا تۋعان ايەلدىڭ تاعدىرى باياندالادى. «ۋم يسحاق» ءدىني لاقاپ اتىن يەمدەنگەن ول شىمكەنتتەگى ءدىني مەدرەسەدە ءبىر جىل كولەمىندە ءدىني ءبىلىم العان. وتباسى مۇشەلەرىمەن 2015 -جىلدىڭ 31 - تامىزىندا «شىمكەنت- انتاليا» اۋە باعىتىمەن تۇركيا ارقىلى سيريا اۋماعىنا ءوتىپ، دايش ۇيىمىنا قوسىلعان. ق ر قىلمىستىق كودەكسىنىڭ 256-بابى 1-تارماعى بويىنشا قىلمىستىق ءىس قوزعالىپ، ينتەرپول باعىتى بويىنشا حالىقارالىق ىزدەۋ جاريالانعان.
سيريا اۋماعىنا جەتىسىمەن سول جەردە اكەسىنىڭ قالاۋىمەن سودىر ابۋ زەيد ال- ازەريگە تۇرمىسقا شىققان. ايدا تاياۋدا تۇركىستان وبلىستىق سوتىنىڭ شەشىمىمەن 5 جىلعا باس بوستاندىعىنان ايىرىلدى.
«بىزگە ىستانبۇلدا سيرياعا بارۋعا كومەكتەسەتىن وسمان دەگەن ادامدى جىبەردى. ىستامبۇلدا ءبىر جارىم ايداي بولدىق تا، سيرياعا 16 - قازاندا كىردىك. اكەم مەن اعامنىڭ ىقپالىمەن سول جاققا كەتتىك قوي. ءبىراق، بىزگە ول جاقتا سوعىس دەپ ايتقان جوق ەدى. ءبىزدىڭ ۇيدە اكەمنىڭ ايتقانى - زاڭ. بىزدەن باراسىڭ با، بارمايسىڭ با دەپ سۇرامايتىن دا. 1997 -جىلى تۋعان ناماز وقىمايتىن ءىنىمدى اكەم قيناپ الىپ كەتكەن. سوسىن سول جاقتا ازەربايجاندىق لەزگينگە تۇرمىسقا شىقتىم. كۇيەۋىم قاتال ءارى قىزعانشاق بولعاندىقتان، ۇيدەن شىققان جوقپىن. اۋىردىم. ەكى مارتە بالام ىشىمدە شەتىنەپ كەتتى. بومبا... ۇيلەرىمىزدىڭ اراسى ەكى پودەز عانا بولسا دا، اناما جىبەرمەيتىن. ەشكىممەن ارالاستىرماي، ەشقايدا شىعارمايتىن. تەك ۇيدە ەنەمنىڭ قاسىندا وتىراتىنمىن. بۇگىن ولەم بە، ەرتەڭ ولەم بە دەگەن قورقىنىشپەن ءومىر سۇردىك»، - دەيدى ول.
قازاقستاننان بارعان ايەلدىڭ ايتۋىنشا، كۇندە قايتالاناتىن بومبالاۋدان ەرتەڭگى ومىرگە دەگەن ءۇمىت تە جوققا اينالاتىن كورىنەدى.
«سونداي جەردەن امان- ەسەن كەلىپ تۇرمىن. جۇرە الماي، توسەكتە جاتتىم. ول جاقتا تاماق جوق. جاتا بەرەتىنمىن. ءبىر جەردە جاسىرىن تۇردىق. قاشتىق. دايش- تىڭ ادامدارىنان. سەبەبى، قايتام دەگەندەردى دارعا اسىپ تاستايتىن. ءبىر كۇنى ولار ۇيگە كىرىپ كەلىپ، ءىنىمنىڭ بىرەۋىن الىپ كەتتى. ەكىنشىسىن قىزدىڭ كيىمىن كيگىزىپ امان الىپ قالدىق. الىپ كەتكەن ءىنىم ءۇش جارىم اي سول جەردە تۇرمەدە وتىردى. وزدەرىنىڭ تۇرمەسى بار. «دايش دۇرىس ەمەس» دەگەن ادامدار نە دارعا اسىلدى، نە تۇرمەگە جابىلدى»، - دەيدى ول.
24 جاستاعى ايەل سيرياعا بارعانىنا وكىنەتىنىن ايتادى.
«ول جاققا بارا سالىسىمەن ءبارىمىزدى سوعىسۋعا ءماجبۇر ەتتى. اكەم ۇلكەن كىسى ەدى. 14 جاسار ىنىممەن بىرگە سوعىسۋعا ماجبۇرلەدى. ول جاقتا سوعىسپاساڭ، ەڭ جامان ادام بولاسىڭ. ءبارى ساعان جامان قارايتىن. كەيىن ءولىم قاراپايىم ءۇردىس بولىپ قالدى. تانيتىن ادامدارىڭ شەتىنەن ولە بەرەدى. وكىنەم اكەمدەردىڭ جوقتىعىنا. اشارشىلىق كوردىك. ءشوپ جەدىك. قانشا كۇن اش جۇرگەن كەزدەر بولدى. ول جاق - كىرسەڭ شىعا المايتىن جەر. اكەم قورشاۋدا قالىپ، كوز جۇمدى. انام جۇرەگىنە وق ءتيىپ، قايتىس بولدى»، - دەيدى ول.
اۆتور: ايان بەكەن ۇلى
