جاقسى پسيحولوگ مىندەتتى تۇردە گيپنوزدى قولدانادى- مامان

پەتروپاۆل. قازاقپارات - «قازاقپارات» ح ا ا ءتىلشىسى سولتۇستىك قازاقستان وبلىسىنداعى «سەنتر ليچنوستي» پسيحولوگيالىق ورتالىعىنىڭ مامانى، پسيحولوگ ۆاسيلي كاچالوۆپەن گيپنوز تۋراسىندا اڭگىمەلەستى. 

ەريكسون گيپنوزىنىڭ شەبەرى ونىڭ پايداسى مەن زيانى تۋرالى، گيپنوزعا قاتىستى اقيقات پەن اڭىز جايىندا ايتىپ بەردى.

گيپنوز - كوپشىلىك ءۇشىن جۇمباق جانە تىلسىم قۇبىلىس بولىپ كورىنەدى. پسيحولوگتار قوعامدا گيپنوزعا قاتىستى قالىپتاسقان وسى ءبىر تاپتاۋرىن پىكىردى سەيىلتۋگە تىرىستى.

«گيپنوز دەگەندە ادامنىڭ كوز الدىنا ەڭ الدىمەن 90- جىلدارى كوگىلدىر ەكراننىڭ جۇلدىزىنا اينالعان كاشپيروۆسكي مەن چۋماك ەلەستەيدى. ودان كەيىن كينودان كورگەنى: گيپنوز ارقىلى شىندىقتى ايتقىزۋ نەمەسە سونىڭ اسەرىمەن قىلمىستى جاساتۋ كورىنىسى ەلەستەيدى. ءبىراق گيپنوز - پسيحولوگتىڭ جۇمىس قۇرالى. ادام ول ارقىلى ءوزىن تانيدى» ، - دەيدى ۆاسيلي كاچالوۆ.

پسيحولوگتارعا الدىنا كەلگەن اداممەن جۇمىس ىستەۋ ءۇشىن ءبىرىنشى كەزەكتە ونى گيپنوزدان ارىلتۋ مىندەتى تۇرادى. ياعني، بۇعان دەيىنگى سەنىمىنەن ايىرۋ قاجەت.

«پسيحولوگيادا گيپنوز ادامدى بەلگىلى ءبىر كۇيگە ءتۇسىرۋ ءۇشىن قاجەت. بەيسانا جاعدايدا ول قانداي دا ءبىر الەۋەتى بارىن سەزەدى، الايدا قورقىنىش، قاربالاس، نانىم- سەنىمى وعان كەدەرگى جاسايدى. پسيحولوگ وسى كەدەرگىلەردەن ارىلتىپ، ءوزىن ەستۋگە كومەكتەسەدى. بالانى كىشكەنتايىنان بىلمەستىكتەن ديسسوتسياتسيالايدى. مىسالى ءسابي بوتقانى جەگىسى كەلمەسە دە، ونىڭ قالاۋىن ەسكەرمەي اۋزىنا تىقپالايمىز. وسىلايشا ادامدا وسە كەلە قاراما- قايشىلىق بولىپ، وزىنەن الشاقتاپ كەتەدى. گيپنوز ادامدى ءوزىن، قاجەتتىلىگىن تۇسىنۋىنە جاعداي جاسايدى» ، - دەيدى ۆ. كاچالوۆ.

جاقسى پسيحولوگ مىندەتتى تۇردە گيپنوزدى قولدانادى. ادامدى ترانسقا ەنگىزبەيىنشە وندا ىشكى وزگەرىستەر بولمايدى.

«ادامنىڭ ترانس كۇيگە ءتۇسۋى قالىپتى جاعداي. ءبىز كۇنىنە بىرنەشە رەت سەكۋندقا بولسىن ونى باستان كەشىرەمىز. بۇل كۇيدە ءبىزدىڭ پسيحيكامىز دەم الاتىن، جىلدام قالىپقا كەلەدى. ول ءبىزدىڭ ەركىمىزدەن بولاتىن جاعداي. ادام ءۇشىن ترانسقا ۇشىراۋ پايدالى، وتە ءتيىمدى» ، - دەپ تۇسىندىرەدى پسيحولوگ.

مۇنداي كۇيدى ءار ادام، ياعني شىنايى ومىردەن ءبىر ساتكە قول ۇزگەندەي جاعدايدى باستان وتكەرگەن شىعار. بۇل - ترانستىق كۇي.

