جەتىستىكتىڭ سىرى - كۇلىمدەگەن ءجۇز
نۇر-سۇلتان. قازاقپارات - كۇلىمدەۋ - تەگىن، ونى العان ادامدى شاتتاندىرادى، بەرگەندى قينامايدى.
باقىتتىڭ كىلتى - كۇلىمدەۋ.
كۇلىمدەۋدىڭ جىلىلىعىندا بالقىمايتىن مەتالل جوق.
كۇلىمدەي الۋ ەكى دۇنيەنىڭ باقىتىنا سەبەپ بولادى.
يسلام ءدىنى - سۇيىسپەنشىلىك، كۇلىمدەگەن ءجۇز، جىلى ءسوز، دۇرىستىق جانە جاقسىلىق ءدىنى.
دوستارعا دۇرىستىقتى ايتۋ كەرەك، دۇشپانداردى كۇلىمدەگەن جۇزبەن جانە جىلى سوزبەن باسقارۋ كەرەك.
جەتىستىكتىڭ سىرى - كۇلىمدەگەن ءجۇز، جىلى ءسوز جانە جاقسى ساياسات. جاقسى ساياسات - ءبارىنىڭ رازى بولۋى دەگەن ءسوز.
دۇشپاندارىڭا جاقسىلىق جاساڭدار، سىيلىقتار بەرىڭدەر. دوستارىڭا رەنجىسەڭدەر، وعان جاقسىلىق جاساڭدار، ءبىر ادامنان قىسىلساڭدار، وعان كۇلىمدەڭدەر. وسىلاردى ىستەيتىن بولساڭدار راحات بولاسىڭدار.
ءبىر ادامنىڭ اۋليە ەكەندىگى جىلى ءسوزى، جاقسى مىنەزى، كۇلىمدەگەن ءجۇزى، جومارتتىعى، ءسوز تالاستىرماۋى، كەشىرىمدىلىگى جانە بارىنە مەيىرىمدىلىك تانىتۋى ارقىلى اڭعارىلادى.
جاقسى مىنەزدى ادام - ادەپتى، از سويلەيدى، قاتەلىكتەرى از، عايبات ايتپايدى، اللاھ ءۇشىن جاقسى كورەدى، اللاھ ءۇشىن جەك كورەدى، اماناتتى ساقتايدى، كورشىلەرى مەن دوستارىن قورعايدى. جاقسى مىنەزدى ءبىر كىسىدەن جامان مىنەزدى ايەلىمەن قالاي ءومىر ءسۇرىپ جاتقانىن سۇراعان كەزدە: «جاقسى مىنەزدى اداممەن كەز كەلگەن ادام ءومىر سۇرە الادى. ناعىز جەتىستىك - جامان مىنەزدى اداممەن دە ءومىر سۇرە ءبىلۋ. ونىڭ جامان مىنەزىنە سابىر ەتپەيتىن بولسام، مەنىڭ جاقسى مىنەزدى ەكەنىم قالاي بەلگىلى بولادى؟» دەدى.
حاديس شاريفتەردە بىلاي دەلىنگەن:
«ءمۇمين باۋىرىنىڭ جانىندا قاباعىن اسىپ تۇراتىن ادامعا پەرىشتەلەر لاعنەت ەتەدى.» (حاتيب)
«جاقسىلىقتى كۇلىمدەپ جۇرەتىن ادامداردان سۇراڭدار.» (ءبايھاقي)
«ءمۇمين باۋىرىنىڭ بەتىنە كۇلىمدەپ قاراۋ ساداقا بولىپ تابىلادى.» (ج. ساعير)
«ءدىن باۋىرىنا كۇلىمدەپ قاراۋ، جاقسى نارسەلەر ۇيرەتۋ، جاماندىق جاساۋىنىڭ الدىن الۋ - ءاربىرى جەكە- جەكە ساداقا بولادى.» (تيرميزي)
«مال- مۇلىكتەرىڭمەن ەلدىڭ ءبارىن رازى قىلا المايسىڭدار. كۇلىمدەگەن ءجۇز جانە جىلى سوزبەن، جاقسى مىنەزبەن رازى قىلۋعا تىرىسىڭدار!» (حاكيم)
«سالەم بەرگەندە كۇلىمدەگەن ادام ساداقا ساۋابىن الادى. » (ي. ءا. ءدۇنيا)
«قايىردى، جاقسىلىقتى سۇلۋ جۇزدىلەردىڭ جانىنان ىزدەڭدەر!» (بۇحاري)
«مىنەزى جانە ءجۇزى جاقسى بولعان ادام دۇنيە جانە احيرەت جاقسىلىعىنا قاۋىشادى. » (يبن شاحين)
