نۇر-سۇلتاننان الەمنىڭ قاي قالالارىنا ۇشىپ بارۋعا بولادى؟
نۇر-سۇلتان. قازاقپارات - نۇر-سۇلتان قالاسىنان الەمنىڭ قانشا قالاسىنا ۇشىپ بارۋعا بولادى؟ مەملەكەت باسشىسىنىڭ تاپسىرماسى اياسىندا «اشىق اسپان» رەجيمىن دامىتۋ ءۇشىن نە ىستەلىپ جاتىر؟
بۇل سۇراقتارعا ازاماتتىق اۆياتسيا كوميتەتى جاۋاپ بەردى، دەپ حابارلايدى قازاقپارات.
ەلباسىنىڭ كولىك قولجەتىمدىلىگىن ارتتىرۋ جونىندەگى تاپسىرماسىن ورىنداۋ ءۇشىن 2017-جىلى استانادا «اشىق اسپان» رەجيمى ەنگىزىلگەن بولاتىن. ايتا كەتەيىك، «اشىق اسپان» رەجيمى شەتەلدىك اۋە كومپانيالارىنىڭ ەلورداعا ءجيى ۇشۋىنا مۇمكىندىك بەرەدى.
«وسى رەجيمنىڭ ارقاسىندا قازاقستاندىق جانە شەتەلدىك اۋە كومپانيالارى سوڭعى 3 جىلدا 19 جاڭا باعىتتى اشتى (نۇر-سۇلتان - توكيو، بۋداپەشت، ۆارشاۆا، حەلسينكي، بەيجىڭ، قازان، ۆيلنيۋس، تۇمەن، چەليابى، كراسنودار، تومسك، سوچي، باكۋ، دۋشانبە، ۇلان-باتىر، پراگا، ەريەۆان، دەلي، شارم-ەل-شەيح). بۇرىننان كەلە جاتقان لوندون، ماسكەۋ، بەيجىڭ جانە ىستانبۇلعا اپاراتىن رەيستەردىڭ جيىلىگى ارتا ءتۇستى»، - دەلىنگەن ازاماتتىق اۆياتسيا كوميتەتىنىڭ مالىمەتىندە.
قازىرگى تاڭدا نۇر-سۇلتاننان الەمنىڭ 34 قالاسىنا تىكەلەي ۇشىپ بارۋعا بولادى.
جالپى، كوميتەتتىڭ مالىمەتىنشە، تاياۋ جىلدارى دوحا (Qatar Airways, 2020 ج.) ، شاڭحاي (China Eastern, 2021 ج.)، دۋباي (Emirates, 2021 ج.)، تەل-اۆيۆ (SCAT، 2020 ج.)، سينگاپۋر (2020 ج.)، نيۋ-يورك (2023 ج.) سەكىلدى قالالارعا جاڭا رەيستەر اشىلادى. سونداي-اق، ۆارشاۆاعا (LOT Polish Airlines, 2020 ج.) اپاراتىن ۇشاقتار جيىرەك ۇشاتىن بولادى.
ەسكە سالا كەتەيىك، 8- قازان كۇنى نۇر-سۇلتان اكىمدىگىندە وتكەن ماجىلىستە مەملەكەت باسشىسى قاسىم-جومارت توقايەۆ ەلوردادان تىكەلەي حالىقارالىق اۋە رەيستەرىنىڭ سانىن ارتتىرۋدى تاپسىرعان بولاتىن.
«حالىقارالىق اۋە قاتىناستارى سانىن ارتتىرۋ - ماڭىزدى ماسەلە. قازىرگى ۋاقىتتا نۇر-سۇلتاننان حالىقارالىق باعىتتا 30 دان از تىكەلەي رەيس ورىندالادى. بۇل - جەتكىلىكسىز»، - دەدى مەملەكەت باسشىسى.