پسيحولوگيادا ترانستىق كۇيدى تەك ادامعا پايداسى ءۇشىن قولدانادى. ۆ. كاچالوۆتىڭ ايتۋىنا قاراعاندا، كەيدە وعان «ۇنەمى اۋىرا بەرەمىز» دەگەن شاعىممەن كەلەتىندەر بار. بۇل ويدان ولاردى وڭايلىقپەن باس تارتتىرۋ مۇمكىن ەمەس. ادام ءوزىن ءتۇسىنۋى ءۇشىن، ەش جەرى اۋىرمايتىنىنا يلانۋى ءۇشىن گيپنوزدى قولدانۋعا تۋرا كەلەدى ەكەن.

گيپنوزداۋ ءتاسىلىن بىلەتىندەردىڭ بارلىعى بىردەي ونى ادام يگىلىگى ءۇشىن قولدانبايدى. سىرتتاي اسەر ەتۋگە باعىتتالعان گيپنوز ارقىلى ءتۇرلى سەكتالارعا تارتادى، ماركەتينگتە قولدانادى.

«كىم ويىنشىقتى سىندىرسا - ول سونىڭ يەسى. ءتۇرلى سەكتاعا گيپنوزداپ تارتاتىندار وسىنداي پرينتسيپپەن جۇمىس ىستەيدى. گيپنوزداۋشى نىساناعا الىنعان ادام ءۇشىن نەنىڭ ماڭىزدى ەكەنىن ءبىلىپ الىپ، سوعان اسەر ەتە باستايدى. سودان كەيىن ونى تىلەگەنىنە قول جەتكىزۋگە كومەكتەسەمىز دەپ، ءبىر قوعامداستىققا كىرۋگە شاقىرادى» ، - دەيدى ۆ. كاچالوۆ.

ماماننىڭ ايتۋىنشا، ادام وزىنە كەرەككە قول جەتكىزۋ ءۇشىن بارادى. جالدانعانداردىڭ ىشىندە جوعارى ءبىلىمى بارلار كوپ.

ۆ. كاچالوۆتىڭ سوزىنە قاراعاندا، پسيحولوگيا مەن پسيحياتريادا قولدانىلاتىن گيپنوزدى ەسترادادا قولدانىلاتىن تۇرىنەن ايىرا ءبىلۋ قاجەت.

«90- جىلدارى كاشپيروۆسكيدىڭ باعى جاندى. قوعامدا بولىپ جاتقان وزگەرىستەردەن ادامدار ونسىز دا ترانسقا تۇسكەن ەدى. جۇرتتىڭ بار ويى «ەرتەڭىمىز نە بولادى» . مىنە وسى كەزدە ەكرانعا كاشپيروۆسكي شىعىپ، نىق داۋىسپەن، تۋرا قاراپ نۇسقاۋ بەرە باستادى. «ءسىز ماعان قاراپ، مەنىڭ داۋىسىمدى ەستىگەندە سىزگە يگىلىك اكەلەتىن بەلگىلى ءبىر وزگەرىستەر باستالادى» - دەيتىن ول. ونىڭ تاسىلدەرى زالدىڭ ىشىنەن تاڭداپ الىنعان تەز يلانعىشتارعا اسەر ەتەتىن. مۇنى كورگەن باسقالار سەنەتىن» ، - دەيدى ۆ. كاچالوۆ.

ونىڭ پىكىرىنشە، ادامدارعا ۇنەمى تۋعان- تۋىستارىنىڭ گيپنوزى اسەر ەتەدى.

«نەگە ادام ەشتەڭە ىستەمەي كۇنىن ديۆاندا وتكىزەدى؟ ويتكەنى وعان ۇنەمى «سەنىڭ قولىڭنان ەشتەڭە كەلمەيدى» دەپ ايتا بەرەدى. ونىڭ ەنەرگياسى مەن ماقساتتارىن الادى. نەمەسە ءبىر ادام جاقسى ناتيجەلەرگە قول جەتكىزەدى، ءبىراق ءوزى سودان راقاتتانبايدى. ەندەشە بۇل ناتيجەگە قول جەتكىزۋدى وعان بىرەۋ مىندەتتەگەن» ، - دەيدى مامان.

بىرەۋدىڭ مانيپۋلياتسياسىنان قۇتىلۋدىڭ جاقسى امالى - ونىمەن بايلانىستى ءۇزۋ، بارىنشا ارالاسپاۋ.

ۆ. كاچالوۆتىڭ سوزىنە قاراعاندا، باسقا ادامنىڭ ساعان اسەرىن سەزۋگە بولادى. بىرەۋ- مىرەۋمەن سويلەسكەننەن كەيىن كوڭىل- كۇيىڭ ەش سەبەپسىز بىردەن وزگەرسە، ياعني بۇعان دەيىن جابىراڭقى بولعان كوڭىلىڭ كوتەرىلسە، وندا ول سانا- سەزىمگە اسەر ەتپەك بولعان.

اۆتورى: ولەسيا جۋكوۆەن