قازاقستاندا قاپتامانى كادەگە جاراتۋ الىمى ەنگىزىلەدى

 نۇر- سۇلتان. قازاقپارات - قازاقستاندا قاپتامانى كادەگە جاراتۋ الىمى ەنگىزىلەدى. بۇل تۋرالى ق ر ەكولوگيا، گەولوگيا جانە تابيعي رەسۋرستار مينيسترلىگى وندىرۋشىلەردىڭ كەڭەيتىلگەن مىندەتتەمەلەرىن جۇزەگە اسىرۋ باسقارماسىنىڭ باسشىسى جاسۇلان نۇرعاليەۆ ايتتى، دەپ حابارلايدى قازاقپارات ءتىلشىسى.

«تاياۋ ايدىڭ ىشىندە قاپتامانى كادەگە جاراتۋ الىمى ەنگىزىلەتىن بولادى. بۇگىنگى كۇنى بۇيرىق، نورماتيۆتىك- قۇقىقتىق اكتى دايىن جانە مەملەكەتتىك ورگاندارمەن كەلىسۋ ساتىسىنان ءوتىپ جاتىر. جاقىندا ۋاقىتتا، مۇمكىن وسى نە كەلەسى ايدا نورماتيۆتىك- قۇقىقتىق اكتى قابىلدانىپ، ادىلەت مينيسترلىگىندە تىركەلەدى دەپ ۇمىتتەنەمىن» ، - دەدى ول پلاستيكا قالدىقتارىن جيناۋ جانە قايتا وڭدەۋ تاقىرىبىنا ارنالعان دوڭگەلەك ۇستەل وتىرىسى بارىسىندا.

ونىڭ اتاپ وتۋىنشە، اتالعان نورماتيۆتىك- قۇقىقتىق اكتى جاريا تۇردە تالقىلانعان. ەندى تەك مەملەكەتتىك ورگاندارمەن، «اتامەكەن» ۇلتتىق كاسىپكەرلەر پالاتاسىمەن كەلىسۋ عانا قالىپ وتىر. ودان كەيىن ادىلەت مينيسترلىگى راسىمدەۋى ءتيىس.

سونىمەن قاتار ول قاپتامانى كادەگە جاراتۋ الىمىنىڭ دا ستاۆكاسى قانشا بولاتىندىعىن ايتىپ بەردى.

«بولجالدى مالىمەتتەرگە سايكەس، ءار بوتەلكەگە 0,5 تەڭگە نەمەسە 10 تيىن بولادى. ەڭ ۇلكەن ستاۆكا 1,5 تەڭگە مولشەرىندە شىنى بوتەلكەلەرگە بەلگىلەنىپ وتىر. ونىڭ ءوزى دە سالماعىنا بايلانىستى. قاپتامانى كادەگە جاراتۋ الىمىن وندىرۋشىلەر مەن يمپورتتاۋشىلار تولەيدى. ءبىز مۇنى 2018 -جىلى ەنگىزۋدى جوسپارلاعان ەدىك. 2017 -جىلدان جۇمىستاردى قولعا الدىق. بۇل ماسەلەنى تىڭعىلىقتى قاراستىردىق» ، - دەدى ەكولوگيا مينيسترلىگىنىڭ وكىلى.