ايەلى كۇيەۋىنەن كوپ جالاقى الاتىن بولسا
جۇبايلار تەك اقشا جەتىسپەۋشىلىگى نە ونىڭ ورىنسىز جۇمسالۋىنا قاتىستى عانا ەمەس، وتباسىلىق بيۋدجەتتى تولتىرۋعا كىم قانشالىقتى ات سالىساتىنىنا دا بايلانىستى كيكىلجىڭ تۋادى.
ادامدار ەجەلدەن قالىپتاسىپ قالعان قاعيداعا ۇيرەنگەن: ەر ازامات تۇزدە ءجۇرىپ اقشا تابادى، ايەل ادام ۇيدە وتىرىپ ءۇي تىرلىگىمەن اينالىسىپ، بالالاردى تاربيەلەيدى. بۇل سوناۋ ايەلدەردى تومەنگى تاپ وكىلى سانايتىن زاماننان قالعان تۇسىنىك.
ول كەزدە ايەل زاتىنىڭ قوعامدا ورنى جوق، ەشقانداي شەشىم شىعارۋعا قاتىسپايدى، ءتىپتى قۇقىعى دا اياققا تاپتالىپ جاتاتىن. الايدا مۇنداي قاتىگەز ءومىردىڭ داۋرەنى ءوتتى. بۇگىندە نازىك جاندىلار دا ەر ازاماتتارمەن تەڭ قۇقىلى. وتىراتىن كرەسلولارى دا كىشى ەمەس، تاباتىن تابىستارى دا از ەمەس. بۇل باتىس ەلدەرىندە قالىپتى جاعداي سانالعانىمەن، ءبىزدىڭ مەنتاليتەت ءالى دە قابىلداي الماي كەلەدى.
ءتىپتى ايەلى وزىنەن كوپ تاپسا، قۇقىعى تاپتالعان دەپ ەسەپتەلەتىن ەر ادامدار دا جەتەرلىك. ەركەكتەر نە ىستەۋى كەرەك؟
مۇنداي جاعدايدا ەر ادام قانداي ارەكەت كورسەتۋى كەرەك؟ ەگەر ەر ادامنىڭ تابىسى (ايەلىنەن از بولسا دا) كيىم، تاماق، كوممۋنالدىق قىزمەت، نەسيە جانە باسقا دا قاجەتتىلىكتەردى وتەۋگە جەتكىلىكتى بولسا، وندا جاي عانا ايەلىمنەن كوپ تابايىن دەپ ءوزىنىڭ سۇيىكتى جۇمىسىنان باس تارتۋدىڭ نە قاجەتى بار؟
ونىڭ ورنىنا قوسىمشا باسقا جۇمىستار ىزدەۋگە بولادى نەمەسە ۇيدەگى جوندەۋ جۇمىستارىن، كولىك جوندەۋ دەگەن سەكىلدى ماشىقتاردى ءوزىڭىز يگەرىپ، وسىلاي وتباسى بيۋدجەتىن ۇنەمدەۋگە بولادى.
ايەلدەر نە ىستەۋى كەرەك؟
دانا كەلىنشەك مۇندايدا باقىتىن باياندى ەتىپ ساقتاپ قالۋى ءۇشىن، وسىنداي ورىنسىز ولقىلىتاردان نەكەسى بۇزىلماۋى ءۇشىن ءوزى الاتىن جالاقىنى نازاردان تىس قالدىرىپ وتىرۋى ءتيىس. ەر ازاماتىنا دا از اقشا تاباتىنىن ەشقاشان بەتىنە باسىپ ايتپاۋى كەرەك. تاعى ءبىر جولى - تۇسەتىن تابىستى قوسىپ، جۇبايىمەن بىرگە وتىرىپ، بارلىعىن اقىلداسىپ جۇمساۋدى جوسپارلاۋ.
