جەلتوقسان ايىندا ەلەكتر قۋاتى قىمباتتايدى
سەبەبى، باعانىڭ وسۋىنە گاز، كومىر، جانارماي سياقتى كوميتەتتىڭ قۇزىرىنا كىرمەيتىن وتىن تۇرلەرى اسەر ەتىپ وتىر، دەپ حابارلايدى ك ت ك ارناسى.
مونوپولياعا قارسى قىزمەت ەلەكتر ەنەرگياسىنىڭ وزىندىك قۇنىن بەلگىلەيتىن ەنەرگەتيكا مينيترلىگى دەپ، ماسەلەنىڭ باسىن سول جاققا بۇرادى. ال ولار باعانى بەلگىلەيتىن كوميتەت دەپ، باسىن داۋدان اراشالاعىسى كەلەدى. ەكى جاق ءوزارا تۇسىنىسە الماي جاتقاندا قىمبات تاريف تۇتىنۋشىنىڭ قالتاسىنان وتەلمەك.
تاريف تاقىرىبىن ەلباسى ءبىر جىل بۇرىن عانا قاۋىپسىزدىك كەڭەسىندە ارنايى قاراپ، مينيسترلەردى سىنعا العان. ارتىنشا مونوپوليستەر نەگىزسىز تاريف ارقىلى حالىقتان العان ارتىق ميلليوندارىن كەرى قايتارا باستاعان. ەندى باعانى كوتەرۋ دەگەن اڭگىمە قايتا قىلاڭ بەردى.
«ەنەرگەتيكا مينيسترلىگى ساتىپ الۋ باعاسىن بەكىتەدى. سول جاقتا 15,7 پايىزعا كوتەرىلگەندىكتەن، سوڭعى جاققا ونىڭ اسەرى بولادى، سوڭعى باعاعا. جەلتوقساننان باستاپ 6 پايىزعا اسەر ەتۋى مۇمكىن. قازاقستان بويىنشا، ورتاشا. ال وڭىرلەر دەڭگەيىندە ول ءار ءتۇرلى بولادى»، - دەيدى ق ر تابيعي مونوپوليالاردى رەتتەۋ كوميتەتى ءتوراعاسىنىڭ ورىنباسارى ەربولات ىبىرايحانوۆ.
ەلەكتر باعاسى نارىعىنا اسەر ەتەتىن نەگىزگى ءۇش فاكتور دەسەك، ونىڭ ءبىرى - كومىر. كومىر باعاسى سوڭعى ەكى جىلدا ەكى ەسەدەن دە جوعارى قىمباتتاعان. ول ەلەكتر قۋاتىنىڭ وزىندىك قۇنىنىڭ شامامەن جارتىسىن قۇرايدى.
ودان بولەك، گاز بەن جانارماي دا ەلەكتر باعاسىن نەگىزگى قالىپتاستىرۋشىلار. ولاردى باقىلاۋعا كوميتەتتىڭ قۇزىرى جەتپەيدى. سولاردىڭ باعاسى كوتەرىلگەننەن كەيىن ەلەكتردىڭ كوتەرمە ساۋدادا باعاسى قىمباتتايتىنى تۇسىنىكتى.
ال ەنەرگەتيكا مينيسترلىگى نە دەيدى؟ ولار ەلەكتردىڭ وزىندىك قۇنىن بەكىتكەنىمەن، كومىر مەن گازدىڭ باعاسىن ۋىسىندا ۇستاپ وتىرعان جوق.
«ەگەر گاز ستانسالارىن الساق، گاز قىمباتتاعان جوق. ول ستانتسيالاردىڭ ءتاريفى قىمباتتامايدى، ال كومىر قىمباتتادى. سوندىقتان ول تاريفكە اسەر ەتەدى. ال ونىڭ باعاسىن قاداعالاۋ كوميتەتتىڭ جۇمىسى. ولار ءتاريفتىڭ قالىپتاسۋى بويىنشا بارلىق ساتىلارىن جەكەجەكە قارايدى. سوندىقتان ولار ءتاريفتىڭ ءوسۋىن مەيلىنشە ازايتا الادى نەمەسە ءتىپتى وسىرمەي قويادى»، - دەيدى ق ر ەنەرگەتيكا مينيسترلىگىنىڭ دەپارتامەنت ديرەكتورى قايرات راحىموۆ.
ازىرگە تابيعي مونوپوليالار كوميتەتى مەن ەنەرگەتيكا مينيسترلىگى باعا نارىعىن كىم رەتتەيتىنىن ءوزارا انىقتاي الماي جاتىر. بىلدەي ەكى مەكەمە ماسەلەنى ءبىر- بىرىنە سىلتەپ الەكتەنىپ جۇرە بەرسە، ءبىر ايدان كەيىن ەلەكتر ەنەرگياسى اقىرى قىمباتتايىن دەپ تۇر.
باعانى ارزانداتاتىن ءبىر مۇمكىندىك - جاڭعىرتىلاتىن ەنەرگيا كوزدەرىن دامىتۋ، ياعني جەل مەن كۇن ەنەرگياسىن پايدالانۋ. ءبىراق ونىڭ قازىرگى بۇكىل ەنەرگيا قورىنداعى ۇلەسى 2,3 پايىز عانا.
قالعانى نەگىزىنەن ءسات سايىن قىمباتتاپ بارا جاتقان كومىردىڭ كۇشىمەن وتىر. ال كومىردىڭ باعاسىن ەلىمىزدە ەشقانداي مەملەكەتتىك ورگان رەتتەمەيدى. ياعني، كومىر قىمباتتاسا، تاريف تە وسەدى. سايىپ كەلگەندە جارىق ءتاريفىنىڭ ءوسۋى تاعى دا تۇتىنۋشىنىڭ قالتاسىنا تۇسەيىن دەپ تۇر.
