قازاقستاننىڭ ۇزدىك دەسانتشىلارى انىقتالدى
نۇر-سۇلتان، قازاقپارات - 2019-جىلدىڭ تەكسەرۋ قورىتىندىسى بويىنشا دەسانتتىق-شابۋىلداۋ اسكەرلەرىنىڭ اسكەري بولىمدەرىندە ۇزدىك مەرزىمدى اسكەري قىزمەتشىلەر انىقتالدى، دەپ حابارلايدى قازاقپارات ءتىلشىسى.
دەسانتتىق-شابۋىلداۋ اسكەرلەرىنىڭ قولباسشىسى گەنەرال-مايور ابۋباكيروۆ قانىش اسانحان ۇلىنىڭ باستاماسى بويىنشا تالدىقورعان، سارىوزەك قاپشاعاي جانە الماتى گارنيزوندارىنان سانى 100 دەن اسا سارباز الماتى قالاسىنىڭ كورىكتى جەرلەرىندە بولۋ مۇمكىندىگىنە يە بولدى.
ساربازدار الماتى قالاسىنىڭ ورتالىق مۇراجايىندا جانە 28-پانفيلوۆشىلار پاركىندە بولدى.
«تاريحتى بىلمەي بولاشاقتى باعدارلاۋ مۇمكىن ەمەس دەيدى عوي، سوندىقتان ءبىز بۇگىن كيەلى بابالارىمىزدىڭ ءجۇرىپ وتكەن جولىمەن تەرەڭىرەك تانىسۋدامىز. بىزگە وسىنداي قۋانىشتى كۇندى سىيلاعان قولباسشى مىرزاعا العىسىمىز شەكسىز»، - دەيدى قاتارداعى باتىرباي ەلامان.
جاۋىنگەرلىك، مەملەكەتتىك-قۇقىقتىق دايىندىقتان، اسكەري تارتىبىمەن ۇزدىك دەپ تانىلعان ساربازداردىڭ اتا-انالارى گەنەرال-مايور قانىش اسانحان ۇلىنىڭ قولىنان العىس حاتتارمەن ماراپاتتالدى. ولاردىڭ ىشىندە، ۇزدىك جۇرگىزۋشى-مەحانيك، ۇزدىك اتقىش، كوزدەۋشى-وپەراتور، سپورتشى ساربازدار بار.
«سىزدەر - بولاشاق وتان قورعاۋشىلار، ۇزدىك دەسانتشىلارسىزدار! وزدەرىڭىزگە جۇكتەلگەن مىندەتتى ابىرويمەن اتقارىپ جاتسىزدار. سىزدەرگە قاراپ ەلدىڭ ەرتەڭىنە ۇلكەن سەنىممەن قاراۋعا بولادى. بۇگىنگى كۇنگى جاسالعان مەرەكەنى سىزدەردىڭ قىزمەتتەرىڭىزگە دەگەن العىسىمىز دەپ بىلەرسىزدەر. الداعى ۋاقىتتا وسى تەكتەس ءىس-شارانى ءجيى وتكىزىپ تۇراتىن بولامىز»، - دەيدى دەسانتتىق-شابۋىلداۋ اسكەرلەرىنىڭ قولباسشىسى قانىش اسانحان ۇلى.
