ادامدار الەۋمەتتىك جەلىلەر ارقىلى كوپ الدانادى - پوليتسيا
انىقتاۋشىلاردىڭ مىندەتىنە اسا اۋىر ەمەس جانە اۋىرلىعى ورتاشا ىستەردى تەرگەۋ كىرەدى. نەگىزىنەن ۇرلىق، بۇزاقىلىق، الاياقتىق، دەنساۋلىققا جەڭىل جاراقات كەلتىرۋ سەكىلدى قىلمىستاردى اشۋ انىقتاۋشىنىڭ قۇزىرىندا.
وسى ساناتتاعى قىلمىستار بويىنشا انىقتاۋشىلار سوتقا دەيىنگى تەرگەپ تەكسەرۋ امالدارىن جۇرگىزەدى. انىقتاۋشىلار ءۇشىن ءىستىڭ انىق-قانىعىن انىقتاۋدا قيىندىق تۋدىراتىن قىلمىستىق ىستەر دە بار. قازىرگى كەزدە ينتەرنەت جەلىسىندەگى الاياقتىق كوبەيدى. زامانۋي تەحنولوگيالاردىڭ كومەگىمەن جاسالاتىن قىلمىستىق ىستەردى تەرگەۋدە دە ءبىراز كەدەرگى بار.
«ءبىز قازىر ە- قىلمىستىق ىستەر جوباسىن ەنگىزىپ جاتىرمىز. بىرىنشىدەن، ۋاقىت ۇنەمدەيدى. ەكىنشىدەن، ءبارى اشىق بولادى. انىقتاۋشى بىرنەشە قىلمىستىق ءىستى تەرگەۋمەن اينالىسادى. ءاربىر ءىستىڭ ارتىندا ادام تاعدىرى تۇرادى. ءبىز قىلمىستىق ءىستى اياعىنا دەيىن تەرگەپ، ءىستى سوتقا دەيىنگى ءبىرىڭعاي رەەسترگە تىركەيمىز. سوڭعى ۋاقىتتا ينتەرنەت-الاياقتىق بەلەڭ الىپ كەلەدى. ادامدار الەۋمەتتىك جەلىلەردى الاياقتىقتىڭ الاڭىنا اينالدىرىپ الىپ جاتىر. وسى الەۋمەتتىك جەلىدە تەحنيكا، تون، قوسالقى بولشەكتەر، كيىم-كەشەكتەر ساتاتىن فەيك اككاۋنتتار كوپ. ولاردىڭ ارەكەت ەتۋ سحەماسى بەلگىلى. ساتىپ الۋشىدان الدىن الا اقشا اۋدارۋىن سۇرايدى، كەيىن الداپ كەتەدى. مۇنداي فاكتىلەر سوڭعى كەزدەرى جيىلەگەن. ءبىز ينتەرنەت-الاياقتىقتىڭ الدىن الۋ ءۇشىن ازاماتتارعا ءتۇسىندىرۋ جۇمىستارىن جۇرگىزەمىز. سوعان قاراماستان تەكسەرىلمەگەن ينتەرنەت دۇكەندەردىڭ قىزمەتىنە جۇگىنەتىندەر كوپ»، - دەدى 2№ قالالىق پوليتسيا ءبولىمىنىڭ انىقتاۋشىسى ارداق مۇحامبەتوۆا.
ونىڭ انىقتاۋشى قىزمەتكە كەلگەنىنە ءبىل جىل بولدى. ماماندىعىن تەرەڭ مەڭگەرە تۇسكەن پوليتسيا قىزمەتكەرى پسيحولوگيانى دا ۇيرەنىپ العان.
«ماسەلەن، جاس جىگىت قۇمار ويىنعا اۋەستەنىپ، ءباس تىككەن. اجارلى، وزىنە سەنىمدى جىگىت قىزدارمەن وڭاي تانىسىپ، «ۇناتامىن« دەپ الداپ، سەنىمدەرىنە كىرىپ، كەيىن قىمبات زاتتارىن، التىن بۇيىمدارىن، ۇيلەرىندەگى باعالى زاتتارىن الىپ، ونى لومباردكا وتكىزىپ، تۇسكەن اقشانى ويىنعا سالىپ وتىرعان. سول جىگىتكە ءۇش بويجەتكەننەن شاعىم ءتۇستى. شىعىندارىن وتەگەسىن، كەشىرىم بەردى. ءبىراق وسىنداي الاياق جىگىتتەرگە الدانىپ قالماۋ ءۇشىن بويجەتكەندەردىڭ سەزىم جەتەگىندە كەتپەي، تانىسقان ادامنىڭ سىرىن ءبىلىپ العاندارى ءجون دەپ ويلايمىن. قازىر كوبىنەسە موبيلدى قوسىمشاداعى تاكسي قىزمەتىنە حابارلاسىپ، دۇكەننەن ازىق-تۇلىك الدارىپ جانە «ۇيگە كەلگەن سوڭ بەرەم« دەپ الداپ، كيۆي اميانعا اقشا سالدىرتىپ، الداپ كەتەتىن الاياقتار كوبەيگەن. سونىمەن قاتار «پاتەر جوندەيمىز» دەپ تاپسىرىس بەرۋشىدەن اقشاسىن الدىن الا الىپ، جۇمىستى تالاپقا ساي جاسامايتىندار دا كەزدەسەدى. ارينە انىقتاۋشى بولعاسىن ومىردەگى ءتۇرلى تاعدىرلار مەن قۇقىق بۇزۋشىلىقتاردى كورەسىڭ»، - دەدى انىقتاۋشى.
ارداق مۇحامبەتوۆا ەڭبەك جولىن جاس وسىپىرىمدەر ءىسى جونىندەگى مەكتەپ ينسپەكتورى بولىپ باستاپ، ءبىر جىلدان سوڭ انىقتاۋشى قىزمەتىنگە اۋىستى. ول ءوز ماماندىعىن جاقسى كورەدى. ءارى ءادىل شەشىم قابىلداي ءبىلۋ، ادامدارعا كومەكتەسۋ ەڭ باستى پارىزىم دەپ سانايدى.
