قازاقستاندا تۇڭعىش رەت الەۋمەتتىك كاسىپكەرلەر بايقاۋى وتەدى
بۇل ماراپات الەۋمەتتىك كاسىپكەرلىكپەن اينالىساتىن ۇكىمەتتىك ەمەس ۇيىمدارعا جانە قازاقستانداعى الەۋمەتتىك كاسىپكەرلىكتىڭ دامۋىنا ىقپال ەتكەن حالىقارالىق ۇيىمدار، كورپوراتيۆتىك بيزنەس، باق نەمەسە مەملەكەتتىك ينستيتۋتتارعا بەرىلەدى.
سىيلىقتى اقپارات جانە قوعامدىق دامۋ مينيسترلىگى «ازاماتتىق باستامالاردى قولداۋ ورتالىعى» ك ە ا ق جانە «Act for Impact» (Impact Hub Almaty) كق بىرلەسىپ ۇيىمداستىرۋدا.
«الەۋمەتتىك كاسىپكەرلىك ا ق ش، كانادا، ۇلىبريتانيا، پولشا، وڭتۇستىك كورەيا سياقتى شەت ەلدەردە زاڭنامالىق دەڭگەيدە بەلسەندى دامىپ كەلەدى. قازىرگى ۋاقىتتا جالپى قازاقستاندا كاسىپكەرلىك قىزمەتى ارقىلى الەۋمەتتىك ماسەلەلەردى شەشۋ تاجىريبەسى كەڭىنەن تارادى. 2000- جىلداردىڭ ورتاسىندا كوپتەگەن ۇكىمەتتىك ەمەس ۇيىمدار Counterpart International جانە USAID قولداۋ باعدارلاماسى ارقىلى وزدەرىنىڭ كوممەرتسيالىق قىزمەت باعىتتارىن قۇرعان بولاتىن. باعدارلاماعا «نامىس» ، «زۋبر» ، «جەتى اعاش» جوعارى ءبىلىمى بار مۇگەدەكتەردىڭ قوعامدىق بىرلەستىگى سياقتى ۇيىمدار قاتىستى» ، - دەدى Impact Hub Almaty كومپانياسىنىڭ تەڭ نەگىزىن قالاۋشى ينديرا شاح.
ونىڭ ايتۋىنشا، قازاقستاندا الەۋمەتتىك كاسىپكەرلىكتى دامىتۋدىڭ ەكىنشى تولقىنى 2010 -جىلدىڭ باسىندا جۇرگىزىلدى.
«بۇل ارالىقتا الەۋمەتتىك كاسىپكەرلىكتى دامىتۋ بويىنشا العاشقى فورۋمدار، كونفەرەنسيالار وتكىزىلدى. شيەۆرون كومپانياسى، الماتى مەنەدجمەنت ۋنيۆەرسيتەتى، ازاماتتىق قوعامدى دامىتۋ قاۋىمداستىعى، ورتالىق ازيانىڭ ەۋرازيا قورى، قازاقستانداعى بريتان كەڭەسى الەۋمەتتىك كاسىپكەرلەردى قولداۋ مەن ءبىلىم بەرۋ باعدارلامالارىن قولعا الدى. سول كەزدە ۇلتتىق كاسىپكەرلەر پالاتاسى الەۋمەتتىك كاسىپكەرلىكتى رەتتەيتىن زاڭنامالىق تۇزەتۋلەر مەن انىقتامالار ەنگىزۋگە ارەكەت جاسادى. ءبىراق، الەۋمەتتىك كاسىپكەرلىك انىقتاماسى ءالى كۇنگە دەيىن زاڭدى تۇردە بەكىتىلمەگەن جانە الەۋمەتتىك كاسىپكەرلىك تۋرالى زاڭ قابىلدانباعان. الايدا، كوپتەگەن ساراپشىلار زاڭ تۋرالى ايتۋعا ءالى ەرتە، الەۋمەتتىك كاسىپكەرلەردى انىقتاۋ مەن قولداۋعا باسا نازار اۋدارۋ ماڭىزدى دەپ سانايدى» ، - دەدى ي. شاح.
سونىمەن قاتار، جۇلدەنى تابىستاۋ اياسىندا ايماقتار بويىنشا الەۋمەتتىك كاسىپكەرلەر ءتىزىمى، ولاردىڭ قىزمەتىنىڭ نەگىزگى باعىتتارى مەن ماسەلەلەرىن قامتيتىن الەۋمەتتىك كاسىپكەرلىك كارتاسىن تانىستىرۋ جوسپارلانعان. ول ءۇشىن مىنا پاراقشا ارقىلى ساۋالنامادان ءوتىپ، تىركەلۋگە بولادى.
بۇگىنگى تاڭدا بەيرەسمي ەسەپ بويىنشا قازاقستاندا شامامەن 200 الەۋمەتتىك كاسىپورىن جۇمىس ىستەيدى. «Ozgeris Ustasy» سىيلىعىنا كەلىپ تۇسكەن ءوتىنىم ناتيجەسىنە سايكەس، ۇيىمداردىڭ %60 عا جۋىعى مۇمكىندىگى شەكتەۋلى ادامداردى جۇمىسقا ورنالاستىرۋ جانە الەۋمەتتىك بەيىمدەۋ، جالپى الەۋمەتتىك وسال توپتاردى قولداۋ ماسەلەلەرىن شەشەدى. سونداي- اق، ءبىلىم ساپاسى مەن قولجەتىمدىلىگى (%16,3) جانە ەكولوگيا (%9,3) ماسەلەلەرى دە وزەكتى بولىپ وتىر.
ازىرگە «Ózgerіs ustasy» سىيلىعىنا قاتىسۋشىلار اراسىنان وتىنىمدەر قابىلداۋ اياقتالىپ، قوعامدىق داۋىس بەرۋگە قاتىساتىن 22 فينالعا قاتىسۋشى انىقتالدى.
داۋىس بەرۋ قورىتىندىسى بويىنشا 15 ۇزدىك الەۋمەتتىك كاسىپكەر انىقتالادى. ولار 6 اتالىم بويىنشا ىرىكتەلىپ، 500 مىڭ تەڭگە كولەمىندە گرانتقا يە بولادى. ۇمىتكەرلەرگە داۋىس بەرۋ 2019 -جىلعى 14-30 - قازان ارالىعىندا voting.ozgeris-ustasy.kz سايتىندا جۇرگىزىلەدى.
