سالافيتكە تۇرمىسقا شىققان ايەل قىزىنىڭ پسيحيكاسى ءۇشىن الاڭدايدى

بويجەتىپ، وقۋىن بىتىرگەن كەزدە ارمانمەن تانىسادى. ارمان وتە تۇيىق، ءبىرتوعا جىگىت ەدى، ناماز وقيتىن، ازداپ ساقال قوياتىن. ايگەرىمنىڭ اتا- اناسى باسىندا مۇنىسىن جاراتپادى.

كەيىن قىزىنىڭ مىنەزىنىڭ شالكەستىگىنەن امال جوق كەلىسەدى. ءبىراق، ەكەۋىنىڭ تويى بولمادى. سەبەبى وعان ارمان قارسى بولدى.

«مەن وعان كۇيەۋگە شىققاندا راديكال سالافيت ەكەنىن بىلمەدىم. بىرتىندەپ مىنەزىنىڭ مۇلدە تۇيىقتالىپ بارا جاتقانىن بايقادىم. ءبىزدىڭ ۇيگە قوناق كەلمەيتىن. ەشكىمدى تانىمايتىنمىن. ۇيدە مەن اقشا تاباتىنمىن. ول نامازحان دوستارىن ارالاپ قۇر جۇرەتىن. جەڭىلدىڭ ۇستىمەن، اۋىردىڭ استىمەن ءومىر سۇرگىسى كەلدى. قىزىم ەكەۋمىزدى اسىراۋدى مۇلدە ويلامايتىن. بىرەسە، ءوزىنىڭ جاقتاستارىمەن ساۋداعا شىعاتىن، بولماسا ۇيدە جاتاتىن»، - دەدى ايگەرىم.

ايگەرىمگە اناسى، باۋىرلارى اقشالاي، زاتتاي كومەكتەسىپ تۇرعان. ءبىر جىلدا جاس وتباسى بىرنەشە رەت پاتەر اۋىستىرعان.

«مۇسىلمانداردا ايەلدى العان سوڭ اسىراۋ پارىز ەدى عوي. بىزدە ولاي بولمايتىن. مەن ءدارىحانادا ىستەدىم. كەيدە تاۋلىك بويى جۇمىس ىستەدىم. سوندا كۇيەۋىم ءدارىحاناعا كەلىپ، مەنى كۇزەتىپ وتىراتىن. قوجايىن كەلگەن كەزدە اقشامدى الىپ كەتەتىن. جاعدايىمىز وتە ناشار بولدى. جازدىگۇنى ماعان قولعاپ كيگىزەتىن. و ل ح- تەن تەگىن زات ىزدەپ جۇرەتىنبىز. بالەنىڭ ءبارى قىزىم مەكتەپكە بارعاندا باستالدى. قىزدى مەكتەپكە جىبەرگىسى كەلمەيتىن. ويتكەنى ءانۇران ايتقانىن قالامايتىن. قىزىم ساباعىنان ءجيى قالاتىن بولدى. كەيىن باليعات جاسىنا جەتىپ قالعاندا ماجبۇرلەپ ورامال تاققىزدى. باليعاتىنا تولعان سوڭ كۇيەۋگە بەرەم دەدى. ءبىزدىڭ ەلدىڭ زاڭىنا باعىنعىسى كەلمەدى. قازاقستاندا 18 جاسقا تولماعان ادام نەكەگە تۇرا المايدى»، - دەدى كەلىنشەك.

ايگەرىمنىڭ 9 جاسىندا ورامال تاققان قىزىنىڭ جۇيكەسى توزا باستادى. تۇندە قاراڭعىلىقتان قورقادى. بارلىق جەردە اكەسى ايتىپ قويعان شايتان ەلەستەيتىن.

«ءتۇن ىشىندە شايتان كىرىپ جاتىر دەپ شوشىپ وياناتىن. قىزىمدى پسيحيكالىق دەنساۋلىق ورتالىعىندا جاتقىزۋىما تۋرا كەلدى»، - دەدى ول.

ايگەرىم ءوزىنىڭ سالافيت اعىمىنداعى جىگىتكە كۇيەۋگە شىققانىنا وكىنەدى. قىزىنىڭ دەنساۋلىعى ءۇشىن الاڭدايدى.

بۇل وقيعاعا قاتىستى الماتىداعى زاريا ۆوستوكا مەشىتىنىڭ يمامى قازبەك احمەتوۆ مىناداي تۇسىنىك بەردى.

«حالىقتىڭ اراسىندا ازاماتتىق نەكە كوبەيىپ كەتتى. بۇل وڭ ءۇردىس ەمەس. قازاقستاننىڭ ادىلەت ورگاندارىندا نەكەسىن تىركەۋ ەكى ادامعا دا جاۋاپكەرشىلىك جۇكتەيدى. ال ازاماتتىق نەكەدە دەسترۋكتيۆتى ءدىني اعىم وكىلدەرى ءۇشىن ەش جاۋاپكەرشىلىك جوق. ولار 3 رەت تالاق ايتىپ كەتە بەرەدى. ال جاس ايەلدەر نە مۇلكى جوق، نە اليمەنتى جوق ورتادا قالادى. قازىر ق م د ب بۇل پروتسەسكە جاۋاپكەرشىلىكپەن قاراي باستادى. مەشىت يمامدارىنا نەكە كۋالىگىنسىز نەكە قيۋعا تىيىم سالدى. نەمەسە ەكى تاراپتىڭ دا اتا- اناسى قاتىسۋى تالاپ ەتىلەدى. پايعامبارىمىز (س. ع. س) اجىراسۋعا قارسى بولعان»، - دەدى مەشىت يمامى

اۆتور: گۇلميرا عوسمانالي